لا تخربين حياتك ولا تطلبين الطلاق..
اذا يحبك وشاريك خليه يعاهدك بالله ويحلف ع المصحف ماعاديسافر دبي نهائياً لا لشغل ولا لغيره
ويعاهدك ماعاد ينام مع اي أمرأه
ويعاهدك يخفف علاقته مع اصحابه اول شي سهراته اللي كل ليله تكون يوم بالاسبوع فقط الى ان يقطعهم نهائي وآخر شي ضروري ضروري ضروري يعمل تحليل الامراض الجنسيه تراها ماتطلع لها اي اعراض لمدة سنين مرض صاااامت فترة حضانتها بالجسم طووويله
وراقبيه فترة وادعي له و شوفي كيف يتغير والا نفس الوضع

انت تفكرين بالناس والمجتمع وعمانك وانك على قولتك تزوجتي بعمر كبير طيب عمر كبير والا صغير ماتبين تكونين بكامل صحتك الجسمية والنفسية عشان على الاقل تعرفين تربين ولدك ؟
طيب لو جلستي عنده ممكن مايكون بينكم علاقة على الاقل تضمنين انه ما ينقل لك امراض ؟ لا تفكرين انك بتحاصرينه وتمنعينه من السفر وتنتهي مشكلتك حتى لو ماسافر مادام هالشي في باله بيحصله في كل مكان
عموما انا انصحك انك تروحين مستشارة اسرية والله يوفقك

الامارات كلها ايدز واعرف شخصياً مجموعة ناس تتعالج حالياً والسبب السفر للامارات
انا متطوعه بجمعية المتعايشين مع الايدز وشوفي الحريم من وين يجيهم كله من رجالهم راعين السفريات والخراب
والرجال بعضهم سافر لمرة وحده ورجع معه المرض
خصوصي الامارات منتشر فيها انتشار مو طبيعي انتبهي لنفسك وبس.

وش هالمواجهه البارده اللي خلته يرجع يتكلم معاك في المستقبل وولدك وينكر بكل بجاحه..
للأسف غلطتي غلطة عمرك بهالمواجهه اللي أعطيتيه فيها فكره اني ممكن اصبر واصدقك..


المواجهه ياانها تكون حاسمه وتقلبين الدنيا على راسه ويكون معاك أكثر من دليل وتخيرينه بينك وبين الوساخه وتطلبين منه فحوصات تثبت خلوه من الأمراض الجنسيه ولا بلاها من مواجهه..


زوجك مسكين باين انه غايص في هالمستنقع وصعب يخرج منه ولو خرج يخرج علشان خوفه من الله مو علشان احد، ومحاط ببؤره فاسده من الأصحاب يعني ابتلاءه عظيم ومتشعب..


للامانه ووجهة نظري الشخصيه البقاء معه فيه خوف عليك وعلى صحتك فما انصحك الا لو تاب، هذا قاعد ينكر وانتي واجهتيه بطريقه بارده ماححسستيه بفداحة المصيبه..


لو ماترك أصحابه واعطاك تحليل وبطل سفريات ماانصح تستمرين معاه لو معاك عشر أطفال،
الا حدود الله، في مشاكل عاديه تصبر عليها الزوجه لكن لما تتعدا حدود الله وتوصل للزنا لا والف لا..


ولاتخافين من احد اذا طلبتي الطلاق محد عايش معاك ولا احد بيشوف اللي تشوفينه، وانتي بعمر كبير وموظفه منتي صغيره او مراهقه ينخاف عليها امرأه ناضجه لو اقدمتي على قرار لازم الكل يحترمه وانتي اللي تقدرين تفرضين هالاحترام ولا تنتظرين رأي احد في حياتك..


انقهرت عليك الله يعوضك خير ويصبر قلبك ويعوضك افضل منه ❤️❤️

شوفي حبيبتي .. مادام انت متأكدة من خيانته وعلاقاته انتهى الموضوع بالنسبه لك وأتوقع بل متأكده انه مات في عقلك وماعاد له أي وجود.
ومادام ماعندك ظهر ولا سند يؤيدونك ع الطلاق ويوقفون معاك .
أفضل حل لك تكلمينه بينك وبينه انا هنا أم لولدك فقط ولا بيني وبينك شيء لك حياتك ولي حياتي وأنا حياتي خليتها لهذا الولد علشان مايعيش بعيد عن ابوه وعلشان ما اجيب سمعتك بالعاطل قدام اهلي وقدام الناس .