كل مادقيت في ارض وتد.. من رداة الحظ وافتني حصاه( حسبي الله على المرور)

صباح الخييير..
بصراحه ماني عارفه وشلون ابدأ موضوعي بس يعلم الله اني متضايقه وماجاني نوم من هالموضوع واتمنى انكم تساعدوني
السالفه ومافيها ان زوجي موظف بس راتبه مو ذاك الزود.. يعني لو كان صافي بدون ديون ممكن يكفينا..
هو انسان مايحب الدين ابدا بس قدر الله واخذ قروض لناس وابتلش فيها..لدرجة انه ماينام الليل بسبب التفكير في الدين
غير كذا يقسم راتبه مابين ايجار ومصروف بيت وجوالات وقروض ومايصفي لنا بالاخير الا تقريبا300 ريال بس لاخر الشهر..
المهم فكر انه يشتغل ( كداد) يعني يشيل ركاب من مكان الى مكان..وبالخميس والجمعه لو كان فاضي يطلع مشاوير بعيده عشان يكون المبلغ اقوى.. بس طبعا هذي مايطلعها الابعد اشهر..
بس حسبي الله ونعم الوكيل على ادارة المرور الي مو راضيه ان خلق الله يشتغلون بالحلال..
تخيلوا خلال اسبوع اعطوه قسيمتين يعني 600 ريال كله عشانه يشيل ركاب..يعني الي قاعد يجمعه شهور يطير بيوم عشان قسيمه..
والله اني افرح اذا دقيت عليه وقال لي انه لقى ركاب وانه بيتأخر .. بس ما ألحق افرح الا وهو يقولي ماسكيني ومعطيني قسيمه ويمكن يحجزوا السياره ..
والله العظيم ابكي احيانا لأني يادوب افرح انه حصل شي الا وتروح كلها للقسايم ومانحصل شي الا القهر ..
انا مو فقيره او محتاجه ..لا انا بس من كثر ما اشوفه يهتم بالدين وماينام الليل يضيق صدري واتمنى يكون عندي شي اعطيه ويرتاح..
حتى اهلي لما يسألوني اقول انا مرتاحه كثير وكل شي تمام..
بس ما اقول الا حسبي الله على اللي قلب حياته وخلاه ياخذ قروض وهو مايستاهل اصلا تعطيه ريال..
القهر صدق من المرور الي يبي خلق الله يشتغلون حراميه ومجرمين عشان يعيشون ويدورون لقمة العيش..
طبعا انا ماكتبت هالكلام الا والله من الضيقه الي بصدري ولا ادري وش اسوي ..
ابي مساعدتكم مثلا مندوبة مبيعات ولا فكرة تجاره بسيطه مربحه او اي شي اساعده فيه..او اي فكره ممكن تفيده هو..
وغير كذا ابي دعوااااااتكم بقضاء دينه وراحة بال لنا كلنا وسعة عيش..