كوُني ( Happy Always ) */يمنع المنقول

وُأكمل يوُمي ~

أرجع البيت أتغدى بعدها بربع ساعه أخذ لي غفوه لمده ما تقل عن ربع ساعه
وفي أيام تزود ساعه ونص :/ على حسب المجهود إلي أستهلكته بالجامعه :P

وهالغفوه تساعدني لأكمل يومي بكامل قواي ..

أقوم أصلي بعد العصر أحب دائماً أشرب شاي بالفانيلا أو بالتوت البري
إلي نكهات من لبتون وساعات شاي أخضر



^^ وأقعد مع أهلي وهذا شعور يجيب لي السعاده .. الحمدلله

+ وساعات أخصص العصرية لنفسي وأقعد بحاليَ ..

لاززم تخلين ربع ساعه على الأقل من يومك تقعدينها مع نفسك
إذا فيك فضفضة فضفي ! بس مو بصوت عالي ! ( يحسبونك مسكونه بعدين ) !
أنا شلون أفضفض .. مثلا , أحد هاوشك ! أو مثلاَ شيء صار لي خلال الفتره السابقة
أن دكتورة الماده الفلانيه تنرفزني ! وتعل القلب وإذا رددتها ورفعت صوتي
بتصير مشكله ! وأنا إلي بخسر لأن راح ترسبني بالماده وبتعطيني حرمان !
وأهلي ما ربوني أني أرفع صوتي على إلي أكبر مني !
أنا المسؤوله عن نفسي ! وأنا إلي أحدد مستقبلي !
فعشان أطلع حرتي بالدكتوره !
أمسك ورقه وقلم وأقعد أعبر عن نفسي ~ أنا الشاطره العاقلة وهالدكتوره مراح تحدد مصيري
أنا قويه وراح أنجح ! وأقعد أشخبط ! أحس براحه !
أحس أفرغ العصبيه إلي فيني خلال المحاضره إلي حضرتها بالورقه !
مو تشخبطون خرابيط وأنتو عقلكم مو معكم ! وتقولون هذيك النفرة قاصه علينا !

+ إذا ما ضبطت حركتي !
روحي وفرفري بالبيت شوفي لك أحد وأمسكيه وفضفضي له
حتى لو الشغاله ترى صدقيني راح ترتاحين !

لا تخلين شيء بقلبك ! بتنكتممين ! وبعدها بتنفججرين !
بعدها راح تصير أشياء ما ودك تصير !

فحاوُلي تخيلين لو خمس دقايق من يومك متنفس لكِ

وّأكمل عاده ما أفعله في يوُمي

أقعد على جوالي بي بي وآتس أب أسال عن أخبار قريباتي و صديقاتي
وهم يسألون عني .. وهذا شيء إيجابي وفيه تواصل
والدين الإسلامي حث على صلة الرحم وهذا شيء يجيب السعاده

لا تحسبون أني من كلامي أني متشدده وأنه كل شيء حرام عندي !
وأنا وحده حالي حالكم :P عايشه حياتي و أحاول أن أوآزن في حياتي ..
أطلع وأجي و أسمع أغاني الله يهديني ,
وأشوف أفلام , وأسهر و نسوي بارتيات ونجيب كيكه .. إلخ
كلها أشياء تضيعه وقت صحح !

بس أحاول أني ما أكثر منها لآنها تضيع الوقت ! .. و الحمدلله في هّالوقت
أنا أحاول جاهده أن أقسم وقتي بين طاعه ربي أولاً
ثم أهلي , وصحباتي , وبين الطلعات و الشوبنق ..



+ عشان ما أكون على روتين يومي معين وبعدين أتملل

مثلا طاعه ربي سبحانه ‘ أنتي تصلين كل صلاه وتقرين أذكار الصلاه =) الحمدلله

تقرين أذكار الصباح والمساء والنوم =) الحمدلله

تحصنين نفسك قبل لا تطلعين =) الحمدلله

وتحاولين كل ساعه تذكرين الله و تصلين على النبي صلى الله عليه وسلم =) الحمدلله


وحلو تزيدين على روتينك ..
أنكِ مثلا يوم الأثنين والخميس بتصومينهم * فهذا شيء جميل

أنك الأسبوع هذا مقرره إن شاء الله
أنك تصلين الضحى و الوتر كل يوم .. والحلو لما تواصلين فيهم

.. والله فرض لنا عبادات كثير الحمدلله ..
وكل عمل تعملينه أحتسبي النيه قبلها , عشان إن شاء الله تنالين أجر =')

كوُني حاسوُب ! تتلقين المعلومات الزينه .. يعني شلون ؟

أنا أحب أزيد وأتعلم أشياء تفيدني وأكسب فيها أجر
وأفيد غيري فيها .. أحب أقراء و أتعلم , عشان ما أطيح بالغلط وأستمر عليه

يعني مثلا توي أدري أنه / مفروض أغطي رجولي وقت الصلاه !
أنا مشمري ( ثوب الصلاه ) طويل بس شويات قصير من قدام وطويل من وراء
فأحس رجولي تطلع .. ‘ الفتوى تقول أن حتى لو طلع قدميكٍ صلاتك صحيحه
بس دامك عرفتي =) غطي رجولك أو غير الثوب عشان تصير صلاتك كامله
.. إن شاء الله والله يتقبلها :")


كيذا حلو الوآحد يقرأ و يتعلم

وسائل الراحه والنت متوفره لنا فَإقضي وقت من يومك بأشياء تفيدك ولو ربع ساعه *

ونكمل :-)

عشان ما يضيع وقتك قسميه !
كثير بنات يخططون ويقررون من بدايه السنه أن
بيسون كيذا وكيذا .. وأنهم بيحققون هدفهم

وتلاقينهم أخر السنه ! على حالتهم أول السنه
وكل سنه تقول هالكلام !

يختي غلط والله غلط العمر يركض ..
وأحنا نقرر نرسم ونقرر بمخوخنا !

مثال تجي وحده جميلة دبه متينة تقول أنا هالسنه بضعف ! وتسوي زحمه
وما بقى شيء ما تشتريه آلالات و تحمل مقاطع رياضة من اليوتيوب وحالتها حاله ..

وتجي الدوامات ثم العطله النصفيه ثم دوامات وثم الإختبارات
بعيدن عطلة كبيرا بعدين رمضان بعدين عيد بعيدن دوامات !

وهي على حالها الدددبه ما غير تكنس الغبار إلي تحت الآلات إلي شرتهم !

هذا دليل أنها ما خططت ولا حطت لها جدول تلتزم فيه *.*
ما غير تخطط بالعقل ! وهذا شيء غلط ريحي عقلك شوي يا ماما

وأشتري نوت وأكتبي كل شيء وخلي هالنوت هو كل شيء !
من تسجيل مواعيدك و وأغراضك وكل يوم قبل لا تنامين أكتبي إلي ناويه تسوينهم غداً ..
ووكل شيء تنجزينه حطي عليه صح .. عشان تشجعين نفسك وكل نهايه أسبوعين
أو شهر .. كافئي نفسك بشيء كنتي تبغينه .. طبعاً ما تكافئين نفسك إلا إذا كنتي ماشية
على كل شيء كاتبته أنتي .. وسويتيه

~

اللحين فيه نوتات مرا كيوت
وفيها كلندر و وإستكرات و و ألوان تفتح النفس ..
وفيه بالمكتبات يبيعونهم + فيه تاجرات كمان يبيعونهم
مرا مفيده لتقسم وقتك ولإنجاز مهامكِ
صرت أعتبرها جزء من حياتي ..
ومستحيل أروح مكان ما أخذها معي هالنوت



إلي عندي عباره عن /
- مغلف فيه كل الأشهر =)
- كل شهر أخذ النوت حقه =)
- وأسجل قبل لا أنام الأشياء إلي ناوية أسوها غداً إن شاء الله !

وهذي صوره من أنستقرامي للمغلف والنوتات ..




وأحط لنفسي حكم إجابيه وأكتب عبارات تشجيعيه
مثلا * ( بكرا ترى بتكملين على الجدول وتسوين رياضة الهب هوُب ! مفهوم يا جميلة ! )

< تهديد مو تشجيع

المهم أكتب وكأني أكلم نفسي

وهذا شيء يعطي إلهام وأحس بشجاعه وأقوم أسوي رياضه ..

واللحين في أشياء كثيراً تخلينا نسوي رياضه ونتشجع
عندكِ تويتر .. إنستقرام .. وإقلاع بعد

تويتر / في صفحات تعطي تغريدات تفاؤليه تحفزكِ عشان تقومين تسوين رياضه =)

الإنستقرام / ناس حققت حلمها فيه شلون ؟ كثير أجانب صارو يحطون
صورهم قبل وبعد فبعضهم تحسن فرق شكل وحجم ورجع الشكل صغير !
ولو شفتي صفحتهم الصور السابقة
كلها أكلات خفيفه وفواكه وخضار , ويصورون نفسهم وهم يسون رياضه !
عشان يعطيهم حافز على الإستمرار
< ما أقول لكم صورو نفسكم ونزلو الصوره .. لا =)) !

* ممكن تسوين فولو لنوعيه الصفحات إلي كيذا ..
لآن تعطيكِ شجاعه وتحفزك على الرياضه ..
* وممكن تسوين لكِ أنتي صفحه وتحطين الأكلات الخفيفه إلي تسوينها ..
وتنزلين شوزك الرياضي إنك اللحين رايحه تسوين رياضه وكيذا
< بش شوز .. لا يكثر !
* واللحين بعد فيه صفحات عربيه كككثيره عن الرياضه ومعلومات ..

إقلاع /
وحيث المواضيع الكككثيره الشاملة المفيده ..
كل معلومه تشوفينها وتحسينها فدتك سجليها بالنوت ..
وفيه موضوع عن الرياضات .. أختاري لك نوع وأبدي فيه
وسجلي تجربك وفرق وزنك كل أسبوع

وإن شاء الله توصلين لحلمك ..




في نقطه أخيرا حابه أكتبها هي *

الكلام الوصخ إلي منتشر
ككثير وكثير وككككثير يقولون كلام وصخ !
منها ( ز .. , اللعن , الكلام الوصخ إلي عيب ينقال )
ليه يختي ! تقولك تعودت ! وإذا سالتيها وقلتي لها هذا شيء زين !
تقولك عادي الكل يقولها مو بس أنا

طيب ليه ما تصيرين غير عن إلي يقولونهم وما تقولينهم !
عيب والله عيب ! لدرجه وحده تقول أمي عادي تقولها لنا ! أنا بعدها وجهي كيذا

الحمدلله يارب والششكر الله لا يبلانا ..

ما أقول أن بيتنا أبد ما نتهاوش لا والله تصير ساعات الحرب العالمية الثانيه بين الصغار ‘
وإذا سب وآحد الثاني قاله له ( يا حيوان , يا دب , يا بقره , يا غبي , يا زفت )
< ما تزود السب ببيتنا عن كيذا ومو دايم تنقال بعد . .
وإذا أحد قال كلام وصخ أو لعن ما نكلمه أسبوع .. وهو أصلن ما يعودها ..


فإذا كنتي إلي تقرين موضوعي
يا ( أم ) وعندها أطفال ‘ بيتك حاولي قد ما تقدرين
تغيرين الكلمات الوصخه واللعن بشيء أخف
منه .. لآن طبيعه الأنسان يشتم بوقت العصبيه !

فلا تخلين أطفالك يقولون كلام وصخ !
وكثير أمهات قاعدين بالمجلس ويجي ولدها ويتطاقق من خلق الله
ويسبهم ويا ( ز .. ) ويا ( م .. )
عيب والله عيب
ومسكيننه الأم تحاول ترقع وتضحك !
فعشان ما تطيحين بالمواقف البشعة !
.. وإذا أول مرا طفلك قالها ! لا تضحكين له ! وفهميه أن عيب ! وما يجوز هالكلام !
لآن لو ضحكتي له بياخذ الأمر عادي وبتلصق بلسانه

لمن يكبر !
وهذا واقعنا إلي نشوفه اللحين الصغار كبروا يقولونه كأنه سلام عليكم

فلو أنتي تقولينه ! غيري من نفسك !
.. حاولي قد ما تقدرين تبعدين عن هالكلام

أنتي واعية وكبيرا .. فلا تخلين كلام وسخ يطيح من نفسك !

ترى والله مو شيء واااو أنك تقولين هالكلام وصديقاتك يضحكون !
< أنا عن نفسي لو شفت وحده تسب وتلعن
وكلام وصخ والله تطيح من عيني !
حتى لو هي من تكون

( ( الإسلام ما حثنا على السب والشتم ..
حثنا على الصبر حتى لو كنتي معصبه أستغفري ربك وأنسحبي
من الهوشه والنقاش ! )



كلامي كثير ! ..
بس حبيت أني أطلع شيء من قلبي وواقع إلي نعيشه الآن وكم نصيحه أحاول
أوصلها لقلوبكم ولو بشيء بسيط .. ولو تستفاد منه وحده

هذا شيء كككبير بالنسبه لي ..


الحمد لله الذي أعزنا بالإسلام ، وأكرمنا بالإيمان '

وُ أخيراً مبروك جميلاتي الناجحين
ونقول لكم / الناجح يرفع ايده ههي ههي وينققققققح على طول

وإجازه مليئه بَ الإنجازات بَ إذن الله


الموضوع بحقوق إقلاعيه !
فلو بتنقلين الموضوع رجاء الرجاء الحقوق ما تنسينها

منتديات شبكة الاقلاع ® - هذيك النفرة ..
إلي هي أنا أموُن إلي تحبكم *

ولاَ أحلل من ينسب الموضوع لنفسه ..

لأهميه / الموضوع موجود بمكانين ..
هنا بَ إقلاع + مدوُنتي

والسلام عليكم وُ رحمه الله وبركاته

يا بنات اعذرووني ما قدرت كمان انقل الصور للاسف
بس المهم انكم تستفيدوا من الكلاااام
تقبلو خالص حُبي وتحياااتي
غالياااتي

موضوعك راائع جدا سلمت يداكي