كيف اتصرف معه احس نفسي بديت اضعف ومابي اعتذر

السلام عليكم 

بنات انا لي اسبوع ويومين عند اهلي عندي بنت صغيرة 

اول شي بكلمكم عن زوجي هالفترة 

انا من ثمانيه شهور طالعه من النفاس وكنت مع زوجي عااادي وعلاقتنا حلوة بعد تقريبا ثلاث شهور بدت حياتنا تنقلب 

اشياء كثير تصير وانا صابرة بس خلاص مليت مادري كيف ابدا بالقصه


اول شي هالفترة زوجي ماصار يتكلم معي ابد ابد الا ننااااادر طول الوقت ع جواله واحيانا اشوف الجوال مافيه شي بس شغل وهو من قبل دايما مشغول بس كان يسولف معي يقدرني

الحين مايكلمني ابددد احاول احيانا ابدا اسولف مايرد علي ايه نشوف كذا بس احيانا اقول سالفه مايتفاعل 
كم مرة فتشت جواله مالقيت شي وانا مااتوقع منه انه يكلم ابددد بس صار يبدي شغله علي 
هو يرجع من الدوام الساعه 12 الظهر نتقهوا اول مااجيب القهوة يتقهوا بسرعه ويمسك جواله وخلاص اكمل قهوتي لحالي وانا ساكتة قلت يمكن سوالفي ماتعجبه صرت اسولف عن البنت واطوراتها انها صارت تسوي كذا وكذا يبتسم ورد بسيط كانه يسلك لي وخلاص صرت اكره اكلمه 


غير كذا احسه مايخدمني بشي ابد ابي غرض ابي شي مستحيل احيانا يكون عندي استراحة ونكون مقسمين الشغل انا اخذ اسهل شي عشانه ومع هذا مستحيل يسويه يقول ليه حنا بس اللي نجيب احاول افهمه ان الشغل مقسم مافي فايدة اروح اطلب من اهلي يجيبونه وكانه انا اللي جايبته
يعني انا طلباتي مرفوضة ماعدا الاشياء الاساسيه مررررة اللي هو اكل ولبس واللبس بالحسرة اما الاكل حاضر فيه عشانه مو عشاني 
اي شي هو له فيه او لبنته بيسويه اما لي خاص مستحيل تعبت 
طبعا مو بخل منه الحمدالله بس ماادري وش اسميه 

تخيلو اترجاه مكيف بالمطبخ ماقال لا يقول نشوف نشوف لي ثلاثة شهور ابيه طبعا انا من زواجي ابيه بس كان فيه غرفة قدام المطبخ مخلية مكيفها دايما شغال وشبه مكتفيه الحين الغينا هالغرفة والمطبخ مافيه درايش والله كم مرة ارش وجهي بموية من الددوخة اللي تجيني مع الحر 
والقهر انه لما خرب مكيف غرفة النوم وهي مفتوحة ع غرفة ثانيه ومكيف الغرفة الثانيه باااااارررررررد يعني لو نفتحه ساعه ونسكر الغرفة يكفي بفهمكم انه فيه بديل مو ملزومين بمكيف الغرفة 
والله العظيم ماكمل يوم ونص الا جاب مكيف جديد وشال الاول مع ان خرابه بسيط انا بعد هالسالفه وانا كارهة نفسي 
مو كله عشان مكيف بس انغبنت 

اقول له طيب ليه ماجبت للمطبخ يقول مو ضروري المطبخ شوي وخلاص بس هذا نوم اقرل من قالك شوي انا نص يومي بالمطبخ يقول بجيب بس اصبري علي قبل كنت اصدق واصبر بس ليه للغرفة يوم واحد جا المكيف وللمطبخ اصبر !! حاولت اترك الطبخ ماقدرت احس نفسي ضعيفه اقول بتركه واذا جا وقت الغدا سويت 

هو من بعد ولادتي بشهرين واعدتي بمطبخ ولا شفت شي للحين انا ماهمني مرة بس هو اللي واعدني 


الشي الثاني كرهني بالطلعات مستحيل اطلع مكان مع اهلي ويرجعني هو 
انا اروح لاهلي يوم الخميس اذا كنا بنروح زيارة ياروحي العصر ياروحي مع اهلك اذا الطلعه استراحة عادي اروح العصر بس زيارة مستحيل 
والرجعه هالكم شهر مايعرفها لازم مع اهلي انا عندي اخواني اثنين منهم عادي ارجع معهم وانا مجبورة اما الباقي لا هم بلسانهم يقولون ليه نرجعكم وازواجكم جالسين بالاستراحة ماشاءالله اختي معد صارت تجي معهم عقب هالكلمة رجلها يوديها ويجيبها بس انا غصب حاولت حاولت ماقدرت يقولي ماتبين لاتروحين طيب انا ابي اروح اساسا والله العظيم طلعاتي مررررة قليله تقريبا مرة مرتين بالشهر بس 
ولو جلست ومارحت راح يعجبه الوضع ماراح يتضرر لان مسألة انه بيرحمني مستحيل الا اذا السالفه فيها ضرر عليه ممكن اما لي مستحيل 

انا لي شهر وانا طفشانه احس نفسي خدامة بالبيت اعطي بدون مقابل الا مصروف بسيط شهري مايغطي الا صرفي بييت اهلي لي شهر اقول بروح بيت اهلي يمكن يتعدل بس مااروح 

يوم لخميس من الاسبوع اللي فات كانت هالاسبوع علاقتنا حلوة لاني تقريبا عرفت اتعامل معه شي مبدئي جدا 
المهم يوم الخميس الصباح ارسلتله اني ودي نغير جو ونتغدا بمطعم وكذا ووافق 
لانه من فترة طويله تقريبا اربع شهور مادخلنا مطعم ومادري وشفيه يلززم اني اطبخ .. قبل كان يوم الخميس والجمعه مايهتم ونروح للمطعم مرة مرتين بالشهر ضروري  
المهم وافق ورحنا وعلى اني بطلع من الممطعم ونروح بيت اهلي لانه كان خميس  واحنا هناك مبسوطين خلصنا غدا وارسلو اهلي انهم بيروحون بيت اختي وبيتها قريب مرة من بيت اهلي 
قلت له طبعا ف البداية قال لا مايبيني اطلع اي مكان بس اسبوعيا روتين اروح لاهلي الخميس ولا ارجع الا السبت تعبت بس ساكتة عشانه عشان يسهر وينبسط خصوصا ان معي بنتي صغيرة واتعب منها 

المهم حاولت فيه قال بحطك ببيت اهلك وروحي معهم قلت لا انت ودني وانت رجعني اهلي مو ملزومين فيني 
انا هالفترة عرفت ان شخصيه زوجي يحب المراة الواثقه وتلزم ع طلباتها وانا نفذت هالشي 

المهم قال لا وانتي شفتينا مبسوطين وجيتي تعاندين بنات بالله وين العناد فيه لما اقول بزور اختي ؟؟؟؟ ابي افهم هو مو من واجبه يوديني ويرجعني انا مو مطلقه عشان ارجع مع اهلي لو مطلقه كان شالوني فوق رووسهم بس هو ملزوم فيني خصوصا مع بنتي ماارتاح اروح مع اهلي شنطة ومفرش ومدري ايش !! 

المهم تهاوشنا اخر شي قال خلاص بحطك الحين والمغرب بجي اخذك ونروح بيتنا قلت مو مشكلة لاني عارفة انه ماراح يروح للاستراحة ويخليني بالبيت وبينقهر لو جلست بالبيت 

المهم صار يقول ليه اخوانك مايودونك وانا عارف انهم يتكلمون سكتته قلت لاتجيب طاري اخواني وماعمرهم تكلمو بس انا تعبت واحس اني اضايقهم ومعي بنتك لو اني لحالي مو مشكلة طبعا هذا كله بالطريق لاهلي انا ساكنة بعيد 

المهم اتفقنا انه بيجي ياخذني المغرب وهو يحس نفسه بيقهرني وبقول خلاص بروح معهم 

المهم اختي قامت تكلمني وتحاول فيني اجي وتقول هالمرة تعالي مع اهلي بعدين كيفك طبعا هي عارفة السالفه قلت بروح معهم عشانها المهم صار من حظي ان اللي بيوديهم اخوي اللي اشد واحد معارض انه يودي وحدة متزوجة يقول ابي مصلحتكم المهم قالتله امي ان زوجها بالدوام وعيا يوديني انا ابدا ماالوم اخوي لان فعله صح طبعا اهلي راحو مايبون يردون عزيمة اختي 

المهم انا صرت ببيت اهلي لحالي ووقتها حسيت الدنيا ضايقه علي واهلي راحو صرت لحالي بالبيت 
قمت مسكت الحوال وارسلت لزوجي 
قلت لعد تجيني ولا ابي اشوفك لاني زهقت من العيشة اللي انا فيها لما تتعدل تعال خذني 
رد برد طويل بس اختصاره انه اذا ماله من العيشة عندي عيشي عند اهلك اما اني مااجيك ابشري ماراح اجيك واذا بغيت اشوف البنت بجي اشوفها ولا اشوفك معها تتميلحين .. انا هالكلمة جرحتني كثير 
بعدها بيومين كان عندي مناسبه ومهمة مرة ارسلت اني بروح قال ماتطلعين من بيت اهلك وانتي ع ذمتي الا للمستشفى 
رديت قلت كالعادة تبي تضغط علي عشان ارجع بدون شي بس هالمرة ماراح ارجع قبل ماتعطيني وعد انك تتعدل معي .. من  شهر ابي اسوي هالشي بس صابرة عشان البنت وبعد كم يوم بجي اخذ اغراضي 

طبعا قلت هالكلام لاني دايما كذا يضغط علي وااقوم انا اعتذر واقول خلاص انا الغلطانه وسامحني واترجاه عشان يجي ياخذني واصير اطلع واروح 
رد قال 
هههه ابيك ترجعين 
ابشرك مافيه وعد خلك عند اهلك 
وتحققت امنياتك اللي من شهر 
والبيت مو بيت ابوك عشان تجين اي وقت اغراضك بجيبها لك بكرا 
وخلك منتظرة المفاجات الجايه 


انا جرحتي يوم قال البيت مو بيت ابوك هو من زمان كذا يحس البيت ملكه وانا عايشه عنده ما كانه بيتي بعد 

والمفاجات الجايه قصده بيقول بعد كم يوم انه بيتزوج وكذا طبعا انا عارفتها لانه قد سواها قبل وصدقته وصرت اعتذر مع اني ماغلطت وشفت محادثة بجواله عرفت انه بس يهدد انقهرت 

واغراضي ماجابها وكنت متاكدة من هالشي ومارحت انا اخذها حلفت علي امي 

المهم هذا اخر شي صار بيننا 

بعد كم يوم جا شاف البنت وطلعتها امي له لاني ماكنت موجودة

واليوم بعد جا يشوفها بس امي كانت مشغولة واضطريت انها اطلعها دخلت وهو واقف مابعد جلس ماسلمت عليه ولا شي بس قلت السلام  عطيته البنت ودخلت جوا جبت القهوة صبيت له ودخلت وصار فيه اخوي جلس معه بعدها ارسل لي قال تعالي خذيها جيت اخذتها منه ودخلت ماقلت مع السلامه اختي تقولي تزيني وادخلي نصيحة بس ماسمعت لها  انا مجروحة من كلمته يوم يقول لا اشوفك معها تتميلحين 
وش رايكم بتصرفي ووش تنصحوني اذا جاا المرة الجايه ؟؟ 

انا يابنات ماارتاح عن  اهلي خصوصا اني ماجبت اغراض كافيه لبنتي ومهما ككان كل وحدة ماترتاح الا ببيتها 

وانا هالمرة واعدة نفسي اني مارجع من طرفي 
لاني دايما كذا ازعل واروح لاهلي مااكمل اسبوع الا وجايه اراضيه 

انا مشكلتي مااصبر ماحب اكون متهاوشة معه ابي اسوي اي شي عشان نرجع طبيعيين وبنفس الوقت ابي اسوي لي قدر ابيه يحسب لي حساب 

اتمنى هو يكلمني من نفسه والله لو بس يقول اشتقتلك بجي اخذك بدون وعود انه يتغير وبدون حتى مانتكلم ف السالفه راح ارجع بس ودي يجي من طرفه الكلام 
ابي اسوي شي بس بطريقة غير مباشرة وبنفس الوقت مابي اخرب اللي ناوية عليه وارجع له انا من نفسي 
ولا اسكت وبس وش رايكم😭
المشكلة اني طالما انا عند اهلي زعل ممنوعه علي الطلعه قبل كم يوم مجتمعين عايلتنا باستراحة ومارحت لاني مابي استأذنه وبنفس الوقت مستحيل اطلع من البيت بدون اذنه حتى لو متهاوشين وياليته نفع
طبعا انا قلت انه اول مرة جا يشوف البنت ماكنت موجودة مو قصدي اني طالعه من البيت كنت ببيت ابوي لاصق ببيتنا وعندهم عزيمة ونادتنا زوجته رحت بدون لا اسئله والحمدالله ماقال شي 


زوجي شمالي شرقي 

ادري كلامي كثير وملخبط 
بس هو فضفضة اكثر من انه استفسار 💔 

ابي اجوبة حكيمة لاتجي وحدةتقول اطلبي الطلاق لاني ماراح اطلب الطلاق ولا راح اسبه ابداااا 
فكرت ارسله تعال خذ بنتك اهلي مو ملزومين فيها 
عشان يضطر ويرجعني بس خفت مستحيل اترك بنتي يوم بعيدة عني اخاف يصدق وياخذها😓