كيف اتعامل معها؟

هلا خواتي 
انا اسكن بيت اهل زوجي .و البيت مقسم كل واحد له غرفة ..انا الحمدلله تعاملي زين مع اهل زوجي..اخوانه و اخواته و عمتي و حتى جدته الكبيرة. .بس زوجة اخو زوجي الكبير حالة خاصة..
والله ماعرف شو اقولكم..انسانة غريبة عجيبة.بالاول كانت تحرضني ضد زوجي.تقولي خليه يوديكي برع و يدلعك و غيره.ما عطيتها سالفة فما تكلمت  معاي عن هالامور .بس ماعرف اتعامل معاها لانها تقول جدامي شي و من وراي شي..انا ماحب هالنوعية من الناس..المشكلة الكل يقول و يعاني منها..تحرض زوجها ع عمتي و ع اخواته.مرة عمي قعد يصيح يقول.ولدي تغير علي ليش كذا..احس مرات ابي اقولها في ويها بس هي تنكد ع الواحد يعني تهدد و تعطي في الوجه..خواتي ربي يشهد تنا ماحب اكره الناس بس هي تنرفز الشخص ..و هي مهملة ما تسوي شي بالبيت لا تنظف حتى حجرتها استغفر الله. انا و زوجي بنطلع بعد سنة لين يخلص الاقساط..بس كيف اتعامل معاها؟ خبروني جزاكم الله خير..طنشتها بس تجي تكلمني و كذا و من وراي اسمع كلامها غير..كم مرة طنشنها بس يطلع معاها تصرفات تقهرك مثل تطرش كلام في البلاك بيري حذفتها بس بعد بوصلني كلامها..تعبت و ابي اتخلص من هالمشكلة ..افيدوني..سوري ع الاطالة