كل وحدة صاحبة قلب طيب ودعوة مستجابة تدخل وتحاول تعينني بعد الله..

بسم الله الرحمن الرحيم
اليوم بحكي لكم قصتي وأنا الألم يعتصر قلبي ويكويني كوي... قصتي قصة ألم وحسرة..وما دفعني لأني أنزلها في منتدى إلا لأني أبغى الدنيا كلها تعرف قصتي عشان أكون عظة وعبرة لكل وحدة عايشة في هالدنيا على طبيعتها وما تدري إن الناس اللي حولها ذياب مستسعرة تكره الخير لغيرها وأبغى كل وحدة صاحبة قلب عطوف ودعوة مستجابة تدعيلي عسى الله يفرج عني مصيبتي ومصايب جميع المسلمين يارب..
بإختصار أنا كنت ضحية عين وسحر من أقرب الناس لي.. ورب البيت سبحانه يشهد علي لا عمري ظريت أحد ولا ظلمت أحد وأنا قاصدة..أنا خطبني واحد من أهلي فرحت وصارت الدنيا مش سايعتني من الفرح والأمل بحكم إن الشخص المتقدم لي صاحب دين وأخلاق وسمعة.. بس فرحتي ماتمت لأن أهلي كلهم دروا وإحنا ميزة عايلتنا إن فيها كثير بنات مش متزوجات لأسباب تختلف من وحدة لوحدة وأنا سني صغير وبتزوج بس الأرزاق من الله سبحانه وبالنيات ترزقون..تخيلت إني لما انخطب كل اللي حولي بيفرحون لي لكن مع الأسف لقيت بنات العايلة كلهم يحقدون ويتغيرون علي وصاروا لين شافوني كنهم شايفين شيطان هـذا كله ومابعد يتم أي شي مجرد خبر بالخطبة..وهنا بدأ مسلسل عـذابي..صرنا كل ماجينا نملك يصير حق خطيبي حادث قبل مايوصل بيتنا ونلغي كل شي أو أنا أدخل المستشفى أو الشرطة يمسكونه بتهم زايفة يطلع منها مثل الشعرة من العجين لأنه في الأساس بريء منها بشهادة رب العالمين أو يصير حق وحدة من خواتي المتزوجات مشكلة وينشغل أبوي فيها ويؤجل ارتباطي وغيرها وغيرها من هالعراقيل ليما تمت ألحين سنة وزيادة وأنا مخطوبة بالأسم بس..
المهم مابقى شيخ إلا وراحه خطيبي وشي يقول له عين وشي يقول له سحر وشي يقول له مافيك شي إلين ما جاء اليوم اللي لقينا فيه السحر فعلا في سيارة خطيبي وعلى طول وديناه لشيخ وفكه.. من الطبيعي لقينا فيه صورنا وقطع من ثيابنا وأشياء تقرف لا عالبال ولا عالخاطر..المهم فرحت وقلت ألحين بتتم الملكة لكن الفاجعة قامت تتكرر وتتكرر إن خطيبي كل ما بغى يجي نملك صار له حادث. مرة انكسرت رجوله ومرة جات في خاصرته ومرة على صدره إلى ماانتهى به الحال إلى قسطرة في قلبه الأسبوع اللي فات..أنا خلاص تعبت ومليت وكرهت حياتي وصرت أشك بكل اللي حولي لأن الشيخ رجع قالنا طالما لسه مش قادر يوصل معناها السحر تجدد..
والله العظيم مش عارفة وش أسوي أنا قاعدة انتقل من مرض لمرض وهو من حادث لحادث أخطر منه.. وربي تعبت..حاولت اتبع برنامج للرقية الشرعية وبس أبدأ فيه أعمي عنه لا أقدر أشرب ماي الزمزم ولا أتبخر ولا آكل العسل ولا أسوي أي شي..أقسم بالله تعبت تعبت تعبت ..آخر رجواي إني أدعي الله بهالليل إنه يرفع عني ما بلاني ويرفع عن خطيبي ما بلاه..قررت إني أصوم بكرة وأدعي لأني فعلا ماعاد عندي غير الله..بس أترجاكم وحدة وحدة واللي يرحم والديكم كلكم أنكم تدعون معاي وتدعون لي عسى الله يكتب لنا الشفاء على دعوة وحدة بنت حلال منكم..تكفون ادعولي من قلب صادق وبدعي إن الله يجزى كل وحدة منكم كل خير.. تكفون يا بنا ت ادعولي وبدعيلكم الله لا يحسر قلوبكم على غالي مثل ماتحسر قلبي أنا..بنات ادعوا لي لأن هاذي وصيتي وماتدرون أعيش لبكرة أو لأ عشان كذا أرفقوا بحالي وادعوا لي إن الله يتمم زواجي على خير عاجلا غير آجل ويحفظنا من كيدهم وسحرهم ويشفينا مما فينا من سقم وألم قادرعلى كل شي يارب ويرزقنا بالزريه الصالحة يارب..
جزاكم الله خير على سماع قصتي والدعوة لي..