:41::41:السلام عليكم ورحمة الله و بركاته
أطرح بين أيديكم تجربتي و الدروس التي استفدتها من استعدادي لسفري لامريكا.
آتمنى أن تكون مفيدة للجميع مع الأخذ بعين الاعتبر آن بعض الاشياء التي ساذكرها قد تختلف من شخص لاخر. و اسمح لاي شخص آن ينقلها لإي منتدي لتعم الفايدة.
بسم الله نبدأ،
راح اتكلم عن الاشياء الي تاخذينها معك و تنقسم الي اربعه اقسام:
الزوج:
-خذي لزوجك لبسه (وحدة كفايه) كامله من الثوب و الغتره و الطاقيه و العقال و ملابس السنه لانه راح يحتاجها في المناسبات كالاعياد.
-اذا من النوع الي يحب قميص البيت خذي له كم حبه.
-خليه ياخذ كم كتاب عربي للقراءة.
-الاوراق الازمه للجامعه سوا لك او لزوجك وهي كالاتي: صوره من الوثيقه و السجل الاكاديمي مختومه بختم ازرق و توضع في ظرف يغلق و يختم من برا، ٣ توصيات من الاساتذه تكون علي شكل براقراف و شرح و فيها اسم الاستاذ و ايميله و مختومه بختم ازرق و في ظرف مغلق و مختوم من برا. تاخذون كذا نسخه لان اغلب الجامعات في امريكا ما تاخذ الا الاوراق الرسميه مرسوله من الجامعه و هذا استحاله من جامعاتنا السعوديه ترسلها لذالك اذا كان عندك نسخه مغلقه تقبلها. و التوصيات حقت ابو صح ما تمشي في اغلب الاوقات. لازم تاخذون هذي لالوراق و لا تغلطون نفس غلطي تبهههههذلت و راح عليه التسيجل و خليت اهلي يرسلونها لي بالبريد و كم ورقه كلفتني ٥٠٠ ريال و كل مرة اخليهم يرسلون لي شي.
نفسك:
-الكريمات الي تستخدمينها و تتوقعين ما راح تلقينها في امريكا خذي منها كميه مثل الجلوسريد و الجلوسرين و كريم ٢١ صابون مغربي الخ.
-بجايم و ملابس النوم بصراحه انا لي سنتين و ٣ شهور في امريكا ما بقيت سوق الا ودخلته بجاااايمهم زفت و مديلاتها مو حلوه بصراحه صرت كل سنه اذا رجعت السعوديه اشتري من سنتر بوينت و ستي ماكس. و ملابس النوم هنا اغلبها سنتيانات و كوتات قمصاني من نعومي اخذتها و استفدت منها.
-اذا عندك طقم مناشف حلو و غالي انصحك تاخذينه ارواب الحمام هنا مش و لابد.
فصلي لك مجموعه عبايات لاتقل عن ٦ تكفي لمدة سنه و خليها عمليه مش طويله تسحب و لا واسعه كثير و اكمامها صغار لانك راح تستخدمينها كثيررررر.
-جبي لك عبايه سودا و طرحتها تحتاجيننها في المناسبات.
-القبعه حقت الشعر الي تلبس تحت الحجاب مثل حقت الشغالات خذي كم حبه
- دبابيس لتثبيت الحجاب.
-جبي لك حلاوة لشيل الشعر لانك ما تلقينها و اذا دخلتيها في الشنطه غلفيها باكياس عشان ما تنكب و تعدم عليك الشنطه.
-اذا تستخدمين اي علاج خذي منه كميه لانك ما تدرين متي تاخذين التامين مثل حبوب منع الحمل خذي لك كمييه.
-مدخنه و بخور وعود و دهن عود و مسك.
- ٢سجاده لك و لزوجك و شرشف الصاله. و لو عنك مجال في الشنطه خذي لك زيادة يمكن تتعرفين علي مسلمة و تهدينها لها.
- خذي لك كم حبه من سجدات الجيب مرررره عمليه لانك تقضين وقت طويل خارج البيت تاخذينها في شنطتك
-مصاحف لك و لزوجك . لا تقولين باقرا القران ع الجوال و لا الاب توب تحنييين للمصحف يكون بين يديك.
-ساعة الفجر ضروريه في البيت.
-جبي لك كتب عربيه لقراءة لانه راح يكون عندك وقت طويل.
-قاموس انقليش عربي الكتروني.
-جلابيه (اذ تحبيها لتلبسينها في المناسبات)
- ما انصحك تجيبي ملابس سهرات و مكياج كثير لانك ما راح تستخدميها كثير.
الأطفال:
-اكيد كل ام عارفه اش تاخذ لطفلها في السفر بس الي حابه انبه عليه اذا طفلك بيرضع حليب معين جبي له الي يكفيه شهر. لان هنا مو كل الانواع متوفره و كمان لو غيرتي عليه الحليب علي اول ما توصلين مع بهذلة الفنادق و البحث عن سكن و لاثاث و و و بتتعبين مررره.
- جبي لاطفالك قصص عربيه و كتب حتي ما ينسوا اللغه.
- الملابس لكل العايله لا تكثرين خذي الي يكفيكم حق ٢-٣ اسابيع لاين تستقرون و بعدها روحي قضي براحتك.
المطبخ:
-قهوة و تمر و الكميه ع حسب استهلاكك خذي الي يكفيك سنه. و لو الوزن كثير ممكن ترسلينها شحن. بس خذي معك في الشنطه كميه صغيره تستخدمينها لاين يجي الشحن. او ممكن تضيفي شنطه زياده لشناطكم و تدفعي عليها و هذي الطريقه اسهل و اضمن للوصول لان الشحن ممكن يرفضوا لاكل.
-هيل
-خلطة القصيم و الزعفران.
-بهارات، قرفة، ليمون اسود
-حبق مجفف
-جريش ( مع انه موجود في البقالات العربيه)
-عسل اصلي ( اذا حابه مع انه مو ضروري)
-مره ( بصراحه مهمه احتجتها يوم شلت ضروس العقل اعطتني جارتي الله يجزاااها الف خير ما نفعني بعد الله الا هي)
-اي عشبه تشوفيها ضروريه جبي معك.
-من تجربتي بصراحه كنت احط الاكل في الشنطه و استودع الله و ماكانوا في المطار يقولون شي. بس سمعت و قريت كمان ان في بعض المطارات يفتشون الاكل و اذا ما عليه تاريخ صلاحيه ما يسمحون لك تدخاينه البلد. و لو شحنتي لازم تحطين علي كل شي استكر تاريخ الانتهاء.
-جبنة كرفت السائله اذا كنتي مدمنه عليها ( اشوف انها ماهي ضروريه).
-خذي ترامس للقهوة و الشاي ( صغيره) و سلتها.
-فناجين القهوة و الشاي.
-ابريق لشاي و ابريق للقهوة.
-صحن التقديم.
-لو حابه جبي قدر ضغط( مع انه موجود في الاسواق العربيه بس جودته مو عاليه و كمان فيه في لاسواق الامريكيه بس شكله يختلف شوي).
ملاحظات:
*ما انصحك تجيبن اجهزه كهربائيه الي تشتغل ع خط واحد ماراح تستفيدين منها.
*لو فيه مجال في الشنطه لا تخلينه فاضي حطي اي شي لان الحياه في اغلب المدن غاليه شوي.
* تأكدي من الخطوط الي راح تطلعين عليها كم تسمح لشخص بشنطه و كم وزنها( في الغالب يسمحون بشنطتين لكل شخص ٢٣ كيلو للوحده)
* ميزان الشنط مررره حلو و ضروري و بصراحه ما ادري هو موجود في السعوديه و لا لا انا شريته من هنا من محل اسمه مارشالز و مررره ريحني.
* في المطار البسي لبس مريييح و جزمه مررررريحه لان الرحله تكووون طويله.
* اذا عندك اطفال خذي لهم في الطيارة لبس ثقيل لان المكيفات بارده و تقضين في الطياره مالايقل عن ١١ ساعه.
* شنطتك اليد لا تكون ثقيله لانك بتتعبين و انتي تشيليها في المطار.
* خذي لاطفالك كتب تلوين و قصه تقراينها عليهم لان الوقت طوييييييييل و مممل.
هذي خلاصة تجربتي آتمنى آن يفيدكم الموضوع!!
مع خالص تمنياتي لكم بالتوفيق و لا تنسوني من دعائكم
Gentlebreeze47
الله يجزاك خير اختي