(كوني سعيدة )أشياء اشوف سعادتي فيها .. بعد انتظامي على الصلاة والدعاء والقرب من الله

السلام عليكم ورحمة الله وبركاته
تذكرون بنات قبل فترة كنت اشوف الدنيا سوداء حيل ومذنبة والحمدلله ربي من علي بالتوبة
والحين صرت اشوفها خضراء وبألوان ربيعية جميلة.. لما نحاوط حياتنا بالذكر والاستغفار وقراءة القران فعلا شفت السعادة الحقيقة
واهمها كل من شافني يقول وجهك منور ماشاء الله راحة بكل شي يارب لك الحمد رغم وجود المنغصات امشيها بكلمة ( الدنيا ماتستاهل وامضي وانا مبتسمة )
انا من زمان فيني طبع التنظيم والابتكار وافكر بأفكار حلوة للبيت
سبحان الله ربي عطاني طاقة ماشاء الله خلتني انفض البيت نفض قلت بما انكم تفيدوني افيدكم ويمكن يكون بيننا عروسات نفيدهم وحتى ربات البيوت اعطيهم شوية طاقة
اول شي تخلصت من كل شي مابيه من البيت وكتبت قائمة طويلة من أبو ريالين ( عشقي هالمحلات) وجددت النواقص بأرخص سعر واجمل شكل
وحتى للضيوف صرت انبسط لاجانا احد اتفنن بالكاسات والتقديمات بشي بسيط لكن مرتب ويواجه ويناسب قدر الضيفة
كل شي احب انظمه واعطيه قيمته مثلا سجادات الصلاة مرتبة ومعطرة وجاهزة دورات المياه الله يكرمكم تكون جاهزة بالمناديل بالصابون ولي ساعه معينة مثلا ع الساعه 5 المغرب كل شي يكون جاهز الشاهي القهوة شي حالي مالح شموع معطر مكان تهويته واضاءته جيدة اي شي بحيث ان جاني احد فجأة يكون كلش مرتب وحتى لأهل بيتي امي ابوي اخواني خواتي هالكلام قبل لايكون للضيوف لهم ايضا اسعدهم واكسب دعوة حلوة
احب دوريات الحريم وجمعات الجيران عشان أريح امي وابيض وجهها قدامهم وفرصة اتفنن بالشي اللي احبه
وانا ابرمج نفسي لهالشي عشان اكون كذا مع زوجي مستقبلا واهل زوجيسبحان الله لاصار كل شي حولك نظيف ومرتب تحسين بطاقة حلوة وسعادة
نصيحة أخيرة شيلي من قلبك كل حقد وحسد وكوني من داخلك سعيدة وعيشي حياتك ولاتنتظرين بكرا أبد وكوني قدوة حلوة لمن خلفك
انا ماذقت هالسعادة الا لمن تقربت لربي اكثر
بالنسبة لي اشوف سعادتي بهالاشياء والاهم ربي راضي عني وأهلي كذلك
شوفي مواطن السعادة وين عندك وغيري من نفسك وكوني سعيدة حتى لو نغص احد عيشتك طنشي ولا كن قالها لك احد
وبفترة حيل بسيطة بتشوفين كل شي طاهر فيك .. ربي راضي عنكبيتك طاهر انتي نفسك طاهرة من داخل قبل الخارج كلن يحبك جوالك نظيف من الكلام البذي ومن كل شي يغضب الله
عيشي الحياة لأجل رضا الله والجنة