كيف أهدي زميلتي إلى الصواب

سلام الله عليكم ورحمته وبركاته

عندي زميلة بالعمل واهي اقرب من الاخت بالنسبة لي طيبة وحبابة وتصلي وتصوم واخلاقها تمام

بس عيبها الوحيد انها تكلم رجال غير زوجها وخارج محيط العمل

طبعا تكلمهم من غير اذن زوجها واغلبهم اصغر منها بكثير وتقول انها تعتبرهم مثل اولادها

لما عرفت هالشيء ضايقني خصوصا انها ترتاح لي وتكلمني عن كل شيء وان علاقتها وياهم ماتتعدى الدردشة

اهي انسانة تخاف ربها بس مادري ليش تكلمهم

وجيت مرة وكلمتها قلت لها عارفة انك ماتعديتي حدودك وياهم لاني عرفتك لمدة طويلة وعارفة اخلاقك بس بالنهاية اللي تسوينه غلط وقلت لها ترضين لو زوجك يقوم بمثل هالشيء

وتخيلي بيوم اكتشفتي ان زوجك يكلم بنات شنو راح يكون موقفك

قعدت تفكر لحظات وبعدين قالت لي لا تقعدين تعقديني وخلاص
ومشت عني ولاحظت انها ماتخبرني شنو يصير وياها ولا تفتح لي قلبها

بعد كذا يوم بينت لها اني لاني احبها خبرتها بهالشيء واهي حرة

طبعا واهي لا زالت تقول لي انها تكلم فلان وعلان وشنو صار وياهم اكتفي بالاستماع لا اكثر ولا اقل

في يوم كنت رايحة المجمع مع زوجي قلت خل اسلم عليها لانها دايم هناك و تودي اطفالها

الا تقول لي ماشفتين وجه مألوف قلت لها مادري الا تقول فلان هني

حسيت اني انحيطت بموقف لا يجسد عليه وتضايقت مرة خصوصا انها قالت له عني بحسب كلامها وانه متوقع يشوفني وياها بهاليوم

يالله تمنيت الارض تبلعني ولا اني امشي مع انسانة ناس كثيرة تظن انها بايعة نفسها وبالتاكيد دام اني وياها يعني اني مثلها

طبعا زوجي لاحظ اني زعلانة ومتكدرة نفسي وخبرته باللي صار وانصدم بزميلتي قال انا كنت اثق فيها خصوصا انها حرمة بنهاية الثلاثين يعني واعية وفاهمة

وقلت له خلاص ماعاد توديني هالمجمع لو شنو صار

ومشت الايام
الا واليوم وانا اكلمها على المسنجر تقول لي بسوي اضافة لفلان ويانا توني بقول لها اسفة الا ضافته سكرت المحادثة على طول وكلمتها بمحادثة ثانية

اني ماحب اكلم رجال من ورى زوجي قالت لي لا هذا ايميل مابتكلمينه قلت لها فيه حديث يأمرنا بحفظ ازواجنا حتى واهم غايبين وانا راح احفظ زوجي وبكون عند ثقته لاني ماحب اني اكون بمثل هالموقف بيوم من الايام واكتشف انه يكلم بنت

قالت لي براحتك

يابنات والله مو عرافة شسوي

احاول ابتعد عنها بس العمل يفرض هالشيء وماابغي اتطبع من طباعها مع الايام وبنفس الوقت ابغي ارشدها
خصوصا انها تغضب زوجها وربها باللي تسويه وتعطي الناس فكرة موزينة لا عنها ولا عن اللي معاها والدليل هالمحادثة اللي جت بطلب منه اهو

والمصيبة ان زوجها هاملنها حتى من حقها الشرعي الا وقت مايبغي اهو احسها تعوض فقد حنان زوجها باشخاص اصغر منها

قولولي شنو الحل