كنا صديقات!!

السلام عليكم ورحمة الله وبركاته ..

وش أخباركم جميعاً ؟ إن شاء الله بخير وصحه وعافيه ..

الله يوفق ويسعد الجميع ويحقق لكم أمنياتكم وأحلامكم ..ماراح أتكلم عن مقدار حبي لكم لأني ماراح أوفيكم حقكم الله يخلي لنا هالمنتدى الرائع

والله كنت قبل أحوس بقوقل وأدخل بمواقع مش ولابد بحجة تضييع وتقطيع الوقت بس بعد ماعرفت هالموقع والله نسيت كل المواقع وكل شيء ولله الحمد >>مبسوطه من نفسي

عندي موضوع أتمنى يعجبكم وأتمنى مايكون مكرر ..
أكيد كل وحده منا عاشرت وصادقت وعزت وحبت وأخلصت وتمنت هالعلاقه تدوم للأبد خصوصاً لو كانت صديقتك بالمرحله الدراسيه وتمر الأيام ويجي يوم خلاص بتودعينها وتقول لك وش دعوى يافلانه أصلاً من قال لك بنفترق !!
حنا علاقتنا غير وحنا بتستمر علاقتنا وماراح ننقطع أبد ومن الكلام الزين وتفترقون عاد بأجسادكم لكن قلوبكم مع بعض والعلاقه أول ماافترقتوا أوكي فيه اتصالات وفيه سواليف وكل يوم عن يوم تقل العلاقه إلى أن تصل يوم وتنقطع خلااص ماتعرفين عنها شيء علاقتك فيها تصير مجرد اسم مسجل بجوالك !!

موضوعي اليوم أبي كل وحده منكم توجه كلمة عتاب لصديقاتها ويمكن بسبب هالشيء انقطعت علاقتك معهم فضفضوا أكتبوا كل شيء ..يمكن صديقتك تزوجت وخلتك وعاد اصبري متى تروح الطفه وتفضى لك بعد سنه أو سنتين ..
أغلب صديقاتي أيام المتوسط والثانوي بيننا بس تهاني بالعيد فقط لاغير وأحياناً مايرسلون هذي علاقتنا ..إلا وحده وفيه الله يجزاها خير هي اللي علاقتي معها حلوه أما الباقي مدري عنهم أحسهم إذا جوا يعايدون وشافوا أسمي بقائمة الأسامي ارسلوا وأحياناً مايرسلون

عندي سؤال بفهم ليه الصداقه تكون بمرحله معينه من عمرك وتنسين اللي عرفتيهم ياناس هذي عشرة عمر !! تصادقين وحده طول فترة الجامعه أربع أو خمس سنين تطلع من الجامعه تمسحك من عالمها !! الله يعطيني قلب مثلهم وأصير مثلهم.. ماتهتم لأخبارك ولا شيء ولايهمها وش بتسوين بمستقبلك وين بتروحين وش تخطيطك عشان نتفق ونعاون بعض ونساعد بعض ونشجع بعض أكيد كل وحده لها تخطيط وأكيد بحفزها وأشجعها وأساعدها .. صح أنهم يتصلون بس الكلام كله السلام عليكم وش أخبارك وكم كلمه وبعدها مع السلامه تحسينها بس تأدي واجب موب متحمسه تكلمك !! كنت دايم متى مافضيت أدخل المسن أنتظرهم يدخلون أبي أشوفهم أسمع أخبارهم !!
بس محد يدخل يقولون مشغولين استغرب إلى هالدرجه الشغل يمنعنك تدخلين ؟ قبل فترة الدراسه والامتحانات كل العالم تدخل مسن وتسولف معك الحين يوم مافيه دراسه انشغلتي أكثر ..الحين تحسبوني أبيهم يدخلون كل يوم ولا كل أسبوع لا والله موب طماعه أنا أبي ع الأقل مره كل شهرين أو 3 شهور متى ماقدرت ..
وحده من صديقاتي كانت دايم تقول لي أصلاً ماراح أتوظف من دونك أصلاً ماراح أتركك أصلاًَ مدري وشو وتقول أنا قايله لأهلي ماراح أتوظف من غير دنيا (( اللي هي أنا)) من كلامها هذا كل أحلامي وتخطيطاتي للمستقبل
تكون معي هي بالصوره أي شيء يجي ببالي أقول أنا وفلانه وفلانه آخر شيء أسولف معها وأدري أنها مقدمه أكثر من مكان صراحه انصدمت والله قلت بحسن الظن فيها وأكيد لو لقت بتقول تعالي معي آخر شيء تسألني أنتي وش سويتي؟
وموقف ثاني كنت أنتظر اليوم اللي تجي فيه للجامعه تأخذ وثيقتها والله ماتدورن مقدار حماسي وشوقي قلت حلو أكيد بقابلها آخر شيء تروح وتأخذها ولاتعلمني ؟؟ ضاااق صدري كنت متحمسه لليوم اللي بشوفها فيه
الله يسامحها بس وقسم بكيت حسيت بشعور غريب استحقرت نفسي منقهره من صديقاتي يقدمون ويخططون وكل وحده تفكر بنفسها أنا لو أشوف شيء ارسل لهم واعلمهم أبيهم معي أدري أنهم يبوني معهم بس ليش مايقولون لي حز بخاطري كثيررر :44:
معليش فضفضت لكم من قهري ومنقهره من نفسي وتصرفاتي بس إن شاء الله بعاملهم بالمثل بكيييييييييفهم والله صراحه انرحم تصدقون عاد مجمعه طرق حلى وكيكات وموالح وخرابيط تدورن ليه ؟
متحمسه أعزمهم وهم مادروا عني ..
هذي كلمة عتااب لصديقاتي الله يحفظهم وين ماكانوا ويسعدهم ..للأسف ماقدرت أوصلهم لهم فاعتبروها مجرد فضفضه أخاف أقولهم يصلحون معي زي ماأبغى بس أنا ماأبي شيء من ورى قلوبهم ولا ماودي أبلش أحد فيني ..
والآن دوركم كلمة عتاب توجهينها لصديقاتك !!