كيس حمل فاضي

معلش يا جماعة عايزه افضفض واحكي قصتي لاني بجد مخنوقة ومش عايزه اتكلم مع حد اعرفه........فاستحملوني شوية وادعولي ربنا يصبرني.........
انا عندي ولد وبنت والحمد لله حملت في الولد بعد الزواج على طول بدون اي مشاكل والحمل كان كويس وبعد 2.5 سنه حبيت احمل تاني ولكن لم يحدث حمل الا بعد 6 شهور ولكنه نزل في اول الثاني ثم حملت مرة اخري بعد كام شهر وبرضو نزل في اول التاني ثم حدث حمل تالت وبالتليفون قبل ما اروح للدكتورة اعطتني اسامي مثبتات حمل ونصحتي بالراحة الا ان ازورها ثم زرتها وعملتلي سونار ولم تخبرني انه فيه مشاكل وكان لي موعد اخر معها بعد اسبوعين وكان هذا سيكون اول التالت وصدمتني ان كيس الحمل بدون جنين وبعدين عملت عملية تنضيف ووتوقفت عن االتفكير في الانجاب مرة تانية الا لما اعرف ايه الاسباب اللى بتخلي الحمل مايكملش وعملت تحاليل كتيرة وجوزي كمان عمل وماكنش فيه مشاكل ....... وغيرت الدكتورة لدكتور تاني اخد اسبرين اطفال مع فوليك اسيد قبل ما يحصل حمل تاني لانه قالي ممكن يكون عندك مشكلة في السيولة والحمد لله حصل الحمل وكان طبيعي وولدت بنت......
وبعد ما البنت بقى عندها 3.5 سنه كان نفسها في بيبي تاني بالرغم من اني ماكنتش ناوية خالص على كده ومكتفية بولادي.... بس خفت اني بكده اكون برتكب ذنب وفعلا رحت وشلت المانع عند الدكتورة وحملت بعدها وفي الاسبوع الخامس من الحمل رحت للدكتورة ومن قبل ماتعملي سونار قالتلي ممكن الجنين مايبانش دلوقت لانه بيبان اكتر في الاسبوع السادس ولكن رحتلها مرة تاني ولكن في الاسبوع العاشر بالرغم من مخاوفي وقلقي لتتكرر حكاية كيس الحمل الفاضي ولكن كان زوجي دايما يقولي ما تكونيش متشائمة وان شاء الله خير ....... وبعد ما نمت على سرير الكشف عند الدكتورة وبدات تجهزني علشان تعملي السونار سألأت بنتي نفسك في ايه قالتلها بنت وسألت ابني نفسك في ايه قالها ولد ........ فقالتلي كنتي حملتي في توأم وريحتيهم!!
وبدأت تعملي السونار وحسيت على طول من نظرتها ان كيس الحمل فاضي وكانت المفاجأة
وقالتلي تعالي كمان اسبوع يمكن تكون الحسابات غلط وفي نفس الوقت قالتلي اتمشي براحتك واخرجي يمكن ينزل ... وقالتلي انها تفضل انه لو لم يوجد جنين فعلا اني اعمل العملية ببلدي لاني خلاص هسافر بعد اسبوعين لان هنا مافيش تحاميل معينه توضع في المهبل تساعد على توسيع الرحم والاجهاض... وقالتلي اني هنا هتبهدل في عملية التنظيف لو عملتها هنا........ اللى مضايقني فعلا اني مش عارفه اعمل ايه هل اشرب قرفة واعمل حركات عنيفة جايز ينزل ولا استنى لما اروح للدكتور في بلدي واعمل العملية هناك وخلاص... وكمان احساس اني جوايه حاجه مش طبيعيه شيء مضايقني جدا وكمان بنتي صعبانه عليه لاني كل ما اقولها البيبي مات مش مصدقة وتقولي لا هنا في بطنك فيه بيبي............
معلش طولت عليكم بقصتي الممله ده بس حسيت اني عايزه اتكلم وخلاص