السلام عليكم

أنا بالنسبة لي لدي تجربة مريرة جدا مع اللولب والنوع المستخدم كان المعدني اللي على شكل حرف T

وتجربتي كالتالي : اني بعد ما انجبت للمرة الثالثة ذهبت لطبيبة الكل مدح لي ( زوجة اخي وبنات عمي ) هي وانها ممتازة في اللولب المهم طلعت من عندها وانا رجولي مش شايلاني من الألم وفي البيت ثلاثة ايام وأنا راقدة على السرير ما أقدر اتحرك أبدا هذا غير الدم اللي ينزل ورجعت للدكتورة اليوم الرابع اشتكي لها كشفت وقالت كله طبيعي وحاجة عادية الألم المهم مامرت ستة شهور وإلا أحس أني تعبانة وماني طبيعية راجعت دكتورة اخرى قالت سوي تحليل دم وبعدين طلعت حامل وفي الشهر الثالث كمان
المهم رضيت بأمر الله بس خايفة من أن اللولب موجود ومانزل فكشفت قالت مش باين في الرحم ممكن الجنين مغطي عليه خلاص إن شاء الله وقت الولادة ينزل فسلمت بالأمر الواقع بس طول مدة الحمل وأنا اعاني من التهابات شديدة جدا في البول ومافي إلا تكتب لي الدكتورة على مضادات حيوية وفي الأخير وصلتها لخمسمائة ملي

وبعد ماولدت بالسلامة سألت الدكتورة : لقيتوا اللولب قالت ياا لله ليه ماذكرتينا ( شوفوا كيف انا اللي اذكرهم اللي تعبانه وحالتي ما يعلم بيها إلا الله وهم انا اراجع عندهم وكل شيء مكتوب في الملف يعني المريض هو اللي غلطان في كل الأحوال )

المهم قالت هو أكيد نزل بس إحتياطا راجعينا بعد 25 يوم عشان نتأكد بس ونعمل اشعة x ولما راجعت ( والله اني كنت ما ابغى أراجع بس زوجي أصر ) طلعت المفاجأة أنه لازال موجود بالجسم ولكن مش عارفين يحددوا مكانه فين بالزبط وراجعت كل المستشفيات الكبيرة في جدة سليمان فقيه والألماني والداغستاني عشان يعرفوا فينه وينزلوه لي ما عرفوا هذا غير الأعصاب التالفة والأشعة والتحاليل إلين في الأخير رحت لمستشفى صغير بس فيه دكتورة ماهرة وسوت لي كشف بالسونار من تحت وقالت أنا شايفة ظله في المثانة ( ياربي وش اللي وداها هناك ) بس على طول رحت لمستشفى الجامعة الحكومي وشرحت لهم الحالة وعشانها حالة غريبة ويبغوا يدرسونها أخذوني بسرعة وترقدت في المستشفى وكان قرارهم بعد الأشعة أنهم برضه مش متأكدين فينه عشان كده سوف يدخل معي لغرفة العمليات طبيبين أحدهما استشاري مناظير في المسالك البولية والثاني استشاري جراحة نساء وولادة
عشان لو ماوجده في المثانة يعملوا فتح بطن ويبحثوا عنه المهم ولله الحمد وجدوا اللولب في المثانة وسحبوه بالمنظار من فتحة البول ( الله يكرمكم ) وجلست بالقسطرة البولية اسبوع كامل عندهم لإنه مع سحب اللولب كون ثقب في جدار المثانة ولما التئم الجرح نزلت من المستشفى ولله الحمد والمنة والله من بعدها حلفت ما أستخدم لا للولب ولا حبوب وأترك الأمر بيد الله وما استخدم إلا وسائل طبيعية كالجدول والعازل وما أبهدل في نفسي أبدا والحمد لله صرت ما أحمل إلا بعد ثلاث سنين

معليش طولت في حكايتي بس عشان ممكن استفادة وعظة وعبرة

مشكورين

اختي والله حكايتك غريييييييييييييبه
الحمد لله على سلامتك....
بس اللولب يطلع؟؟؟ ماسألتيه كيف طلع من الرحم وراح المثانه؟؟؟

اهلا اختي انا صار لي نفس قصة ام عموري بس يلي صارت اني انجبت واجهضت عدة مرات فقررت ركب اللولب رحت ركبته وعند دكتورة شاطرة وكله تمام واذ بعد فترة بدات العصبية تزيد وما اقدر اتحمل حالي وهي الحالة تصير لي بالحمل المهم رحت حللت بطلع المفاجأة حاااامل رحت عالطبيبة مباشرة فحصتني ما لقته ... فقررنا انه لازم اعمل اشعة والاشعة ما تصير وانا حامل فما رضيت انتظر للولادة خفت يجي شي بالجنين لا سمح الله وصممت اني نزله وفعلا نزلوه وعملنا الاشعة لقوه على جدار المعدة عميتمشور الاخ ....فعملوالي عملية قيصرية خلال نص ساعة حددوا مكانه وفتحوه وسحبوه ...
بس مو هون المفاجأة المفاجأة اني رجعت ركبته لاني ما بقدر على الحبوب تسبب لي عصبي وما نفعت غير طرق جربناها فقررت ارجع للولب وغيرت الطبيبة كلها ورحت لعند طبيبة معظم وقتها بمشافي اميركا وتنزل فترات بالسنة سوريا فرحت وركبته لي والحمدلله صارلي فوق السنة وكله تمام وبحس بالخيط وبعمل فحص دوري بلاقي كله تمام بفضل الله فكنصيحة انا جربت ولقيت مافي متله ولا حبوب ولا شي ينفع وقالتلي الدكتورة اول كلمة حرام واحدة بعمرك تستعمل حبوب من هلا ....واقنعتني ارجع للولب وهي تركبه وكله تمام هلا

الله يجزاكم الجنــة ..

انا ركبته وماناسبني .. وبعد سنه من تركيبه طاح من نفسه والحمدلله :)
فجاه صارت دورتي غزيره الله يكرمكم والم بالظهر وانا بدوره المياه نزل :( وانا اتوضا ...