هذي طريقتي بالكنافه واسويها كل ماجانا ضيوف تكون مرتبه بالشكل والطعم مايحتاج ..
المقادير :
كيس كنافه كامل ( انا استخدم كنافة غوار تجي طازجه وحاااااااره ماشاء الله ) .
كاسه زبده سايحه او نص كاس زبده ونص سمن .. مثل ماتحبين .
علبه حليب بوني حق الشاي .
مقادير الحشوه :
علبتين قشطه
3 اكواب حليب سايل .
قشر برتقال ( انا اجففه واحتفظ فيه لوقت الحاجه ) وتقدرين تحطين فانيليا .
4الى 5 ملاعق سميد ناعم واذا مافي تقدرين خشن .
ثلاث ارباع كوب سكر .
الطريقه :
تحطين الكنافه بمحضرة الطعام وتنعمينها شوي بس مو كثير عشان اذا نعمتيها مره راح تتفكك معاك بعد التحمير
بعدين تحطين عليه الزبده او السمن المذوبه وتفركينهم سوا
بعدين تحطين عليه حليب بوني وتفركينه وتخلينه على جنب لين مانجهز الحشوه
الحين نحط الحليب على النار وفوقه السكر وفوقه قشر البرتقال ونتركهم لين يغلي الحليب
الحين اضفناله السميد وحركناه لين ثقل شوي صال مثل ثقل المهلبيه ونطفي النار ونخليه يبرد 3 دقايق بس
بعدين نضيف عليه القشطه ونحركه وبكذا نكون انتهينا من الحشوه
نبطن قوالب الكب كيك بالكنافه من تحت وعلى الحواف
وكذا يكون سوينا القالب كامل 12 حبه
نحط الحشوه ملعقه طعام ونص تقريبا في كل حبه
باقي يابنات لا تردووووووووووووووون رجاااااااء .
وندخلها الفرن ساخن من قبل على درجة 150 ونحمرها من فوق وتحت وهذا شكلها بعد ماتحمرت
وهذا شكلها النهائي يمممممي ، طبعا بعد ماسقيناها بشيره خفيفه بارده ، كل ضيف تقدمين حبه بس انا اخذت صوره جماعيه
وصوره ثانيه واعذروني على الحوسه
وهذا صينية كنافه كبيره بنفس الطريقه
تحطين كنافه بقاع صينية الباي او فطيرة التفاح وتحطين فوقها الحشوه
بعدين تغطينها بطبقه ثانيه من الكنافه
وتدخلينها الفرن فوق وتحت وهذا شكلها بعد التحمير
وهذا شكلها النهائي بعد ماسقيناها بالشيره البارده