عنقاء. :

السلام عليكم ورحمه الله وبركاته اخواتى وحبيباتى فى الله .. كل عام وانتم بألف خير وسعاده يارب كنت عاوزه اسئلكم سؤال .. امتى حسيتى ان ربنا حاسس بيكى  امتى بكيتى من قلبك وسئلتى ربنا شئ واجابك طيب امتى كلمتى ربنا وحسيتى ان سمعك امتى بقى ربنا بعتلك اشاره تعرفك انه سامعك وحاسس بيكى وبيحبك  ساعات كتير بنبقى مخنوقين وبندعى ربنا او بنشكيله ونفسنا نحس انه معانا وحاسس بينا وفجأه ربنا يبعت لنا اشاره تعرفنا انه سامعنا وراضى عنا وبتبقى الاشارات دى احلى حاجه حصلت لنا وبنفضل فاكرينها مهما العمر جرى هحكيلكم على حاجات حصلت معايا زمان سمعت حلقه للدكتور عمرو خالد بس مش فاكره اى حلقه بالظبط وكنت ساعتها تقريبا فى ثانوى وقال ( ليه متجربش فى مره ان تتكلم مع ربنا وتقوله يارب لو راضى عنى ابعت لى اشاره تعرفنى بيها انك راضى عنى ولو انا يارب مزعلك فى حاجه او غلطان فى حاجه ابعت لى اشاره تعرفنى غلطى لانى بحبك يارب ونفسى تبقى راضى عنى )  وقتها الدكتور عمرو قال ليه منجربش فى يوم اننا نطلب من ربنا انه يبعت لنا اشاره تعرفنا انه راضى عننا وقتها بصراحه استغربت اوى وقولت يعنى ربنا فعلا هيرد علينا ويعرفنا انه راضى عننا ولا لا وقتها كان ضايع منى قلم كان عزيز عندى اوى وقلبت الدنيا مش لاقياه خالص فقولت خلاص انا هجرب اسئل ربنا زى ماسمعت واجرب وقلت له يارب انا عارفه انى مقصره فى حاجات كتير بس انا يارب بحبك اوى ونفسى تبقى راضى عنى . يارب لو انت راضى عنى ابعت لى اشاره تعرفنى بيها انك راضى عنى علشان انا كمان قلبى يطمن واحس انك سامعنى وحاسس بيا اقسم بربى يابنات انى دعيت وماكان جوايا اى احتمال ان ربنا هيرد عليا وان ربنا اللى خلق العالم كله هيسمع منى انا من وسط ملايين بيدعو له ونمت فعلا يوميها وحلمت بنفسى انى بذاكر وحطيت القلم جوا كتاب الكيميا وحطيت الكتاب فى درج التسريحه اللى اوضه نوم ماما ونسيت انه فى المكان دا صحيت من النوم وانا فاكره الحلم بالظبط قومت جريت من على السرير وانا قلبى بيقول يارب يطلع الحلم صح  وجربت على اوضه ماما وفتحت درج التسريحه وقلبت الكتب لحد ما لقيت كتاب الكيميا وبفتح الصفحه اللى شفتها فى الحلم لقيت القلم !!! ورب الكعبه انى فضلت حضنا القلم وببوس فيه زى ماكون لقيت مليون جنيه ايه دا !!! يعنى ربنا كان سامعنى وحاسس بيا وبيحبنى اوى كدا واستجاب لطلبى ودعائى وبعت لى اشاره تعرفنى انه بيحبنى وبعت لى الاشراه فى الحاجه اللى ضايعه منى علشان عارف انى بحبها ياااااااااااااااه دا انا على كدا حاجه كبيره عند ربنا طيب ازاى استقل نفسى بقى مع الخلايق ورب الخلايق مقدرنى انا مش هقد ر اوصف مدى سعادتى لو كتبت مليون صفحه بس اكيد انتوا لو حطيتوا نفسكوا مكانى هتحسوا باللى بحاول اوصفه  ومره تانيه كنت بعدت اوى عن ربنا ومبقتش مواظبه فى الصلاه ومبقتش احفظ قران زى ماكنت وحسيت ان ربنا غضبان عليا وانى مخنوقه وربنا خلاص مبقاش يحبنى . وقتها كنا بنوضب الشقه اللى قاعدين فيها ونقلنا عفشنا كله لشقه تانيه ولما وبعدين رجعنا عفشنا تانى وفى وسط التنقلات دى ضاع منى الحلق بتاعى وزعلت اوى اوى على الحلق علشان هديه من ماما وزعلت علشان ماما هتزعل لانه غالى ومش معاها فلوس تجيبلى غيره وطبعا طبعا مستحيييييييييل الاقيه فى وسط كل التنقلات دى وهوا كمان واقع من ايدى فى وسط العفش والهدوم يعنى بكل بساطه لو شيلت الهدوم حته حته بردو مش هلاقيه  فقولت انا هجرب اسأل ربنا تانى زى ماحصل مع القلم واشوف هل فعلا ربنا خلاص غصب عليا ولالا ووقفت اكنس السلم بتاعنا وقولتله يارب انا عارفه انى مقصره اوى وعارفه انى بعدت عنك اوى بس يارب انا بحبك وندامانه انى مزعلاك وانت يارب الغفور وانت اقرب ليا من الدنيا كلها لو سابتنى يارب هروح لمين محدش بيحس بيا غيرك خلاص يارب مبقتش عاوزنى وبمقتش عاوز تقربنى ليك . يارب لو انت لسه عاوزنى ابعت لى شاره تعرفنى انك عاوزنى وانك لسه بتحبنى ومش غضبان عليا والله ياجماعه كنت وانا بدعى كنت بدعى بصدق اوى وباحساس يقينى ان ربنا سامعنى وحاسس بيا  ورب الكعبه وانا لسه بدعى وماسكه المقشه بكنس لقيت الحلق بتاعى قدام عينى على السلم والله العظيم مابكدب عليكم لدرجه ان من صدمتى مسكت الحلق وطلعت فى شقه لوحدى كانت فاضيه فى عمارتنا وقعدت اعيط عياط هستيرى واقوله يارب للدرجه دى انت قريب منى وللدرجه دى رغم تقصيرى انت لسه عاوزنى قد ايه انا حاجه صغيره اوى قدام رحمتك  ياجماعه انا اتعلمت المناجاه دى من الدكتوره عمرو خالد الله يجازيه خير ولحد دلوقتى رغم تقصيرى الشديد لكن لسه بناجى ربنا لعل وعسى يرد عليا . ياريت تجبروها اصل مفيش اقرب منه لينا ولا احن منه علينا دا احن من الام على رضيعها  جربوا تناجوا ربنا فى جوف الليل وتقولوله كل اللى انتوا عاوزين تقولوه واطلبوا منه اشاره باى حاجه انتوا عاوزينها واصبروا ولحوا فى الدعاء اوى من شروط اجابه الدعاء انه تدعى بثقه شديده فى الاجابه زى ماوصفوا زمان وقالوا كانك غرقان ومفيش غير حته خشبه صغيره انت متعلق بيها ومفيش قدامك غير الدعاء شوفوا لو انتوا غرقانين هتدعوا ربنا ازاى انه ينجيكم وبنفس الشكل ادعوا ربنا اوى وبألحاح اوى وثقه فى ربنا انه هيستجاب اصل ربنا مش بيمل من الدعاء واعرفوا انه قريب اوى اوى مننا فارجوكم افكركم وافكر نفسى اننا نخجل لما نيجى نعصى ربنا او نتجاهل وجوده او انه قريب مننا لسه عندى مواقف كتير .. بس اتمنى تشاركونى بتجربه حصلت معاكم وحسيتوا انه ربنا قريب اوى منكم  وانا منتظره تجاربكم علشان نشجع بعض ونحس بربنا اوى ونتعلم لذه مناجاه ربنا والاحساس بقربه  وياريت تجربوا تدعوا ربنا انه يبعت لكم اشاره باللى تحبوه واللى يجربها وتنفع معاه ياريت ييجى يحكيلنا وكلنا منتظرين . لو الموضوع عجبكم ياريت تقيموه يمكن يوصل لحد يفيده ويقربه من ربنا ويارب يارب يبقى صدقه جاريه لينا كلنا ..

السلام عليكم ورحمه الله وبركاته اخواتى وحبيباتى فى الله...

+ ام ادم :

موفقة

موفقة