كهلة ابليس

بنات والله ندمت اني رحت
ما كنت ناويه احضر
كنت عارفه ان الجو مشحون
بعد المشكله اللي صارت بيني وبين ام زوجي
ورغم ان اللي صار كان ظلم بحقي
الا اني ولأجل راحه زوجي
دست على نفسي
وكبرت عقلي واعتذرت
وقلت خليني امشي الامور ما ابي مشاكل
وبرضه كلامكم شجعني اني اروح المهم وصلت وجلست وكل شي كان طبيعي
او خلينا نقول كنت احاول اكون طبيعيه
بس ام زوجي كعادتها لازم ترمي كلمه
لازم تغرس سهم كأنها تختبر صبري
وانا اطنش اتجاهل لين قالت كنت بزوج فلان "زوجي" بوحده للحين اتحسر عليها
لكن ولدي عيا يبي ياخذ من ناس على قدهم تدرون وش معنى كلامها “ناس على قدهم” معناها انتقاص تقليل كأنها تقول ان زواج ولدها مني كان نزول مستوى بس سكت قلت لنفسي عدّيها رغم ان كلامها قوي لكن تجاهلته لكن فيه ناس لما تسكت لهم يظنونك ضعيف قامت التفتت على جارتها وقالت “كنت بعزم امها بس امها معقده نفسيا ومجنونه وتاخذ حبوب نفسيه وتنام من بدري عشان كذا ماعزمتها” لا هنا الوقفه هنا الحد رفعت عيني وطالعت فيها لا مجامله ولا كذب وقلت بكل وضوح “يا عمه لو سمحتي امي مو مريضه نفسيا ولا معقده ولامجنونه واتمنى ما تجيبين سيرتها بهالشكل وتتكلمين من وراها” ردت بكل استهزاء وبكل وقاحه ترى ما جبت شي من عندي” قلت لها انا عندي حدود وحدود الاحترام عندي تبدأ وتنتهي عند امي فلو سمحتي لاتجيبين طاريها!!! بناتها كانوا يحاولون يغيرون السالفه ويهدون الوضع انا حسيت المكان صار اضيق من اني اتنفس فيه
رفعت جوالي دقيت على زوجي وقلت له تعال خذني الحين ركبت السياره وانا احس بقلبي يغلي لما حكيت له قال لي “وبعدين معاك؟ كل يوم مشكله مع امي! ليش حريم اخواني كلهم يحبونها ولا وحده اشتكت؟” قلت له انا ما ارضى على امي ولا اسمح لاحد يقلل منها قدامي رد وهو متنرفز “طيب وانتي ليه تخلين كل شي يصير مشكله؟ ما تقدرين تطنشين؟ ترا هذي امي وما في ام تكره زوجة ولدها بدون سبب” قلت له اذا احد غلط على امك بتسكت؟ وقتها هو سكت و عرف انه ما عنده رد لأنه يدري لو احد مس امه بكلمه كان قامت الدنيا عنده وما قعدت قالي بعدها “اذا فعلاً صار هالكلام انا بكلمها ما تتعرض لك مره ثانيه وترى انتي حامل وتكبرينها” قلت له “انا ما عاد بطب بيت اهلك” قالي سوي الي تبين تسوينهبس انا جلست اتكلم قهرني قالي لي
تلايطي وهبي لش شحمه كبر راسش
والموضوع انتهى على كذا لكن حسبي الله ونعم الوكيل والله يمهل ولا يهمل