قصه وفاه جدي رحمه الله عليه

توفى وعمره 120 تقريبا ولين اخر لحظه بحياته كان مبتسم ويضحك تعب من امور كثيره سبحان الله بسيطه بس تدهورت صحته شيئا فشيئا كان يدخل العنايه ويطلع واخر مره خرج من البيت جا ابوي يمسكه عشان ينزله السياره ويوديه المستشفى وكان شبه طايح عشان انخفض نسبه الدم عنده وكانت الدنيا شتا ولابس ثوب اسود راح نادى اخوي قال تعال يافلان روح جيبلي ثوبي الابيض مابي البس السواد ويوم جابله ثوبه ولبسه راح مسك اخوي من كتفه قاله اسمع يامحمد اذا مت لاتنساني تعال زور قبري واذا مت قول لامك واخوانك وخواتك وابوك اني احبهم وطلع من محفظته 5000 وقال عطها ابوگ بعد موتي وطلع من الباب وهو يردد زورني يامحمد لاتنساني كل البيت بكااا وصياح وكأنه حاس انه ماعاد بيرجع قعد اسبوع في العنايه كل مازاره اخوي واعمامي وهو مغمض وماهو واعي فيهم يردد بشفايفه ( الحمدلله ) كنا نجي ونبككي عنده ولا يحس فينا رحمه الله عليه قعد في العنايه لين ماصار مثل الهيكل العظمي وبينت عظام وجهه وقال الطبيب حالته حرجه

بس كان عندنا امل انه يقوم بالسلامه مثل كل مره ودق جوال ابوي بالليل عالساعه 3 وربع راح اخوي رد وقالوله تعال وقع اوراق مهمه اخوي حس ان فيه شي راح صحى ابوي وراحو دخلو غرفته في العنايه الا الممرضات يشيلون الاجهزه من عليه والدكتور يقول توفى ابوي قعد يبكي في الممرات فديت دموعه واخوي من الصدمه قعد يبكي جنبه وبلغنا بالتليفون وكل البيت بكااا وصياح اه ياذيك اللحظه ماننساها

ورحنا شفناه قبل الدفن وودعناه وكلنا حرقه وحزن من كبيرنا السن صغيرنا رحمه الله عليك ياجدي الغالي الله يرحمك ويرحم جميع موتى المسلمين ماننساك يافخر احفادك كل ماشفنا سريره وغرفته وملابسه تقطعت قلوبنا عشنا معه اجمل السنين الله يغمد روحه الجنه

الله يرحم موتانا وموت المسلمين

وعليكم السلام ورحمه الله وبركاته
انا فقدت امي وابوي الله يرحمهم ويغفرلهم
ويسكنهم فسيح جناته وكل اموات المسلمين يارب
وكل واحد منهم له قصه ما انساها ولكن امي موتها
كسرني وبقوة طلعت روحها وانا اغير ملابسها لانها
مريضه وكنت زى ظلها 8 سنوات عشتها معاها بتعبها
لين الله اخد امانته وانا اللى غسلتها وكفنتها لانها طلبت
منى هالشي وجاتنى صدمه يوم ماتت بايديني صرت
اناديها واصرخ اخويا قالي اسكتي خاف انى انهار او
اتعب وسكت وصبرت ولا دمعه نزلت من عيونى بعدها
غسلتها وكفنتها وجهزتها وودعتها وكل شي وانا ابتسم
وكانها نايمه وللان اذكر ملامحها مبتسمه الله يرحمها
ما حسيت بفراقها الا بعد شهر من وفاتها حتى بالعزاء
الناس مستغربه اني ابتسم كنت بحاله صدمه ماني حاسه
بشي والحمدلله ايام وعدت ولكن بالرغم من مرور 7 سنوات
على وفاتها ابكيها كل يوم وللحظه هذه وانا اكتب ابكي فراقها
امي وصديقتى وكل شي لي فقدتها وفقدت روحي بعدها والله
يصبرني ويصبر كل من فقد غاليه يارب .. وابوي الله يرحمه توفي
وانا 16 سنه كانت امتحانات اخر السنه وكنت بالاعدادي اختبار قران
وجالسه احفظ وابوي جالس يسمعنى وقالي اقرئي بصوت عالي وانا
رفعت صوتى وسمعنى وهو ساكت وكان يوم جمعه وقبلها بليله اصغر
اخوانى كان عمره 3 سنوات مسوين له عمليه اللوز وابوي قلقان عليه لانه
ضعيف جدآآ بس الحمدلله ابوي بعد ماسمع القران نزل السوق عشان يجيب
هديه لاخوي واخد معاه اخواني وكلهم صغار خرج وماعاد رجع تاني جانا
خبر انه مات مافي نص ساعه الا وقالوا مات امى انصدمت وكلنا انصدمنا
وكانت ايام صعبه علينا والحمدلله على كل حال ولكن مانسيتهم بيوم ولا راح
انساهم وصدقونى بعد فقدانهم ماعاد احس بالامان بالرغم انه عندي بنتى واخوانى
ربي يحفظهم لي الا انى احس انى وحيدة بدونهم موت الوالدين اصعب شي
ودائمآآ اردد اللهم زدني صبرآآ وهون على قلبي والحمدلله ..

انا ماتت بنت عمي قبل ثلاث سنوات والله احس كأنها أمس متوفيه كانت طيوبه وحبوبه والكل يحبها اخوانها خواتها امها ابوي وعمامي والجيران والكل كان يعزها
لأنها بقمة الأخلاق ماشاءالله عليها وماأنسى وقوفها معي يوم زواجي وقفت معي وقفت أم وأخت ساعدتني بكل شي بشريط الزفه اختيار الفستان الكوفيره اختيار القاعه اكسسوراتي بكل شي بكل شي وقفت معي بزفتي والله مانساها ياربي بكيتوني
تذكرتها وتذكرت سوالفها كأني اشوفها الحين قدامي
ماتت بسبب مرض ماعرفو الأطباء وش الي فيها تعذبت ف المستشفى ودايم في غرفة العمليات من عمليه في عمليه عذبوها مره يقولون الكبد مره يقولون الشرايين مره يقولون الكلى المهم ماعرفو لها ابد
تقولنا بنتها يوم وفاتها كانت وقت زياره وكانت عندها تقول جلست اسولف معاها وكانت تضحك تقول فجئه تغيرت معالم وجها صارت تناظر ف الباب تقول ..شوق ..شوفي.. اشوف ناس اول مره اشوفهم تقول ماعرفهم غرباء واخذت الشرشف تحاول تتغطى فيه تقول بنتها والله اني خفت على أمي قمت اسمي عليها وقول لها لاتخافين مافي أحد جاي تقول الا شوفي يقتربون مني شوفيهم مادري وش يبغون تقول بنتها ...شوق ..جلست مثل المهبوله مادري وش جاها امي الين ماشفتها تنتفض وتنتفض وضاق التنفس وتروح تنادي الممرضات ويجون ويعطونها صدمات القلب وحاولو يعطونها تنفس صناعي بس خلاص جاء الموت وفا يومها توقف القلب نهائي وبردت اعظائها وطلعو الممرضات سبوها وراحو وجلست بنتها تبكي بأعلى صوتها وتحضنها وتضرب فيها وتصيح يمه قومي مالي أحد غير بس خلاص مامن مجيب غير الله تقول بعدها جو الممرضات غطوها بلمفرش ومشو فيها وقلبها يتقطع... وبقى من شعرها متساقط على الأرض جلست بنتها تلملم فيه وحطته بمنديل وباقي محتفظه فيه وعيت ترميه تقول هذا الي بقى من ريحة الغاليه
يارب يرحمها ويجعل قبرها روضه من رياض الجنه
يرب وسع لها في قبرها ورحمها رحمة واسعه

ايام المدرسه كنت صف اولى ثانوي وكنت عند باب الاداره انتظر الاداريه وتجيني بنت للان مانسيت ملامحها تسالني انتي اخت نوره ؟! قلتلها ايه من انتي قالت انا اختي ريم تدرس مع اختك قلتلها تشرفنا وقعدنا نسولف شوي وراحت وبعد كم اسبوع جو خواتي يقولون ان اخت ريم ماتت اللي جت وكلمتني خلاص دمعت عيني رغم ان هذيك البنت مااعرفها ولا بيننا اي معرفه بس هالدقايق اللي سولفت معي فيها لازالت ببالي عسى الله يرحمها ويغفر لها هي وجميع موتى المسلمين