عادي ما ناخذ الا الاشياء المهمه مو كل السوق نقشه
300ريال بس انا وزوجي واذا نقص شي ناخذ من السوبر ماركت

عادي نقضي الفيمتو والتانج ورقائق السنبوسه والدقيق والشوربه والكريمه والجلي ولحمة السنبوسه بورقياتها شعيريه والباقي بيكون موجود من قبل رمضان والميزانيه علي حسب في اشياء نجيبها بكرتون مثل الفيمتو والتانج والرقائق والحمه وحاجات نجيبها تقاطيع والله يتقبل منا الشهر الفضيل ويجعلنا من صوامه وقوامه والمقبولين فيه

بصراحة أنا أستغرب من اللي كل رمضان لازم تشتري صواني ومقدور وملاعق !!!؟؟؟
ليش وين مواعينكم صحيح ممكن الواحد بعد كل عشر شنين يحب يغير مواعينه
أو كل سنة أو سنتين يشتري شيئ جديد لكن ماتوصل إلى أنه كل رمضان لازم أشتري مواعين خاصة !!؟؟
ممكن أقول الملاعق لأنه البعض مايهتم بالملاعق ويخليها تروح بالسفرة أو مع بقايا الأكل في سلة المجلى
لذلك أنا أفهم الشغالة أنها تنتبه لهذي النقطة لأنه لو نقص ملعقة بتكون هي المسؤلة
ولأنه ملاعقي وأغراضي غالباً غالية فلازم بعد كل مناسبة أعد الملاعق وأتأكد منها قبل لا نكب الزبالة
لأنه صعب كل شوية بروح أشتري درازن ملاعق جديدة وعندي بواقي من القديمة
حتى لو حبيت أغير حقات الضيوف عادي أحولها لإستخدامنا اليومي وأجيب جديد للضيوف من غير ماتكون ناقصة أو يتعودون الأولاد والخدم التهاون وعدم المبالاة بالممتلكات

ليش يا الغلا القمامة ؟؟!!:(
ترافيه ناس تتمنى اللقمة
حطيه بصحن بلاستيك ووديه لحراس العمارات أو السواويق
والخياطين وحقين محطات البنزين وكل العمالة يفرحون بها وتكسبين أجر ويفرج لتس ربي بسبب هالصدقة
أحسن مما تكسبين إثن برميها بالقمامة:44:

اولا ليش المواعين مالها اي داعي حنا بنفطر على الاكل مو المواعين
ثانيا احس مايزيد عن مصوف البيت الا الشي البسيط لان الدجاج واللحم موجود كل شهر
صحيح يطلع على بعض النا 2000 وزياده لاكن للي يبذرون ويطبخون الهوايل برمضان والله حرام وتبذير ليش وما يناكل منه الا شوي واتحدى الباقي تصخنونه ثاني يوم
انا عن نفسي فطوري شوربه ونوع معجنات مع سلطه ونوع حلى مع نوع عصير وبقولكم تقسيمي اللي يوفر علي كثير
مثلا الشوربه مره كويكر ومره جريش ومره قمح ومره شعيريه ومره حريره لاحضي بكذا ماستخدمت الكويكر مثلا الا مره بالاسبوع وبكذا اكيد يكفيني 4 اسابيع زياده يعني العلبه بتقعد شهر حتى لو العائله كبيره
العجين مره سمبوسه بف مره مثلثات مره سبرنق رول مره مطبق وهكذا والله ماستهلك طحين الا كيسين او 3 بالكثير
السلطله مره فتوش مره تبوله وهكذا
الحلى ياكريمه يامهلبيه عشان العيال تكفيني علبتين مهلبيه ودرزن كريمه
يعني مو لازم كل شي ينحط مره وحده والطبخ اخليه سحور
واذا بسوي لقيمات بعد الفطور بكم ساعه بعد الشغاله ماترتب المطبخ وتنظفه تصلحها مع قهوه
والله اشوف ناس عالكاشير انهم كل شي يجيبونه بالكرتون مصيبه مثل المجاعه يعني لو نقص شي السوبر ماركات كثيره