والله يا أنمار رغم إني مب متزوجة ولا مخطوبة وآسفة إني داشة عرض في السالفة سامحيني، بس والله ما هنتي علي أشوفك خايفة ومرتبكة فقلت بقولج إللي أعرفه من إللي أشوفه حوالي من خواتي وصديقاتي، لكن والله ما أحس إنه في داعي لكل هالخوف والإرتباك والله أستغرب من اللي يخافون..لأن أنا مب من النوع المتخوف والخجول يمكن لأني أعمل في مجال مختلط وتعودت على الجرأة, بس كل صديقاتي اللي تزوجوا وخواتي بعد كانوا متخوفات قبل وقالوا إن الموضوع ما يستاهل أبداً هالخوف والهم اللي كانوا شايلينه.. يعني إنتي كوني طبيعية وتصرفي عادي وأكيد بيكون في شويه خجل بس كوني أكيدة إن الله إنشالله بيسر أمورك وتمي إدعي دايما في صلاتك عشان تتيسر أمورك ، بس كل اللي أعرفه من أهلي وصديقاتي إنه يستحسن أول ليلة ما تلبسين وايد مكشوف وخلي القصير حق بعدين مهما كان بعد أحسن عشان ما تضمنين إنتي هو شو تفكيره..وأفضل شي إنتي ألحين المفروض تسألين أي حد من أهللك البنات المقربات جدا أو صديقاتج وخليهم ينصحونك في الأسئلة الثانية لأني أنا بعدني ماعندي تجربه فهالشي فمابقدر أفيدك للأسف وإنشالله البنات في المنتدي يقدرون يساعدونك..!!!

وبالنسبة للحمام المغربي في وايد مواضيع هنا في المنتدي في ركن البشرة بتشوفينه إذا سويتي بحث..وبالنسبة للغسول هذا وايد زين أعرف بنات مستعملينه وكان أوكيه..بس أهم شي إنتي ألحين لا تفكرين وايد..عشان التفكيروالضغط النفسي يطلع حبوب في الوجه وإنتي ماشالله عروس فحاولي تحافظين على نفسيتك...والله ييسر أمورج يارب!!!

الله يوفقج انشاءالله وانا اشوف انج تسوين حمام مغربي في الاسبوع مره الى يوم العرس وبالنسبه ااى اللبس افضل تلبسين اللون الابيض والطويل اللي يعطيج نوع من الطفووله وشكل البراءه وبعدين انتي راح تندمجين معاه سبحان الله وكوني هاديه ولا تكونين انتي الباديه في اي شي حاولي انج تكونين بريئه في تعاملج معاااااااااااه ومبرووك :27:

انا وحده متزوجه لي سنه ونصف نصف خجوله مهوب مره خطبني واحد ماشفته وما كلمته طول الخطوبه والملكه وماشافني لاني مريت بظروف صعبه هذيك الفتره امتحانات وكل ما حدد يوم وجا للبيت صار فيه ظرف وراح وما شافني بس كنت ما افكر كثير بالمواضيع الدقيقه بس اخذ فكره عنها وجا اليوم الموعود توكلت على الله وسارت الامور بكل بساطه اول ماشفته تقرقع قلبي وطاح ابطني بس الصراحه ارتحتله واخذني وانا ساكته يسالني ارد على قد السؤال بس انصحك ابتسمي دايما بس ما تطلع اسنانك خليه كل ما شافك ولاك مبتسمه وبالنسبه للشي الثاني خليك على طبيعتك ولاتشدين نفسك لان اذا شديتي نفسك تتعقد الامور شوي موكثير وبالنسبه للبس انا اول يوم دخلت الغرفه جلست على الكرسي قعد يسولف علي وقال لي منتيب مغيره طلع من الغرفه غيرت فستاني ولبست قميص ابيض طويل ومعاه روبه وسارت الا مور على ما يرام سبحان الله ينزل عليك سكينه كنك معاه من زمان الله يوفقك ويسهل عليك كل صعب مع انه مو صعب ابد مدامك متوكله على الله بس انتي مصعبته عليك والسلام :24: :24: :24:

مبروك يا عزيزتي وبالتوفيق

ليه الخوف يا عيوني :27: الله راح يسهل الامور انشاء الله اهم شي بالفتره هذي ركزي على اهتمامك ببشرتك وبوجهك وشعرك يعني لا تكثري ولا تقللي خير الامور الوسط

اعملي سنفره لجسمك بزيت الزيتون والسكر حتى انه يصلح للوجه كمان افركي جسمك بالليمون بعد دهنه بزيت الزيتون قبل كل حمام بساعه تقريبا انا كنت اعمل كذا وراح تحسي بفرق نعمومه وصفاء للجسم

هدي نفسك ولا تفكري بليلة الدخله لانه الشي هذا بالذات يصعب التفكير والتدبير له الامور راح تصير عفويه وهادئه باذن الله
لا تشدي نفسك ولا تتوتري ماله داعي لكل هذا صدقيني انتي عروس خلي الفرح في عيونك وابتسامك وعسى الله انه يتمم لك ويبعد عنك اولاد الحرام

بالنسبه لقميص ليلة العرس اختاري الناعم والبسيط واللي تحسي انك راح ترتاحي فيه ولا راح تخجلي منه خليكي بطبيعتك لا تتصنعي شي ما هو فيكي وبالنسبه للاشياء الثانيه صدقيني واح تلاقي نفسك انتي اللي تختاري الوقت المناسب للبسها

بالنسبه للرائحه اللي تعانين منها حاليا زي ما قالو لك البنات الله يجزاهم خير فيه غسول وفيه مطهرات

اذا كنتي متخوفه من الغسولات استعملي منقوع الميراميه بعد دخولك للحمام واشطفي جسمك فيه وحاولي تبتعدي عن الملابس الداخليه الضيقه والمصنوعه من النايلون والبوليستر

الحمام المغربي حلو والاحلى منه الحناء +اي زيت تخليها على جسمك وبعدين تفريكه وتتحممي

وفقك الله ورعاكي وانزل السكينه في قلبكي انشاء الله تعالى

اختك

عذبة السجايا