كمية طاقه سلبية مهوله ابغى حل؟

السلام عليكم ورحمة الله
كتبت هذا الموضوع ابغى حل
مامعي اخوات انتو اخواتي اشكيلكم
انا ام لطفل الله يهديه مزعج وبيتي كبير ومتعب شغله اظل طول اليوم اهتم في ترتيبه واهتم في طفلي الله يهديه
واهتم في شكلي سواء ماسكات حمامات متنوعه الخ
زوجي اغلب الوقت يكون برا البيت بحكم شغله الطويل
المهم تجيني ايام احس بأكتئاب وملل ودي اغير جو
فاروح ازور ام زوجي بحكم اننا ساكنين في نفس البيت
ابغى اغير جو واستمتع واغير جوها وتشوف حفيدها
لكن للاسف اذا جيت عندها كمية طاقه سلبيه غير طبيعيه احسها تستمتع بالطاقه السلبيه
تسولف معي عن الاخبار السيئه ومقاطع فديو تعذيب وتحزن او جرائم
تحب تستنقص في نفسها وفينا يا الي قاعدين معها
في نظرها ان الناس هم الي يملكون كل شئ احنا لا
والله ما امدح نفسي بس انا جميله الحمدلله وبناتها كل وحده فيها ميزه وهي رغم سنها جميله
بس تشوف نفسها وبناتها ويمكن انا معهم 🥴اننا اقبح الناس احنا ناقصين ماشفتو فلانه وفلانه
تغتاب في الناس وتسب الرجال الي يتزوجون على حريمهم وتقول لي الرجال مافيهم امان احس كنها تخببني على زوجي
اطلبها نصايح بحكم خبرتها عشان ولدي تقول لي انك ماشفتي شئ باقي بيطيح وينفقع راسه ويبهذلك اكثر
واذا لبست ولدي قصير قالت ليش حر لبسيه طويله واذا لبسته طويل تقول لا لبسيه قصير وانتبهي لايطيح الخ
🤯🤯🤯🤯🤯🤯🤯🤯🤯🤯🤯
اطلع من عندها احس جاني اكتئاب ووسواس ونفسيتي 👎🏻👎🏻👎🏻👎🏻👎🏻👎🏻
وطبعا هذا حالها دايم والمشكله اني دايم اجتمع معهم مالي غيرهم ايش الحل ودي في ناس يغيرون نفسيتي وطاقه ايجابيه
واذا دعت ناس معنا تدعي اخواتها وسبحان الله اخواتها نفس الطبع
احسهم يتحدون من يجيب سالفه تحزن اكثر
ويتشكون لبعض بامراضهم كل الناس تعبانين الواحد مو زين يتشكى الشكوى لغير الله مذله عادي لو بس مره مرتين لا يجلسون طول الجلسه يتشكون
انتو متخيلين انو طول الوقت واحنا جالسين كلنا هذا الفيس🙁 كاننا في عزا
حتى زوجي اذا زارها يرجعلي مهموم
ومسكين دايم مايقصر يوديهم ويجيب لهم ويخدمهم رغم دوامه المتعب بس دايم تستنقص منه حتى قدامي وانقهر عليه
قبل شوي جاني من عندها نفسيته شينه حتى كنت اخاصم ولدي صرخ علي مو على عادته احسه متضايق من شئ الله اعلم سكت وعديت الموضوع

والله اني احبها ام زوجي وودي اسعدها واسعد نفسي معها ابغى ما اطلع من عندها واحنا ماكلين لحوم الخلق وموسوسين
والله نفسيتي تعبت جد انتو عندكم ناس كذا ؟
ايش الحل تكفون؟
والله ابغى اسعدها واسعد نفسي نبغى نطلع من الجو الكئيب هذا