كيف أتعامل مع خطيبي.. استشارة

السلام عليكم ورحمة الله وبركاته
أرجوكم حابة أستشيركم في موضوع مرة مضايقني ومرة محتارة فيه..
أنا مخطوبة من سنة تقريبا لشخص.. هو مايقربلي بس بين أهلنا نسب وصلات قوية..
من 4 أشهر تقريبا بديت أكلمه على المسنجر.. وبيننا مسجات جوال.. ولا كلمته على التلفون..
وهذا الشيء حصل بموافقة أهلي وعلمهم..

في البداية كانت مواضيع عادية جدا.. يعني عن الدراسة وكدا..
والآن بدأت تتطور هالمواضيع شوية.. ماوصلت لدرجة مواضيع الحب مثلا.. يعني مابيننا كلام حب صريح.. لكن بعض التلميحات البسيطة الي ممكن تصير بين أي خطيبين.. وصار تبادل للصور كمان..
ولما تخرج قريب.. جبتله هدية تخرج.. وحطيتها له في محل وطلبت منه ياخذها..

أبغا شوركم.. هل ممكن تقل قيمتي عنده لأني أكلمه عالمسنجر وأضحك وأمزح وأقول كلام حلو؟؟ أنا مرة مرة مرة رومنسية بطبعي وطول عمري كنت منتظرة يجي الإنسان الي يستاهل عشان أعطيه المشاعر الي عندي..
أمي اليوم قالتلي كلام مرة ضيق صدري .. تقول اثقلي كدا ممكن تقل قيمتك عنده.. هو مرة حبوب وطيب الحمد لله ومحترم مرة كمان وماقد قال كلمة وحدة خارجة عن الطريق..
كيف ممكن أثقل بعد ماكنت عادي معاه أحكي وأمزح واسأل عنه زي مايسأل عني؟؟ بيحس اني تغيرت فجأة صح؟؟
وهل ممكن فعلا يفكر فيني بشكل غبي؟ أرجوكم أبغا مساعدة.. ما أبغا أسحب نفسي تماما.. بس ما أبغى قيمتي تقل عنده لأن ربي يعلم نيتي والي في قلبي..
على فكرة انا ملكتي ماتحددت بس غالبا بعد انتهاء هالترم لأن خطيبي دوبه تخرج ولسة ماتوظف..
شكرا لكم.. وآسفة إذا طولت عليكم