مشهد "1"
نورة: انتي كاتبة اخر درسين مع الدكتورة؟
سارة: ايه الحمد لله دفتري كامل
نورة: طيب بالله عطيني دفترك اصوره
و بمرك اليوم بعد المغرب و اعطيك إياه..
سارة: بس فيه اختبار بكره! ودي اذاكر بدري و اخاف تتأخرين علي
ماتقدرين تجيبينه قبل العصر؟
نورة: لا ما اقدر انا بنام اول ما ارجع, بعدين موب ضارك لو تأخرتي شوي بالمذاكرة...
يالله عاد بلا بياخة عطيني الدفتر
سارة: ممممم طيب بس تكفين لاتنسين ترجعينه بدري
مشهد "2"
محمد: ترى بكره بطلع اجدد جوازي و بمر على مكتبك في الجوازات, ضبطني عاد و مشني على طول
خالد: حياك الله, بس ترى صعبة جداً اقدمك في السرا, ترى فيها إحراج لي و احتمال تصير لي مشكلة!
محمد: يبن الحلال دبرها من هنا ولا هنا, مسألة أجلس انتظر 3 ساعات لين يجي رقمي انساها معليش,
بالذات انك تشتغل هناك و تقدر تمشي اوراقنا.
خالد: لو درى عني المراقب أباكل تبن! ودي افزع لك بس لاتحرجني يا بعدهم.
محمد: علينا يابو خلود؟ كل العالم يمشون اخويائهم وقفت عليك انت يعني؟ يالله عاد بلا حركات بزران...
بكره الصباح بمرك و ان شاء الله انك ماراح تقصر
خالد: اوووف.. امري لله... تعال بدري و بحاول ان شاء الله.
في المشهد الأول نورة مالقت احد يوصلها لبيت سارة, و صارت مشكلة في البيت مع سارة و اهلها
إلى ان وافقوا يوصلونها لبيت نورة علشان تاخذ دفترها, و ما أخذته الا بعد العشا و الوقت كان متأخر و نفسيتها كانت سيئة,
فما قدرت تذاكر للمادة و اخذت درجة سيئة فيها.
أما خوينا خالد فقدر يمشي أوراق محمد بدون اي مشاكل, بس بعد فترة اكتشفوا انه فيه اوراق ناقصة من ملف محمد,
مما ادى الى تحقيق مع خالد و مشاكل كبيرة أنتهت بتأديبة ونقله للمنطقة الجنوبية.
مشكلة خالد و سارة انهم تعبوا نفسهم و خدموا اصدقائهم على حسابهم
وهم يعتقدون أنه اللطف و المبادرة بتقديم المساعدة و الفزعة راح يكسبهم احترام وود أصدقائهم,
حتى لو كان هالشي على حسابهم الشخصي, بس للأسف الطيبة الزائدة و الحبابة راح تنتهي بالاستغلال و رمي الاعباء على الاطراف الاخرى.
لو ان سارة رجع لها دفترها بدري المشكلة ماراح تتوقف هنا,
خلاص صديقتها راح تتكل عليها و اخر الترم راح تجي و تصور دفاترها,
و لو أحد نقصته محاضرة راح يتجه للأخت سارة علشان يصور دفترها لأنها " حبوبة وما راح تقولك لا"
اما الاخ خالد حتى لو ماصارت له هذيك المشكلة, راح يبدأ يتجه له كل عائلته و اصدقائه اذا بغوا شي في الجوازات,
و حتى بيتطور الامر انه اصدقائهم يرشدون الناس له و يقولون
" قل له انك جاي من طرفي و بيمشيك تراه خدوم و بيفزع لك"
بس لو أنهم استخدموا كلمة "لا" بطريقة مؤدبة و مع ابتسامة لطيفة هالشي كان من الممكن انه يمنع عنهم أذى كبير و مشاكل هم في غنى عنها!
المشكلة هذي يعاني منها جزء كبير جداً مننا و خاصة النساء, و نواجه مواقف شبه يومية تحطه امام اختيار كلمة "لا" أو كلمة "نعم".
بالنسبة لي, كنت أول إنسان خدوم جداً أو بالاصح "مخفة"
كنت انبسط اذا احد طلب مني شي و اطامر و اساعده وحتى احياناً لو طلب مني اشتري له غرض,
اجيبه له و أرفض اخذ فلوسه الي دفعتها.
مرات يطلب مني واحد شي ما اقدر انفذه, اضطر اوافق لا شعورياً و انحرج من صاحب الطلب بعدين.
حتى الواحد يحس بتأنيب الضمير لو ماقدر يساعد خويه.
المشكلة هو رغبتنا بإرضاء الاخرين دوماً, و رضا الناس غاية "لا" تدرك.
حتى لو كنت "عزيزي المخفة" في غرفة فيها 10 اشخاص و احتاج واحد منهم شي,
راح يلتفت عليك انت و يقول.. بالله جب لي موية الله لا يهينك
بس الحمد لله خلال اخر سنتين تغيرت شخصيتي بالكامل,
صارت كلمة لا خفيفة جداً على لساني ولا أشيل همها ولا أفكر فيها كثير.
و الحمد لله صارت حياتي مريحة جداً, حتى طريقة معاملة الناس لي تغيرت بشكل كبير للأفضل,
و صرت اذا احتجت شي يتسابقون الي حولي لتوفير طلبي. و انقلب السحر على الساحر
اكتشفت انه استخدام كلمة "لا" بطريقة مؤدبة و مع ابتسامة لطيفة
راح يكسبك احترام الاخرين, لانه راح يثبت ان لك حرية شخصية
و بيخليهم يتعاملون معك بطريقة أفضل, علشان اذا المرة الجاية طلبوا منك شي ماراح تكون اجابتك "لا"...
لأنه بالفعل نحن الي نحدد كيفية معاملة الأخرين لنا, و نحدد احترامهم لنا كيف يكون.
خلال بحثي في الانترنت عن هالمشكلة, تفاجأت بأنها مشكلة كبيرة حول العالم, و يعاني منها ناس كثيرين جداً
لعل أشهرهم هي المذيعة الشهيرة Oprah Winfrey
والتي كانت تحب ان ترضي جميع من حولها حتى لاحظت استغلال من حولها لها.
واستطاعت ان تترك هذه العادة السيئة التي كادت ان تدمرها.
حتى انها خصصت حلقة كاملة من برنامجها لمناقشة هذه المشكلة.
و ايضاً صفحة في موقعها لمحاولة حلها.
ولقيت العديد من الروابط و الدورات و الكتب المختصة بهذه المشكلة
علشان افيدكم بتجربتي هذي خطوات بسيطة أو بالاصح تكتيكات لاستخدام هذا الحرفين اللعينين!
1- أول و اهم شي, خلك صارم و مؤدب في رفضك, قل " لا ولله معليش ما أقدر ابدا"
و لايكون رفضك ضعيف و فيه تردد " مممم ياخي صعبة شوي و حوسة ما اظن أقدر "
وقتها انت تعطي فرصة للي قدامك يتحنحن عليك و يحرجك علشان توافق! و كأنك يابو زيد ماغزيت.
2- اذا الشخص الي قدامك كرر طلبه حتى بعد رفضك, اعد رفضك مرة ثانية بنفس القوة بس بطريقة مختلفة " صدقني ما اقدر ابداً, عندي اشغال واجد"
3- اذا طُلب منك شي, تأكد انك فاهم الطلب كويس و عارف كم بياخذ منك بالضبط...
لانك يمكن تكتشف بعدين انه الموضوع بياخذ منك وقت و جهد أكبر من الي انت متوقعه.
يعني لو واحد طلب منك تمر احد الوزارات الي قريبة منك و توصل له ورقة بس.
تأكد انه الموضوع بياخذ مجرد دقائق مهوب سرا و ارقام و مكاتب و بياخذ وقت طويل منك...
وقتها ارفض الطلب, لانه ليش انت تتعب علشان شي ماراح تستفيد منه؟!
4- اذا رفضت حاول انه رفضك يكون قصير بدون ذكر اسباب لو تقدر.
يعني لو واحد عزمك و انت مشغول, قله بكل سهوله" ولله اعذرني انا مشغول ذيك الليلة " بدال ماتذكر له مبرراتك,
فلو تقول" اعذرني ولله انا بكره الليل معزوم في عرس" احتمال كبير يحرجك و يقول اكيد تخلصون العشا على 10 او 11, خلاص عقب ماتتعشى مرنا ترانا جالسين الى الساعه 2, مالك عذر...
لكن احياناً لازم تبرر اعتذارك, الوضع اكيد يعتمد على الموقف و الشخص, لكن عادةً حاول تكون اجابتك قصيرة.
5- حاول تعطي الشخص الي امامك حلول أخرى علشان لا يناقشك و ينشب لك كثير,
مثلاً تقدر تقول: شف عبدالله الظاهر انه فاضي و يقدر يخلصها لك,
او قل : ما اقدر اسويها لك اليوم, بس اقدر اخلصها الاسبوع الجاي.
6- اذا كنت متردد بين رفض الطلب او قبوله, فاختار الرفض, لانك تقدر تفكر بعدها بالموضوع و ترجع لصاحب الطلب و تقبل طلبه.
بعكس لو قبلته و اكتشفت انه متعب, محرج جداً أنك ترجع لصديقك و تقوله معليش ما اقدر.
طيب لو جاك مسؤولك في الدوام أو دكتور في الجامعة و طلب منك احد الواجبات او تخلص معاملة معينة و انت مشغول جداً,
صعب ترفض طلبه لانه راح يضرك هالرفض...
هذي ثلاث نقاط تفيدك و تحسس المسؤول انك تشتغل بصدق,
و راح يفكر كثير قبل مايطلب منك مرة ثانية وانت مشغول:
* دائماً ذكره انك تشتغل على مشاريع اخرى مهمة جداً هو طلبها منك.
*اطلب منه يحدد اولويات العمل الي طلبه منك مقارنة مع باقي اعمالك,
و هل يلزم انك توقف جميع اعمالك و تحاول تنهيه باقرب وقت او لا.
* وضح له انك راح تنهي العمل, لكن ماتضمن جودة عالية بسبب الضغط الي عليك.
احياناً من المستحيل انك ترفض طلب و ملزوم انك تقول نعم, هذي بعض الاساليب الي تقدر تستخدمها لتخفيف الضرر:
* حاول تسيطر على الوضع و تحدد موعد لانهاء العمل,
يعني تقدر تقول: خلاص ابخلص لك هالمعاملة, بس ماراح تنتهي الا السبت القادم.
*حدد مقياس لجهدك, لو طلب منك احد انك تساعده بترتيب شي معه تقدر توافق...
بس قل انك ماراح تقدر تشتغل أكثر من ساعة وحدة بس.
* خلك انسان ماتتنازل عن حقك, يعني لو طلب منك واحد انك تساعده بشي وافق.. بس قل:
المرة الجاية لو طلبت منك مثل هالطلب لاتقول لا!..
بكذا تضمن حقك وتعرف ان الشخص الي امامك يقدر الشغل الي سويته.
و أكيد معظمنا لو يفكر فيها شوي بيعرف يفرق بين المساعدة و الخدمة اللطيفة,
و بين الاستغلالية و استمرار استخدامها من قبل الاخرين.
فالواحد منا لو يفكر وقت الطلب بحجم الطلب و حاجة الشخص الي امامك له,
و حساب مستوى علاقتك معه و طريقة معاملته لك.. يقدر يتخذ قراره بالموافقة على الطلب أو بكل بساطة يقول: اعذرني, ما اقدر
و صدقوني لو انه صديق عزيز و يستاهل ماراح تخسره بسبب هالموقف او راح ياخذ بخاطره,
و لو زعل عليك فأعرف انه صداقته فيك من باب المصلحة بس! و فرقاه جنة
بالأخير هذا الرابط فيه كلمة "لا" بـ 520 لغة مختلفة, واذا تحس ان حفظها صعب جدا, تقدر تكتفي بهز رأسك بالرفض....
منقــــــــــول للفــــــائده
بسراحه استفدت منه كثيرر لان مشكلتي الــــــرفض :06: