كيف اتصرف بعد رجوع زوجي من السفر؟ابي رأي سديد

مرحبا


خواتي أنا زوجي سافر وتركني من بعد العيد على طول، وله اكثر من 3 اسابيع .. طول اجازة الصيف ما عبرني والعيد ابدا ما حسيته معاه حتى ما عايدني ولا باركلي ولاشافني بكشختي صباح العيد بعد ما لبسته وعصرته ودخنته راح للصلاة ولا رجع الا بعد الظهر وانا وقتها كنت مواصله فيوم اذن غيرت لبسي وصليت ونمت .. ابداولا كأنه عيد وهذا اول عيد لي معاه.. طبعا لا هدية ولاعيدية حتى بالكلام ما عايدني وانتظرت قلت يمكن مسوي مفاجأة معنه ما قد طلع منه ومرض ليلة العيد وجلست معاه 3 ايام ويوم طاب على طول سافر ولا عبرني .. صحيح انها مهي سفرة تمشية ولا شغل لكن كان عنده هو ابوه واخوه موضوع ويبغون يخلصونه .. والموضوع ما ياخذ له اسبوع لكن تمادى معني قلت له حدك 10 ايام .. 

المهم هذي الاجازة خلصت وانا نص تمشية ما رحت ولا شفت شيء منه فالعيد.. نفسيتي تعبااانة لها اسبوعين كله ابكي وضايقة فيني..

من يوم عرست ولا معبرني ولا حتى بوردة من الشارع مع اني ياما لمحت له وفهمها لكن بدون نتيجة..

ومن يوم عرست لا تمشيات ولا سفرات ولا ولا زي ما وعدني ايام الملكة ودايما احس بالنقص وانقهر من خواتي وامتزوجات عايشين حياتهم وانا لا ..

وكثير اشياء لكن مشكلتي اني قررت إذا رجع ما ارجع له لاني حاسة اني زوجة للاجار 
كل ويكند مفرورة لهلي لانه مو فاضي لي .. 
ما وضع حد بيني وبين اهله ،، كل شيء يصير على حسابي أنا وانا اكلها بالحرمان
ما عمره حسسني انه بالفعل متذكرني ومحترمني ويقدرني على الاقل تصبيرة لين تخلص اموره لكن لا ، ما حسيت انه يبغى رضاي ويبغى يكسبني ويسعدني 
حياة زوجية خالية من كل شيء معنوي ومادي فيها حتى كلام حلو مافي
كأني اخته وزيادة عدد فالبيت مالي اي قدر ولا يحسب لي حساب

هو صحيح اعترف لي بهالشي لكن المفروض ما تكون لهذي الدرجة ولو ظروفه تحكمه على الاقل يكون فيه شوية مودة ،تعبت أنا ما اقدر اصبر اكثر ، وامانة هو مو مقصر معاي وكريم لكن صبري نفذ هذا من يوم عرست كذا يعاملني واخاف يتعود 

ايش اسوي وايش اقوله له؟
ارجع له ولا اخليه يحس بقيمتي؟
ادخل ابوي ولا اخوي بالموضوع؟

وشي ثاني غرفتي مابغى ارجع لها ، أنا عندي شقة جديدة بس لسى ما سويت ديكور واذا رجعت ابي اروح لها لاني كرهت غرفتي القديمة بعد ما اخته دخلتها وفتحت كل صغيرة وكبيرة من كبت وادراج واكسواراتي غيرت وحطت وسوت اشياء كثيرة.. رحت لهم اسلم ولقيت غرفتي كذا لين جاني اكتئاب وبكي وظليت جالسة لحالي عالزاوية ابغى اتصل فابوي اقوله يلا نمشي..


بايش تنصحوني؟!