كل من تعرضت للغش فى السفر تكتب وين وشلون لتعم الافاده

سلام اخواتى تونى راده من السفر وتعرضت لنصب من قبل صاحبة الشقه وحبيت اشاركم تجربتى عشان لايصير معاكم مثل ماصار معاى ,قررت اسافر مصر جارتى عرضت على تتكفل بالبحث عن شقه لى ولعائلتى لانها رايحه قبلنا وفعلا حصل بس مع الاسف دفعت كامل المبلغ اجار 15 يوم +تامين على الشقه +فلوس السمسار قلت لها ليش دفعت المبلغ بالكامل يمكن ماتعجبنا الشقه كان دفعتى اسبوع واذا عجبتنا نجدد قالت اللى حصل ,طيب احنا قاعدين 13 يوم بس شلون صاروا 15 قالت انتوا راح توصلوا 6 صباحا فلازم تاخذ قبل الساعه 12 يعتبر يوم مثل الفنادق قلنا ميخالف بس بالطلعه احنا طالعين 9 صباحا يعنى ماينحسب يوم الا بعد الساعه 12 مالقيت عندها جواب قلنا هم مو مشكله ,وصلنا الله يسلمكم الشقه ماشى حالها بس بعيده عن الشارع العام ربع ساعه مشى عشان ناخذ تاكسى بس احنا نحب المشى ,اشوف جارتى تقولى لازم تدفعين10 جنيه يوميا للبواب قلنا ميخالف ولازم تدفعين20 جنيه للشغاله بين يوم ويوم قلت لها بس انا مابى شغاله قالت هو كده تجى او ما تجى راح تدفعين 150 للشغاله قلت امرى لله خليها تجى طبعا الشغاله اجت 3 مرات وباقى الايام مريضه طبعا هى راح تاخذ الفلوس اجت والا مااجت ماشفتها الا قبل مانغادر بساعه علشان تنظف الشقه للى راح يستلم بعدنا ,اجينا للتامين والتامين معروف باى مكان بالعالم على المكسور والمسروق اتصلت بصاحبة الشقه وظلت تاخرنى لحد قبل السفر بكام ساعه وبعدين تقولى شوفى صرفتى قد ايه كهرباء وغاز وتلفون هنا انفجرت قلت لها الشقق المفروشه ياخذون من قيمة الايجار كل شىء لانه مستحيل تقدرى تعرفى شكثرصرفنا كهرباء بعدين مافى صفر دولى للتلفون والغاز غير الشاى والقهوة ماستعملنا ,والله اخذت نصف مبلغ التامين 250 جنيه بدون وجه حق يعنى هى تبى تاخذ هالمبلغ باى ثمن قلت لها حسبى الله ونعم الوكيل ,اخذوها نصيحه منى خواتى لاتخلون احد يؤجر لكم الا واثقين مته تماما قعدوا بفندق اول يومين وانتوا دوروا على راحتكم عشان تحطون شروطكم .عنوان الشقه المهندسين 3 جمعية النسر الدور الخامس شقه 22 انا حطيت العنوان علشان تاخذون حذركم والكنب او طقم الجلوس كل ما قعدنا فيه نقوم نحك بجسمنا ,ارجو من اخواتى المصريات لايزعلون منى ترى النصب موجود بكل بلد ومثل ماموجود السىء موجود الكويس ومصر فيها كثير طيبين .انا من رايى كل واحده تعرضت لغش تكتب عنه فى اى بلد بالعالم ليستفيد الجميع وحتى نعطى درس لمثل هالناس يمكن يجى يوم مايلاقون احد يسكن عندهم ,وهم يكون مرجع لكل من يريد السفر لايقع بنفس الناس اسفه طولت عليكم بس والله قصدى الافاده وسلامتكم .