كل مره اكون حامل اشيل هم اسم المولود من اهل زوجي... الله يهدي الجميع

السلام عليكم ورحمه الله وبركاته
ماراح اطول... انا محتاجه افضفض
مشكلتي اتوقع ماتختلف عن مشكلة كثير من الاخوات اللي احتكاكها كبير بحمولتها او اهل زوجها

انت معي بنوته الله يخليها لي وماشاء الله الان حامل بالشهر التاسع بكل المرتين فيه ينغص علي فرحتي ،، مثلكم عارف من اهم الاشياء الممتعه اذا الله اكرمك بطفل انك تسمينه اسم انتي تختارينه ماهو اسم مفروض عليك فرض
والمشكله اني من كنت صغيره اموت بالاسماء الحديثه والملفته انا كذا وذوقي كذا
وللاسف لما جبت بنتي انصدمت بأصرار زوجي انه يسمي بنتنا على امه طبعا حبي واحترامي لخالتي ام زوجي هذا امر مفروغ منه والله يعلم بقدرها عندي ولكن انكسرت فرحتي في بنتي بسبت اسم حتى ماهو من جيل بنتي واللي يقهر ويضحك بالموضوع انه انا امها صرت احسن منها اسم واحدث... طبعا ياليت زوجي سمى هالاسم عن قناعه لاوالله سماه من الضغط اللي كان يجيه من تدخل اخواته وكل واحد من اهل يقط كلمه طول فترة حملي الاول وصلوه لدرجه سمى بس عشان يسلم من الملامه .. يعني كانها فرض وتأديه واجب

صار اللي يبون وسمى على اسم امه واستسلمت للامر الواقع وقلت لاجل عين تكرم مدينة ويابنت زوجك يستاهل وماراح اخرب عليه فرحة اول ضنى

والحمد لله اكرمني ربي وحملت والان بدت تنعاد نفس السالفه بس هالمره يبون على اسم ابو زوجي
والله اللذي لا اله الا هو اني احي ابو زوجي واحترمه وحاشمه شيباته.. ولكن هل لو ماسميت عليه انا انتقصت من حشيمته شي؟!
ياناس انا حملت وتعبت والله يعلم شلون الوحام كان تعب تعب صرت مثل الهيكل العظمي
ولما ارتفع حملي وخف الوحام بدت مشاكل فقر الدم والدوخه وحاله .. ومن جربت الحمل تعرف معاناتي فعلاً

والحين مجرد مانجلس مع اهله يتكلمون بالموضوع ويبدون ضغوطهم ويقررون وانا جالسه مالي راي مثل التحفه
بجد حسيت نفسي فقاسه كتاكيت هههههه
والله اضحك من قهري
لدرجه وحده منهم تقول اللي يخلي زوجته تسمى هالاسم السخيفه ماهو رجااااال... وصل استفزازهم لرجوله متخيلين شلون؟
وياليت خوات زوجي معطيات مجال لاهل ازواجهن انهم يسمون بالعكس كل وحده مسميه بناتها وعيالها افضل الاسماء
يعني تناااااقض
انا مابي مشاكل مع اهل زوجي ولا ابي اخسرهم
ولكن ياعالم يانااااااس انا ام حملت وراح اجرب طلق الولاده لحالي والتربيه على ظهري اناااااا؟!
ماهو من اقل حقوقي اسمي ضناي اسم انا ارتاح له وابيه؟!

دعواتكم لي بتسهيل الولاده واني اقوم بالسلامه واشوف جنيني سليم معافى كامل الخلقه