كنت هنا مع والدي...(٢)

السلام عليكم ورحمة الله وبركاته

زرت مدائن صالح وأنا عمري ١٠ سنوات.

وأتذكر أحداث هذي الزياره بالتفصيل .

أبوي الله يرحمه كان يعرف تاريخها
ومحتوياتها ومعاني بعض النقوش
والرسومات المكتوبه والكثيره جدًا.

بس حنا كأطفال ما كنا نهتم
لهذي الأمور أبدًا.

أتذكر كيف كنا مبهورين بهذي الأشياء
الي نشوفها.
الجبال من برى عليها نقوش ورسومات
ومنحوتات على شكل صقور
ووجوه ورموز غريبه.
هي عباره عن مقابر محفوره
بأشكال طوليه ويسمونها قصور.
كل كتله صخريه كبيره إسمها قصر.

وتكون خاصه بالعوائل الموجوده ذاك الوقت.

المنطقه حاره جدًا جدُا تقع شمال العلا
ويوم رحنالها كان فصل الصيف
فأجتعت حرارة الفصل مع حرارة
الرمال والصخور.

ماكان فيه أسوار من زمان يعني
عادي الناس تجي بالسياره لين عند
هذي الجبال.

وقفنا الكرفانات قريب من الآثار
لكن كنا لازم نمشي من قصر لقصر
في ذاك الجو الحااار.

وأتذكر شعوري أول مادخلت أول مقبره
ولقيتها بارده بشكل محد يصدقه!
كيف برى لهيييب
وبخطوه وحده للداخل يصير الجو
بهذي البروده العجيبه!

هذي الأجواء من حر لبرد تكررت علي
في البتراء الأردن وجبل قاره في الأحساء
وقلاع ألمانيا .

لكن في مدائن صالح كنا صغار
ومبهورين بكل شي!
والحقيقه إنه بالفعل شي عجيب
وجميل ومحير.

أتذكر كان معنا رمان أنا وأخواني
وجلسنا في وحده من القصور
بجنب القبور ونقشر ونآكل🙄

من الذكريات في ذاك اليوم
والي مستحيل أنساها
كان أصغر أخواني عمره سنه
وأمي الله يشفيها حاطته في
كرسي الأطفال على الفراش
ورايحه تتمشى معنا.

ماكنا بعيد عنه بس مانا حوله مره.
كانت معنا أمي الكبيره
(جدتي) الله يرحمها
وأتذكر كانت تصلي العصر وفجأه
سمعناها تصارخ وتنادي
أبوي الله يرحمه💔💔

راح أبوي وأخواني الكبار يركضون
لين فيه حيه سوداء يمكن طولها مترين
وقريبه من كرسي أخوي الصغير😭😭😭
شال واحد من أخواني الكرسي
وأبوي كان معاه مسدس طلعه
وسمى بالرحمن وقتل الحيه😵‍💫

مشهد قدامي ما أنساه
بكا أمي وصراخنا وخوفنا .

هذي معرفتي بهذي المنطقه
وأنا عمري عشر سنوات.
معرف عنها أي تاريخ ولا حكايه
ولا روايه.
لكن لما زرتها للمره الثانيه
برضه مع أبوي الله يرحمه
كنت أعرف معنى كل شي أشوفه.
معنى النقوش معنى الكتابات
معنى الرموز.المنطقه نفسها أعرفها
وأعرف تاريخها والخلاف الي دار حولها.