كيفيـــة التعامـــل مــع الخادمـــات..

السلام عليكم..
بالمختصر اللي تعرفني وسبق قرأت مواضيع تعرف معاناتي مع الشغالات..
من حيث البحث عن مكتب أستقدام والبحث عن ايجار بالشهر والبحث عن تنازل..
الزبـــده:
من أسبوع لقيت نيباليه تنازل في مكتب أخذتها ب25 ألف(نصف مهري)الله المستعان..
المرض شين..الله يبعدكم عنه..
المهم خلصنا فترة التجربه3أيام وهي ماشيه كويسه وكل نسألها تبين تجلسين وتشتغلين ومرتاحه تقوا أيووه..
والله أني أجلس أسولف معها..وأخليها تآكل معي فاكهه..وتطالع زي أفلام أقول عشان ماتطفش..
وراح زوجي كنسل التأشيره..
يوم جاء يوم السبت وتضرب المرأه تقول أنا تعبانه ماشيتها في كذبها أعطيتها حبوب بنادول وقلت اذا جاء بابا يوديك المستشفى..
المهم شافت المسأله مافيها فايده قالت أنا أبي أسافر..قلت المريض يروح يعالج ماهو يقول بسافر..
يعني أنتي كذابه..
خلاص أنا أنقهرت وحنا متفاهمين معها وتعرفون البيت شقه تنظيف وغسيل وكوي..
أما العيال والطبخ أنا أقوم فيه..
قام زوجي أتصل بالمكتب وأعطاه التفاصيل قال هاتها مابعد يخلص المعقب نقل الكفاله من الجوازات..
قالت مابي أروح المكتب لانهم ماراح يسفروني..تبينا نشتريها بهذا المبلغ وبالاخير نسفرها على حسابنا..
قلنا ماحنا مجانين..
وديناها المكتب وأعطانا وحده بديله للتجربه..
ودي تعلموني كيف أتعامل معهم..
أنا أشوف ناس يجورون على الخدم وماشيين معهم والبيت فيه عيال وشغل وطبخ كثير..
وأنا مجرد أشياء بسيطه رفضت الجلوس..
هذي اللحين ماتعرف عربي ولاسبق لها الشغل..
صعبه أضغط عليها بتقول مابي الشغل,,واذا دلعناهم رفعوا خشومهم..
وش الحل تكفون..اللي تعرف تتعامل مع الخدم..تساعدني باللي تقدر عليه
رغم أن نفسي تقفلت واحس ماعاد ابي خدامه بس التعب والمرض حادني بصراحه مافيهم أمان اليوم يشتغلون بكره يتغير رأيهم..وخايفه نخسر فلوسنا على الفاضي..
أعرف طولت عليكم لكني مقهوره ماأعرف وش يبون بالضبط..
الله يجزاكم الجنه