السلام عليكم ...
الموضوع هذا وليد اللحظة ولا كتبته قبل في الورود وعدلته الحين قاعدة اكتبة لكم
الله يعينكم على الحوسة على الله تفهمون خخخخخخخخ
كثير أدخل هالقسم وقليل ما أشارك فيه بكتابة المواضيع ..
كلامي مبعثر شوي ويمكن راح اتكلم في كذا موضوع في وقت واحد :35:
أستغرب كثير من بعض المشاكل الي ماتستحق انك تفتحين كتابة موضوع عشانه..
احس يابنات ان حنا اذكياء وعندنا مقدرة هائلة على حل المشكلات ..
وبدل ماتدخلين عالم حواء وتضغطين على زر كتابة موضوع وتنزلين الموضوع في الوقت هذا
اجلسي مع نفسك جلسة هادئة وصافية وفكري في الحل .. المناسب للمشكلة بعد ماتذكرين الله
واذا حسيتي بالفعل الموضوع استصعب عليك ...
عطي نفسك فرصة قبل كتابة المشكلة بأخذ جولة في عالم حواء يمكن تلاقين مشكلة
مشابهة لمشكلتك وحاولي تقتبيسين منها حل لان اكثر المشاكل في هالقسم متشابهة... وللمعلوية وهذي نقطة مهمة جداً
الحل الي ينفع مع زوج لولوة ماينفع مع زوج حصة فهمتو المقصود يابنات :D
يعني كل زوج وله شخصيته المستقلة في زوج يجي بالرومانسية والكلام الطيب في زوج
مايجي الا بالعين الحمراء في زوج يجي بالهجر يعني كل زوج وله طريقة في التعامل
يعني انتي طبيبة زوجك وتعرفين وش يحب ؟ وعلى اساسه حلي مشكلتك
وأذا حسيتي انك ماتملكين هالقدرة نهائياً ... وانك تفتقدين الحكمة في التصرف ..
وأنك تلخبطين الدنيا اذا جيتي تتكلمين أو تحلين مشكلة ...وينقلب الموضوع فجئة ..ضدك..
جربي تثقفين نفسك أكثر صدقيني مافيها شيء.. ثقفي نفسك بالكتب .. وهذي
بعض هالكتب الي ممكن تفيدك
في حياتك الزوجية او حتى في التعامل مع الناس
((النساء من الزهرة والرجال من المريخ ))
او لو تصفحنا كتاب ((لماذا المرأه تبكي ولماذا الرجل يكذب ))...
وهالكتاب اتعب وانا اقولكم حلو وقد ايش استفدت منه
الصراحة احس فعلاً يحلل شخصية المرأه والرجل بطريقة ملفته ,,وجذابة
يعني لو اتطلعنا اكثر يتهئ لي اننا را ح نمشي على خطوات اكثر وضوح وأكثر ثبات .. وراح يكون عندنا مقدرة لوصغيرة
اننا نحل مشاكلنا عى الأقل الصغيرة بأنفسنا ...وانا هنا ضد الي تصبر مع زوجها المجرم ولا المدمن وتقول
بشوف هالكتب ممكن يتعدل ...
وهذي أمثلة على بعض القصص الي تنكتب وتعتبر حتى اقل من الصغائر
مثلاًصديقتي تخاصمت مع امها عشان طلعة كيف تقنع امها ؟؟؟؟؟
بنات معليش هذي حتى ماتعتبر مشكلة
زوجي عيا يخليني اروح السوق وش رايكم اصر على رأيي ولا وش اسوي ؟؟؟؟
بنات ابي اشتري (مدري وشو) بس زوجي رفض علموني وش الحل بممممممووووت من القهررر؟؟؟
هل معقولة بتموتين عشانه عيا لاتخافين .... هههههههههههه
المقصود يابنات وماأتهزأ في اي وحدة بس ليه صرنا نفكر في توافه الأمور وصارت تشغلنا وابتعدنا عن الأشياء المهمة
يعني مثلاً الأنشغال بتربية ابنائك وتوجيهم للطريق الصحيح ؟
مايشغلك قد موضوع تافه مع ام زوجك ولا مشكلة لك مع خواته ...أو حتى موضوع تافه مع شغالتك
هذا كتاب حلو ... الصراحة
((لاتهتم بصغائر الأمور فكل الأمور صغائر))
واتمنى بالفعل انكم تقرأون الكتاب
وهذي صورة للكتاب عشان الكل يستفيد
وان قرأت الكتاب كامل وانصح الكل فيه .. الصراحة يغير فعلاً من حياتك للأفضل
وفعلاً اذا كنتي من النوع الي يشيل الدنيا على راسه صدقيني هذا الكتاب يصغر
بعيونك المشاكل ...
*********************
واحس يابنات احياناً الحل قدامك وماتشوفينه وبعدماتنزلين الموضوع وتكثر ردود البنات
نلقى تراجع واضح من كاتبة الموضوع أنها تقول انحلت المشكلة
او انها تقول خلاص انا اكتشفت انه كذا كذا عشان تقفل على الموضوع
لان في الحقيقة هي حلت الموضوع وانتهت لانها تقـــــــــدر ومافي احد مايقدر ....
******************
واخيراً انصحك بتوجه الى مكتبة جرير خذيلك كم كتاب تتحدث عن الشخصية وكيفية التعامل
مع المشكلات صدقيني زوجك نفسة راح يحاول يعرف وش عندك ووش مشغلك
واذا عجبك شيء في الكتاب حطي ورقة عند الجهة الي تبينه يقرائها واتركي الكتاب في الصالة
ولا غرفة النوم ولا تطلبين منه ابداً ان يقراء الكتاب
وصدقيني ممكن يستفيد هو من الكتاب وبكذا يعكس الموضوع هذا على حياتكم .. للأفضل
وخلاصة كلامي ... رغم ان عندي كلام كثير ابي اقوله
بس اكيد تعبتكم من الهذرة .. :D
اننا نقدر نكون افضل من الأطباء في حل مشكلاتنا .... وهل معقولة تخلين الطبيب الي عمره
ماشافك ولا يعرفك ... ان يعرف حالتك أكثر منك؟
هل فعلاً يقدر الطبيب انه يدخل في داخل نفسك ويشعر بشعورك واحاسيسك؟
عشان كذا ارجع واقول كوني طبيبة نفسك وزوجك وأطفالك :27:
تعبت وانا اكتب الموضوع اتمنى يكون فيه تفاعل
وسامحوني الكلام مو مرتب
ودمتم بخيرررر