يابنات اكيد كثير منكم عندها مشكله مع الكنافه وانا كنت مثلكم لكن بفضل الله وكثرة التجارب صار عندي كذا طريقه كل وحده احلى من الثانيه
اليوم ابعطيكم طريقة لذيذه جدااا وسهله بنفس الوقت
اولا مطلوب شعر كنافه وانا افضل كنافة الدانوب اللي بكيس
تجمدينها وبعدين تفرمينها بفرامة البصل واذا كثيره ممكن تستخدمين نص الكميه فقط
تضيفين لها حوالي نص كوب زبده مذوبه على حمام مائي او اقل شوي
تدهنين صينية حلواني او اي صينيه متوسطه بالزيت وهالخطوة مهمه لاتقولين فيها زبده وخلاص لااازم تدهنين الصينيه علشان تتحمر تمام من تحت بعدين تفردين ثلثين الكميه تقريبا افرديها تمام ولا تبالغين في كبسها مانبي كنافه مره رفيعه وقاسيه اوك
نجي للحشوه
حشوتي اليوم عباره عن
٦ قطع كيري
علبة قشطه بوك
علبة قشطه الصافي
ربع علبه حليب مكثف محلى
اخلطيها بالخلاط وصبيها طبعا بتكون سايله شوي لكن لاتخافين بتتماسك وتصير تمام
الحين رشي باقي الكنافه وحاولي يغطي بس مو مشكله لو في فراغات صغيره ولا تكبسي بس طبطبي على خفيف
دخليها الفرن من تحت وتكونين مسخنته من قبل بالنسبه لي فرني كهربائي اضبط درجة الحراره على ٢٠٠ بدون مروحه واتركها حوالي نص ساعه في الرف الوسط او تحت مع المراقبه
بعدها حمريها من فوق تمام واسقيها الشيره تكونين مجهزتها ومبردتها من اول ولاتنسين انك اضفتي حليب محلى فلا تبالغين في الشيره اذا تحبين الحلا يكون وسط
اخر شي رشيها بفستق مبشور او المكسرات اللي تحبين واتركيها تبرد برا الثلاجه واستمتعي بأحلى كنافه واذكريني بدعوه
ان الله يحفظ اولادي ويبارك فيهم ويشفي ولدي شفاء لايغادر سقما
اترككم مع الصور اذا تحملت معاي
تسلم ايدك. مرررره تشهي
الله يعطيك العافيه 💕💕