... كل وحده ساكنه مع اهل زوجها تدخل ...

السلام عليكم ورحمة الله



بحكيلكم مشكلتي وكل وحده تقولي اذا كان معي حق او لا خاصة اني مرات احس بتانيب الضمير على تفكيري:(


خطبني ولد عمتي وملكنا واتزوجنا وتم كل شئ على خير الحمدلله :icon28:

طبعا اهلي ماطلبو ولا شرط منه ابدا حتى المهر قالو له على قدرتك حنا نشتري الرجال

وانا كنت مايده هالشي ومشجعه اهلي عليه لاني ابي ربي يوفقني بحياتي مابي اسوي شروط من البدايه وهذي غلطتي اللي الحين ادفع ثمنها ..:44:

فترة الملكة زوجي عيشني باحلام وخيالات توقعت اني بعيش ملكة عنده لكن للاسف طلع كل شي مجرد كلام والسبب امه :icon33:


بالملكة سالته مره عن السكن بعد الزواج وين راح نسكن خاصة ان اهلي بمكان واهل زوجي بمكان وهو يشتغل بمكان بعيد عن اهله ..

قال مؤقتا راح نسكن عند اهلي وبس تنتهي اجازتي راح نروح ونسكن ببيت مستقل !

انبسطت انا خاصة اني احب تكون لي استقلاليتي وبيتي مع زوجي على راحتنا بدون محد ينكد علينا وكانت هذي فكرته بعد كان يقولي انا ابي اكون وحدي معاك نعيش حياتنا بعيد عن التدخلات والمشاكل من الاهل حبيت تفكيره وعرفت انه انسان فاهم


بعد الزواج سكنا عند اهله شقه عبارة عن غرفة نوم ودورة مياه :09:

كنا ننام بالجناح بس وباقي وقتنا كله عند اهله .. ماكنت ماخذه راحتي نهائيا خاصة ان عنده اخوان شباب مو متزوجين واغلب وقتهم بالبيت ماكنت اقدر اجلس او اسولف على راحتي ..
جاني زوجي مره قال اليوم ابيك تسوين الغداء قلت امر من عيوني
دخلت المطبخ وسويت لهم احلى غداء كنت ابي اعطيهم انطباع حلو عني لاني على كلام زوجي جلستنا مو مطوله ببيت اهله !
كلهم مدحوني ومدحو طبخي مرره وخاصة زوجي قال الذ طبخه ذقتها بحياتي
وزوجي دايما يمتدحني قدام امه ويقول كلام المفروض مايقوله قدامهم كنت انحرج
لاحظت نظرات امه لي كانها غارت شوي مني .. انا اوجعني قلبي عليها
قلت لزوجي لاعاد تمدحني قدام امك قال ليش قلت احسن خلها بيني وبينك مابي احد يسمع مدحك لي !!


بعدها بفترة جتني اول صدمة !!


انتهت اجازة زوجي وتفاجات انه يبي يروح لدوامه بالمدينه الثانيه بدون ماياخذني معه !

بكيت واتنرفزت وهاوشته ليش يضحك علي ويقول باخذك معي ولا اخذني

قال مؤقتا لحد ماتتحسن اوضاعي الماليه !

صبرت كان يروح كل الاسبوع ومايجي الا الخميس والجمعه طبعا مو فاضي لي ولا فاضي لطلباتي وحاجاتي ويروح هاليومين وانا ماشفته غير وقت النوم
ويمر علي الاسبوع وانا اكون بحاجته مرات اتعب واحتاج مستشفى ماعندي احد يوديني مرات احتاج اغراض من السوبر ماركت واستحي اطلب من اهله !

بالوقت اللي ماكان موجود زوجي كنت انام على راحتي واقوم متى ماابي

لاحظت ان عمتي ( ام زوجي ) مااعجبها الوضع .. قامت ترمي على كلام يجرحني بطريقة غير مباشرة

يعني تلمح باني مو سنعه واني انام كثير ومااهتم بالطبخ !
كنت انقهر واسكت واضغط على نفسي واقوم بدري واصلح لهم اكلهم وشربهم مع اني مو ملزومه فيهم انا ملزومه بزوجي وبس !

لكن تحملت وقلت مابي المشاكل دام ان جلستي مو مطوله

مرت 6 شهور على هالحاله اشوف زوجي يومين بالاسبوع وباقي الاسبوع خدامة عند اهله

اخر شي فتحت الموضوع مع زوجي وقلت له انا ماعاد استحمل هالوضع شوف لك حل
ياتاخذني معك ولا ودني لاهلي لحد ماتتحسن اوضاعك ..


قال فرجت والله انا جمعت مبلغ من راتبي بدون ماعلمك ورحت ودورت شقه تناسبنا ولقيت الحمدلله بس ابي اخذك معي تشوفينها اذا اعجبتك بستاجرها !


فررررررحت كثير وقلت الحمدلله ربي عوضني خير


راح زوجي وقال لامه هالكلام .. وانه راح يطلع خلاص ويبي يستقل بحياته
رااحت وغيرت رايه وقالت الفلوس اللي معك استفيد منها بشي ثاني انتم وضعكم حلو كذا وانت ساكن ببيت اهلك ببلاش تاكل وتشرب من احسن مايكون وش تبي بالايجار ومشاكله وبعدين تجلس هناك لحالك انت وزوجتك راح تطفش منها وهي تطفش منك خلك على وضعك احسن لك عشان تشتاق لزوجتك وماتملون من بعض !!!!

ومن هالكلام لحد ماشال الفكرة من راسه نهاااااائيا !

جاء قال لي هالكلام وهو مقتنع مليون بالميه وعارف ان كلامه مو معجبني .. ماناقشته ابدا من القهر سكتت وقلت نشوف وش اخرها ..


استمر وضعنا سنه زيادة وانا مازلت بالمطبخ وام زوجي مازالت تتحكم بحياتنا حتى بنومنا واكلنا وشربنا ..


بعد السنة زوجي جاء له نقل عند اهله فررررحت كثير وقلت الحمدلله فررجت واخيرا راح اجتمع انا وزوجي بمكان واحد !


بعد مابدا يداوم تحسن راتبه كثير الحمدلله وصار عنده قدره عالايجار

قلت له وش رايك نستاجر شقه ونطلع بيت لحالنا ابي استقل بحياتي ابي اعيش بخصوصيه ابي البس على كيفي ابي ادلعك واعيش انا وياك نبني حياتنا بدون ماحد يتدخل !

قال صدقتي انا الحين استقريت وببدا ادور لنا بيت قريب من دوامي لان مقر عمله بعيد عن اهله


طلع مره العصر مستعجل وسالته وين رايح قال مفاجاة لك :icon28:

جلست على نار انتظره

اول ماجاء كنت انا وام زوجي واخواته جالسين ونسولف

جلس معانا وقال : خلاص نبي نودعكم انا وزوجتي

كلهم سالو ليش وين بتروحون ؟؟؟

قال لقيت شقه قريبه من دوامي بستاجرها واسكن فيها ان شاء الله

انا كانت الفرحه طالعه من عيوني وهو كمان !


خواته كلهم فررررحو قالو خلاص بنصير نجيكم كل يوم ونعزمكم وتعزمونا :icon28:

امه كانت ساكته .. وقالت لي انا واخته الكبيرة روحو صلحو العشاء راح الوقت وانتم جالسات هنا طبعا حسيت انها راح تقوله شي وماتبيني اسمع .. قلت خلني اقوم احسن لي


قمت انا من الفرحه سويت كل شي اعرفه للعشاء ..


تعشينا واستانسنا وكنت طااايره من الفرح


لما جاء بالليل وجيت ابي انام فتحت موضوع الشقه مع زوجي وقلت له هاه متى اشوفها ومتى ناثث

قام يضحك :42:

قلت ليه تضحك ؟ قال شيلي الموضوع من بالك خلاص !


قلت ليش وش فيك وش غير رايك ؟

قال الحمدلله انا عايش عند اهلي ومرتاح ومابي اكون لحالي وش الحكمة من اني اطلع ببيت لحالي وهذا بيت اهلي موجود ؟؟

قلت انا مو مرتاحه وبعدين كيف تفرحني وبساعات بس تغير رايك من اثر عليك وليش انت تكذب ؟
.. عصب علي وقال لاعاد تفتحين معي موضوع البيت نهائيا هذا بيتنا رضيتي ولا روحي فيه الف وحده تتمنى تبوس جزمتي

زعلت عليه بس بدون فايده ..

قمت ابين له اني متضايقه ومو مرتاحه ماهتم لي ابدن !


شكيت لامي هاوشتني وقالت استحملي ماتضيق الا تنفرج لاتتمشكلين مع زوجك على شي مايسوى اغلب الحريم ساكنين مع اهل ازواجهم وراضين .

قلت لامي هذي غلطتكم يوم انكم ماشرطتو عليه البيت قدمتوني له على طبق من ذهب بدون اي شي وبالاخير هذا جزاي طباخه عند اهله ! :icon33:


بعدها بفترة صارت لي مشكله مع ام زوجي وزعلت وسوت سالفة طويله عريضه عالمطبخ !

السبب اني كنت اتوحم ومااحب ريحة الطبخ وكنت استفرغ لو ادخل المطبخ بس !
صرت اعلم الخدامه وش تسوي وانا اشرف عليها

زوجي تفهم هالشي مني وطلع مني تقصير وصرت مااطبخ الا نادرا لحد ماخف الوحام عني

ام زوجي ماعجبها وضعي قامت تلمح قدام زوجي ان الحريم عادي يطبخون حتى وهم فيهم وحام يستحملون هذا كله عشان زوجها ومن هالكلام

زوجي عصب مرره مني وقال ماعاد فيه مطاعم ولا خدامه تمسك الاكل انتي تسوين كل شي بنفسك !

رضخت له وقلت طيب بستحمل ريحة الطبخ عشانك وانا من داخل بنفجر من القهر !


طلبته انه نسوي لنا مطبخ صغيرون بشقتنا ونستقل لحالنا اطبخ له اللي يبي واسوي اللي اشتهيه بدون مانزل لاهله واطبخ قال اول بسال امي اذا وافقت سويت لك !!

قلت اجل سكر عالموضوع دام امك بالسالفه ؟؟

ضحك من قلللب وقال استحملي انا عارف انك مو مرتاحه لكن شسوي هذي امي
قلت امك عندها خدامه وعنده 3 بنات يطبخون لها ويسوون لها اللي تبي انا ابي اكون لحاااالي افهمني !

سكت وماصار يتقبل اني افتح معه الموضوع نهاااائيا ..

مرت الايام وحملت وتعرفون ياخواتي ان الحامل تنام كثير

انا كنت اطبخ الغداء واتغدى انا وزوجي ونطلع ننام بشقتنا ... وماننزل الا عالمغرب او العشاء

كنا كل مره ننزل تبدا ام زوجي بالتحقيق :

وينكم ؟
ليه توكم تنزلون ؟
البيت خالي ماكان فيه ناس ؟
وش هالنوم اللي يجيب المرض ؟

وحنا بالحقيقه ماكنا ننام كل هالوقت ننام ساعه وبعدها نجلس نسولف او نتقهوى عالتي في يعني نحب ناخذ راحتنا شوي مع بعض !

انا بدت تجيني حاله نفسية منها ... تععععبت ولا عاد قدرت اخذ راحتي بالبيت لا بالنوم ولا بالاكل ولا بالشرب حتى

تخيلو لدرجه نزلت 10 كيلو بـكم شهر بس !! من الحاله النفسية اللي عايشتها

مليت من مضايقاتها لنا حتى زوجي مو مرتاح ومبين عليه بس طبعا مايقولي مهما كان هذي امه
مليت من تدخلاتها بحياتي .. لدرجه تامرني على اشياء انا مابي اسويها ؟
واذا ماطعتها راحت وشيشت زوجي علي بطريقة غير مباشرة !
قامت تتدخل حتى بطلعاتنا مع بعض ؟
صرت اكره اطلع من البيت والسبب نظراتها لي بعد مارجع !



الحين يابنات بسالكم هل انا على حق لما اطلب بيت لوحدي ؟

الحين زوجي متحسف مرره يقول ليتني اقدر استقل بحياتي لوحدي ابي اعيش انا وياك بعيد عن المشاكل والكلام ...!

لكن خلاص مايقدر .. يقول مابي ازعل امي وانا عارفه ان معاه حق هذي امه مهما كان لكن المفروض تسمح له بشوية خصوصيه دام انها زوجته خلاص تستحمل انه بيكون لزوجته وعياله ولازم يستقل !!





رايكم ياخواتي وش الحل معاها ؟


ودعواتكم ربي يرزقني البيت عاجلا غير اجل


ونصيحه لكل بنت انها تتشرط على كيفها قبل الزواج خااااصة البيت



دعواتكم ياغاليات :26: