كيف أتصرف مع قساوة زوجي 💔

السلام عليكم بنات .. اول مرة اكتب موضوع وتشارك بالمنتدى اتمنى تساعدوني بتجاربكم وأوصل لحل مع زوجي ..
انا متزوجة حديثا لم اكمل سنة وهذا زواجي الثاني وعندي ولد من زوجي الأولي .. زوجي متزوج وانا زوجته الثانية والحمدلله وانا ساكنة مع امي وولدي وزوجي مو مقصر دائماً معاي وأقضي معاه اغلب أوقاته يعني تقريبا ٢٤ ساعة يكلمني لو ماكان معاي .. اهو وايد حنون وطيب والحب الي بينا كأن حب سنين طويلة وربي يشهد وهم انا مو مقصرة معاه نهائيا ودايما يقول لي هالكلام ( اهتمامج فيني اكثر من اللازم وأبدا مو مقصرة معاي بولاشي ) .. لما أكون جدام عينه كل شي يكون بينا اكثر من حلو لكن من ابتعد عنه يصير إنسان ثاني عصبي جدا ويدور عليي الغلط يشك فيني لدرجة كبيرة بعطيكم مثال ( لو نام ساعة وقعد من النوم يكلمني يسألني شنو سويتي لما انا كنت نايم اقول له كنت اطالع التلفزون مايصدقني يقول اكيد سويتي شي غلط اكيد كنتي تسوين شي وماتبين تقولين ويتم يضغط عليي بالكلام ) علما ان إنا لما أكون بالبيت من افتح عيني اكتب له بالتفصيل الممل شنو اسوي يعني بدخل المطبخ بدخل الحمام بطالع فلم بنظف بدخل غرفة امي كل شي اكتب واصور له ولو تاخرت نص ساعة وماصورت شي او ماكتبت شي يشك ويتهاوش معاي .. بختصر لكم حياتنا مع بعض باليوم أكلمه اكثر من ٩ او ١٠ ساعات عالخط معاه طول ما اهو بالدوام ولو يسكره نص ساعة او دقايق ويرد يكلمني .. اذا صك الخط ومرت ساعة ماكلمته يزعل ويشك ويتهاوش معاي ان ليش ماتصلت فيه واذا عَصّب يغلط عليي بالكلام ( كلام مسيئ وبذيئ مثلا آكلي ... او غبية او بقرة وغيره ) ويسكر الخط بوجهي يقول لي اذلفي .. طبعا دائماً انا لما يتصرف معاي هالتصرف حتى لو انا مو غلطانة أرد اتصل فيه ورى بعض لما يجاوبني وأصيح واترجاه يسامحني وأتأسف منه يعاقبني بالساعات ولا بالايام بعدها يسامحني ويرضى عليي رغم ان اهو غلطان .. دائماً يجوفني انا غلطانة ف كل مشكلة مايعترف بغلطته أبدا .. وانا ما أنكر اني أغلط لكن اغلاطي بسيطة واهو يكبرها ويجوف ان اذا سامحني شي كبير .. مشاكلي معاه كلها بسبب شكه وبسبب أسلوبه معاه يعني يستفزني دائماً يحسسني اني اخاف منه وإني ضعيفة وإني ما اقدر أرد عليه اذا غلط ولا اقدر أرد له طلب ولا اقدر اقول رايي وكلامه الي يمشي ويقول لي بالحرف ( مثل الجلب تنابحين ) واهو مايهتم .. اغلب كلامه معاه بضحك يعني لما يقول لي ياغبية يا بقرة يا وَيَا وَيَا اتقبلً منه وانا اقول له نفس الشي لان نكون نضحك لكن لما يعصب ويتهاوش معاي يكرر الكلمات ويوصل للسب وانا اقول له كلمني عدل واحترمني قاعد تغلط عليي بأسلوب حلو او ببكاء يرد عليي موب عاجبج ذلفي وهذا أسلوبي موب عاجبج كيفج .. تعبت من معاملته لي سويت كل شي عشان ارضيه وابعد عنه الشك ( تخيلو متزوجة مِن ٩ شهور ولليوم ماطلعت طلعة وحدة من غيره مع ربعي الا اذا بطلع ولدي وهذا طبعا صار يمكن ٥ مرات من تزوجت لليوم .. حرمت نفسي من اهلي ومن صديقاتي حتى الانستقرام والسناب شات ماقمت افتحهم بسبه شكوكه ماعندي ولاشي اسويه بحياتي غير اطالع التلفزون وحتى لما اطالع التلفزون يشك فيني ومايصدقني ماعرف شنو الحل معاه ( انا مرتاحة معاه بالرغم ان ماعنديً احد بحياتي غيره حتى لو ماجوف احد ربي يشهد ان معيشني بكل حب وحنان لكن من يعصب يتغير كل شي وأتم بروحي بالايام بحقرانه لي .. امس صارت لي مشكلة معاه ولأول مرة أغير تصرفي معاه وماعرف هل هاي التصرف صح او غلط واحتاج نصيحتكم ... كنت أكلمه عالخط معاه واهو طالع يأخذ خدامتهم من المطار لما وصل المطار لاقى شخص يعرفه ووقف يسولف معاه وانا عالخط قال بتم معاه ربع ساعة لما الطيارة تنزل ف انا قلت له بلعب بالتلفون لعبة بتة قال لي اوكي وتميت العب وكل شوي يسألني شنو تسوين أردت عليه العب وبس يتم يسولفً مع الريال لما سمعته قال للريال بروح اسحب فلوس تحت وبرجع لك وتم يكلمني تقريبا دقيقة وانا باللعبة العب عشان انهيها ( علما ان اللعبة اهو معلمني عليها ) الا يقول لي انا اكلمج وانتي تلعبين براويج وتم يهددني ويقوًل لي بسوي مثلج وانا اقول له الحين أنت مخليني عالخط وتسولف مع صديقك عادي وانا لما العب غلط وتم يقول لي آكلي .... وبراويج يا .. وَيَا ... سكتي ولا بخليج تتحسفين واتيين تصيحين وتباعرين ( لاني طبعا دائماً أصيح اذا عَصّب عليي فتعود اني أصيح .. ويقول لي لاتمصخينها وسكتي احسن لج .. قلت له مصختها وانت تقول لي كل مرة تصيحين وتصيحين دموعي موً لعبة ولو صحت لاني احترمك ماقدر أرد عليك ف انقهر وأصيح وقام وسبني وصك الخط بويهي رديت اتصلت فيه قلت له تصكه بويهي عشان موضوع جذي عشان قلت لك لاتمصخها وانت قبلها تقول لي لاتمصخينها تحلل على نفسك الكلمة وتحرمها عليي وانت من مساعة تسبني وانا مارد عليك الا يقول لي اي اصكه ف ويهج لانج سفلة ويردد الكلمة سفلة وسفلة وسكتت انا مدة دقيقة وتميت أصيح بصوت خفيف واهو يتكلم مع الريال مرة وحدة قال لي ذلفي وصك الخط بويهي وهذا الموصوع صار امس بالليل والى الان ماكلمني نهائيا وانا لأول مرة ما أكلمه ولا اكتب له ولا كلمة ولا اعاتبه ولا اطرش له شي قلت بجرب معاه أسلوب الحقران عشان يعرف غلطته ويحس ان وايد غلط عليي بالكلام امس ف هل هالتصرف صح آو غلط وشنو تنصحوني فيه مابي اخسره وتعبت وايد والله يشهد ان حياتي كلها صارت ملكه لدرجة أمي واخواتي واخواني مستغربين مني اني تغيرت كليا لا اطلع ولا اتصل فيهم ولا اجوفهم كله بالبيت آو مع زوجي .. ساعدوني أرجوكم بدون تجريح وانت عارفة ان غلطتيً من البداية معاه أني سكتت عنه وعطيته كل وقتي وصرت له كتاب مفتوح وعودته ان اي شي يطلب مني أقول له تم وحاولت أغير هالشي باني اتغير شوي لكن جفت ان زادت المشاكل بحكم ان يقول ليً تغيرتي واكيد عندج شي ولا ف راسج شي شنو الحل معاه ؟؟