يا أختي حاولي تدورين لك وظيفه تسوين أي شغله تعرفين لها
وخليك قاعده ببيتك ..
ولازم احد كبير من أهلك يدخل ويحل الموضوع
الله يفرج همك وينفس كربتك ويكتب لك اللي فيه الخير
ويصلح زوجك ويهديه

كلام عين العقل ...

حبيبتي اللي لاحظته ان في من الازواج اللي يسوون الحركة هذه " يطردون زوجاتهم بعد المشاكل" مب عشان ما يبيها لكن لأنه يبي يكون بروحه ... ولأنه يبي يبين لزوجته انه المتحكم فيها

لكنه للأسف ما يفكر ان الشي هذا يأثر و يدمر نفسية عياله قبل زوجته.

شوفي حبيتي لما يقولج سيري بيت اهلج ... قولي له بالحرف وبهدوء وبدون عصبية " هذا بيتي وبيت عيالي ومب طالعه منه، اذا تبي انت اطلع" :)

وبس ... صدقيني زوجي كان مثل زوجج وانا جربتها بعد ما ربيعتي جربتها وقالتها لي ... ومن لما قلنا هالكلمة ولا عاد ازواجنا كرروها جدامنا مرة ثانية ...

عسى الله يصلح لج ريلج ويهديه ..

قبل كل شيء اكثري من الاستغفار .. يمكن هذا بذنب احدثتيه .. وكلنا نخطأ




الله يفرج همك .. وربي ان حزنت وتألمت عشانك ..

لكن وبدون ما تزعلين مني .. انتي السبب .. ادري انها كلمة متأخرة ومهو وقتها بس اقولها عشان تنتبهين من الان ..

لا توقلين خلاص راحت علي .. ما بينفع معه .. لااااااااا وربي بينفع بس اهم شيء اقتنعي بالتغير ..

حتى لو انتي كامله .. التغير شيء صحي ..



شوفي ..

أول شيء طنشيه .. ادري انه صعبه تطلعين من هذا الهم والحزن بس لازم تضغطين على نفسك ..

لا تفكرين فيه ابد.. ابد ..

بعدين انسي روحتك لامك لانك بتاخذين حقك وانتي في بيتك واستعيني بالله واصدقي مع الله في التوكل ..

بعطيك خطوات اتمنى تمشين عليها .. لانك في النهاية بتطلعين من المشكلة وبتدعين لي ..

في البداية قلنا طنشيه .. واذا قال اطلعي .. قولي بكل ثقه انت اطلع .. وروحي وطنشيه ..
بعدين عيالك المساكين حاولي تطلعينهم من حوسة هذا المشكلة لانهم يشوفون ما يقدرون غير الكتمان ..
وما بينفعك بعد رب العالمين غيرهم ..
حاولي تخلقين لهم جو سعيد .. جو مرح .. لا تقولين كيف .. والوضع ما يناسب لاااااا ..

غيري الوضع اقلبي الطاولة يا قلبي .. ركزي اهتمامهم على شيء ثاني غير المشكلة ..

العبو انبسطو .. حتى حاولي تغيرون في ترتيب الاثاث معهم .. استشيريهم وش رايكم وش احسن ..

حاولوا تطلعون مع بعض من المشكلة باهتمامكم بشيء اخر ..ركز على اهتمامهم .. وش يبون ..

واهم شيء اذا جاء ابوهم خليهم يروحون له يسلمون عليه ولا يدخلون بالمشكله ..
قولي لهم هذا ابوكم .. وحسسيهم انك تزعلين لو قالوا عنه شيء ..
وخليه هو بعد يشوف انك بنت رجال ..


نجي لك انتي .. اهتمي بنفسك وشكلك بس لا تبالغين .. خليك مرتبه دايم .. ريحتك حلوه ..

مهو عشانه لاااااا عشانك ..ولا تقولين بيحسب هذا عشانه .. لااااا ابد لا تعتبريه موجود حسسيه انك مش مهتمه مثله بالضبط ..

يمكن بتضحكين لو ادخل بالنقطه الجاية..

استغلي هذا الوقت وغيري من طلتك .. سوي خلطات لجسمك وشعر .. روحي دولابك ونبشيء واعيدي تطقيم الملابس ..

اصنع من ماهو موجود عندك شيء اخر ..

اصقلي نفسك .. غذيها بالقراءة ..


بعد فتره بتجدين انك متغيره .. وحابة هذا التغير .. بتحسين بثقه .. هذي الثقه بيشوفها هو على وجهك ..

وراح يرجع لك .. لانه وجد انسانه قويه واثقه ..

ادري طولت عليك .. بس والله اني ودي اكتب الى بكره .. لاني تعبت عشانك ..


الله يفرح قلبك .. ومافي شيء بعيد على الله ..

حبيبتي اذا لزم الامر وخرجتي نصيحتي لا تاخذين عياللك والله بحس بقيمتك عندهم واصبري وامسك نفسك عنهم ولاتخافين ماهم ضايعين لهم رب وابوهم ماهو غريب
عن تجربه من خالتي عندها 8 عيال وخوالي اخذوها وتركوا عيالها وبعد اسبوع ماتحمل العيال صار يقعد مرابط في البيت ويعشي ويذاكر وجاء ورجعها البيت

الله يهديه