كيــف تتركــين أطفــالك مــع الخادمـــه,,اذا كنتــي معلمــــه..

السلام عليكم
ودي أستشيركم وتنصحوني من خبرتكم..لاني جديده في المجال وماأعرف كيف أتصرف..
أنا معلمه جديده تعينت في المنطقه اللي فيها أهلي..
وفي الأصل أنا متزوجه وعندي طفلين وأسكن في منطقه تبعد عن أهلي 4ساعات تقريبا..
مشكلتي نفس مشكلة أغلب المعلمات الأمهات هي الأطفال..
وأنا في مدرسه تبعد عن المدينه اللي فيها بيت أهلي ساعه ونص وبما أننا 9 معلمات في نقل واحد مضطرين نتحرك بدري عشان يلحق يجمعنا..
والله نطلع من الساعه4 ونص ولا نطلع من مدينتنا الا 6 ونص تخيلوا ساعتين نفتر عشان يجمعنا..
وساعه وربع أو ساعه ونص وسرعه غير طبيعيه عشان مانتأخر مع ذلك نوقع دائما متأخرات..
طبعا في البدايه أخذت خادمه تنازل ب25ألف نيباليه وكانت كبيره بالسن,,أخذتها أول ماطلع أسمي في شهر5 يازعم أضبط وضعي عشان ماأتورط في أطفالي..
اللي حصل لما بديت التدريس جيت في بيت أهلي ولا تقبلت أولا البيت كبير ماهو مثلي كانت في شقه..
ثانيا العدد في البيت7بنات رغم انهم والشاهد الله مايأمرونها بحاجه..
ثالثا أمي الله يهديها كثيرة تطلب,,حتى أن أبوي كان جاب لها 9 خادمات ولاوحده جلست سنتين لانها تحب النظافه وشديده في التعامل النوم متأخر ويصحون بدري..
نعود لموضوعنا كل ماجيت من المدرسه قامت تتشكى من الخدامه وأنا طبيعي أهاوش الخدامه وخلاص كرهتني وكرهتها وقمت بالتنازل عنها وخسرت خساره..
الله يعوضني خير..
في المقابل كل أخواتي يدرسون وأمي مزينة قهوه في مدرسه بما أن أبوي تزوج من ثانيه والمصروف اللي يعطيهم يادوب يوفي..
وأنا كنت أعطيها من حافز ولما توظفت صرت أعطيها مبلغ شهري..
طبعا بعد ماتنازلت عن الخدامه حسيت بضياع وتشتت توهقت بعيالي..
اضطريت أني آخذ خدامه أفريقيه استئجار 4000ونفس المشكله ماتقبلت تبقى لان الاتفاقيه بيننا أنها تكون جليسة أطفال وأمي طالبتها بالشغل في المنزل..
وراحت بعد أسبوع لدرجة أنها قالت أبي أروح وماأبي منكم أجرة الأسبوع..والحق لله حنا نخاف الله لابد نعطيها قال الرسول الكريم:أعط العامل أجره قبل أن يجف عرقه..
وحاولت كل التأجير مايبون بيت كبير قمت أخلي أمي وهي رايحه للمدرسه تنزلهم عند حاضنه مصريه..ولما ترجع تاخذهم..
وقدمت على سيرلانكيه وحاليا جاتني لها3 أسابيع..وتعرفون أسعار الاستقدام ماتقل عن20ألف..
وتيتا تيتا عادت ريمه لعادتها القديمه..أمي أمي ماأروعها ههههه
المكتب كنا معبيين عنده نموذج طلب وقايلين تخدم طفلين وبنكون في شقه3 غرف ودورتين مياه الله يكرمك ومطبخ طبعا نتأمل النقل اللي رايح يطلع اخر هذا الشهر..
اللي صاير في الوقت الحالي أني مالي صلاحيه على الخادمه نهائي..
هي اللي تصحيها وهي اللي تقول لها روحي نامي..
وأنا أقوم من4 الفجر وكرف في المدرسه وأرجع2بعد الظهر وأبشركم ماأنام والسبب أن الخادمه تكون مشغوله بالمطبخ..
ولاأقدر أترك عيالي من دون مراقبة أحد لان خواتي يتغدون وينامون..
وصعبه أقول لها تعالي أجلسي معهم أخاف أمي تزعل تقول ماتبيها تشتغل عني..
ومن ناحيه ثانيه أخاف الخدامه نفس الشي تحس بضغط عليها هذي تقول سوي كذا وهذي تقول سوي كذا..
والحقيقه أني بحاجه لها بعد الله لأني بكره لو رجعت شقتي من بيمسكهم غيرها..
والله ثم والله ثم والله أني أأكل العيال وأغير الحفاظ للصغيره..وأنا اللي أزين الرضاعه وماأنام بالليل ألا لما أنومهم أثنينهم.يعني حدود11 أو12..
وتخيلوا الخدامه تنام من8 أو 9..
في يوم قالت لها أمي خلاص روحي نامي مافيه شغل حسيت أني أنضغطت بصراحه من قال أن شغلها هو فقط خدمة البيت من غسيل وكوي وتنظيف وعيالي طيب وينهم من كل هذا..
قمت قلت لها لاتنومينها بدري بكره لو رحنا شقتنا ماراح تتقبل تنام 10 قالت عاد حنا عودناها..
قلت لا أنا متفقه معها من أول ماجات وفاهمه بس أنتي الله يهديك بتخربينها بطريقتك..
حتى العيال ماتمسكهم بكره تتمرد وتتذمر منهم لانها تعودت أنها تعتمد علي بخدمتهم..
أسكتت وماقالت شي..
بس مافيه فايده ماشيه على نفس النظام شاغلتها بالبيت وأنا طالعه من المولد بلا حمص..
والله أرجع تعبانه ومصدعه ولا أنام..الزبده أني ماأستفدت من وجود الخدامه مطلقا..
وأمي بما أن مدرستها قريبه تروح7 ترجع 10 ونص..يعني ماتتأخر
وتكون موصيتها بأشغال تسويها ولما ترجع تقول أتركيهم وقومي سوي كذا وكذا..
وتهاوشني اذا ماسويت الشي اللي قالت لي أسويه قبل تطلع..
أقولها ياماما بيبي فيه قوم تقول عادي أتركيه بالصاله وعادي اذا صاح ماراح يموت..والحقيقه تعرفون تربية الكبار برايهم عادي يطيح مارده يكبر وينسى ومن هذا الكلام..
والله متقبله أنها تشتغل بالبيت بس تعرفون الخدم مايصملون والمفروض مايكون شغلي على دكة الاحتياط..وعيالي شي ثانوي ماهو أساسي..
خايفه يضرب مخ الشغاله أنا أوصيها أنتبهي تتركين العيال لايصير فيهم شي أنتي المسؤله وأنا في المدرسه,,وأمي تطالبها بالنقيض..
أنصحوني وش أسوي زوجي يقول نآخذ شقه ونرتاح ماهو كل يوم نجيب خدامه,,الفلوس ماحنا جايبينها من الزباله..
ماأكذب عند أهلي فيه ايجابيات وسلبيات ولو أخذت شقه نفس الشي فيه ايجابيات وسلبيات..
مثلا في بيت اهلي أقول فيه وناسه وعيالي مايطفشون ويكون فيه مراقبه على الخدامه لان الوقت اللي تكون فيه لحالها معهم مجرد3 ساعات..
ولو أخذت شقه بيكون الوقت طويل من 4 ونص الى2 لحالهم معها..والخدامه صعبه يترك لها الواحد الامان الكامل..
يعني كيف أضمن أنها تآكلهم وكيف أعرف أنها مانامت وتركتهم..كيف اتأكد أنها ماتضربهم..
لكن بيكون شغلها متركز على العيال والشقه ماتكلفها هذاك الشغل..
أعرف فيه ناس بيقولون هذي أمك ومهما يكن..أعرف أن برها واجب ونقول ربي أرحمهما كما ربياني صغيرا..
لكن اذا الخدامه سكتت اليوم ماراح تسكت بكره,,والضحيه عيالي..
وفي النهايه أما أخسر الوظيفه عشان أطفالي أو يتشتتون بسبب الوظيفه.
تكفون أنا بحيره ساعدوني والله اني تعبانه نفسيا وجسديا وماديا..يارب رحمتك..
ربي أوزعني أن أشكر نعمتك..
سبحانك اللهم أني كنت من الظالمين..
أستغفرك وأتوب اليك..