كل من تبي تتزوج او مطلقه ادخلو وبقولكم قصة حقيقه

السلام عليكم

كيفكم ياصبايا

طبعا هالقسم من زمان وهو احب الاقسام لقلبي لانه شاركني كثير بهمومي واخزاني

ولاانسى اخواتي ودعواتهم لي الله يسعدهم ويوفقهم وين ماكانو


طبعا لي فتره انقطعت عن هالقسم لانشغالي بتجهيز العرس والعرس والان الحمل:06:

المهم دايم اشوف في بنات عندهم يأس من زواجهم وخاصة لو كانت كبيره بالعمر او المطلقات

بس اليوم جايه اقولكم قصه او اكثر حقيقه واعرف اشخاصها


المهم يابنات الاسبوع اللي راح كنت معزومه على ملكة وحده تخليو هالوحده مطلقه4مرات وكمان فيها اعاقه وعمرها بنهاية الثلاثين

وماشاءالله الان ملكت وكل واحد تملك عليه يكون منصب ووضعه اوكي ماشاءالله الله يتمم لها على خير

بس اقولكم شي عنها هي ماعمرها شالت هم انها مطلقه ولامتى بتتزوج ولاشي بالعكس ماشاءالله عليها

عايشه حياتها تروح وتجي وتشتغل وفرفوشه ولاعمري شفتها تجيب طاري الزواج او شي بالعكس عادي ولااحد

جاء يتزوج وتوها اول زواجه تقول تراني خبره 4مرات اسألوني وتضحك ودايم تقول جاء ولاماجاء مابوقف حياتي على رجل تقول هذاانا عايشه واروح واجي

وفي وحده ثانيه كمان اعرف بنتها ماشاءالله بنتها بالثانوي وعندها خوات ثاني امها تقدم لها واحد ماشاءالله اخلاق وكل شي ووضع اجتماعي مرموق قدم لها شبكة الماس بقيمة 70الف ريال

حتى خالة هالبنت تقولي انا يالبنت ماجاني واحد كذا تقول ماشاءالله مطلقه وحظها احسن مني قلت لها ارزاق قالت صح

وكمان اشترى لها بيت وسوا لعيالها غرف وشهر العسل بأوروبا طبعا البنت وخالتها تقول ربي عوض امي عن صبرها واللي شافته وامها بالثلاثين كمان:39:

الاولى ومأخذه واحد عازب والثانيه كمان تخيلو

عشان كذا اقولكم ياصبايا هذول وهم مطلقات وسبحان من رزقهم كيف البنات لاتخافو وحتى المطلقه احس تقول مااحد يبيني ولا ماادري ايش اقولكم كل هذي افكار سوداويه

بس هذول الفرق اللي بينكم وبينهم انهم مافكرو بالزواج ولاهل بيتزوجو او يكون مرغوب فيهم للزواج اما لا


وهمسه للصبايا اللي لسه ماتزوجو

من اختكم فتو اقولكم الزواج حلو ومر بس مره اكثر بيت الاهل مهما كان في مشاكل ومهما كان فيه من عيوب بيكون شي ثاني غير الزوج

صحيح في حالات صعبه ويكون الزواج لها افضل بس اتكلم عن اللي حالتهم عاديه مشاكل عاديه وهالامور اللي ممكن يومين وتروح


هذا انا طبعا اغلبكم يعرف سالفة خطيبي الاول وانها تفركشت

واني انخطبت لشخص اخر وهو اللي الحين زوجي يمكن ماطولت هالمره مثل الاول وكان بسرعه

بسبب ان الكل تعقدو من السالفه الاول وان الشي لما يطول ماله داعي

بس والله بالعكس الاول كنت اعرف كل شي هذا ماامداني اعرف كل شي غير كذا هذا هو اللي يحبني بس والله بعد الزواج جتني صدمه

شخص ثاني غير اللي كان ايام الخطبه او الملكه والحمدالله على كل حال الان اتمنيت لو قعدت وعنست ولا اللي صار فيني قالي بسوي وافعل ولقيت شي

طبعا وبالاسريه منزله مشاكلي مو كاني عروس

قبل يومي بنت وخاصة بعد فركشت موضوعي كنت بحاله نفسيه سئيه ومن اسمع بزواج احد افرح لها بس اقول متى بفرح ومتى وماادري ايش

وضيعت ايام حلوه بالكدر والتحسف والاسئله

بس تعلمت وقلت اقول لاخواتي وحبيباتي في عالم حواء عيش يومك بحلوه ومرها لاتفكري بالامس ولا بكره

انسي بفكري بإيجابيه فكري تطوري نفسك وبأشياء تفيدك تخطي كل العوائق


في اشياء كثيره ابي اقولها بس رايحه عن بالي بس لاتذكرت جيت وقلت لكم


وبالاخير بطلب منكم طلبين لان بحاجه لهم

كل من مرت واستفدات واتمنى اكون كتبت شي يفيدكم

ان تدعون لي بإني انجح بأختباري من اول مره تكفووووووووون هالاختبار مهم لي

وتدعون لي بإن الله يهون علي الحمل ويسر الولاده ويجعلها سهله

وانه يفرج همي ويصلح لي زوجي:(