كيف اتعامل مع اولادي المتزوجين

السلام عليكم
اخواتي انا ام وعندي اولاد كبار
الاثنين الكبار متوظفين ومتزوجين واحوالهم المادية جيدة
وزوجي احواله ايضا جيدة وانا غير موظفه
وقبل اذكر استشارتي احب احطكم في الصورة من ناحية معاملة الولد الماديه مع اهله
زوجي واهله يعني امه وابوه معودينه انه ماياخذون منه شي بدون مقابل ولايعطونه بدون مقابل وأبوه عنده نوع تجارة ولذلك يعطي بمقابل
واذا طلب من ولده شي يعطيه قيمته ونادر احد يعطي الثاني بدون مقابل وثمن الا الهدية ومثل ماقلت قليل هذا الشي
حتى في زواجه هو واخوانه كل واحد تكفل بنفسه من مهر واثاث والاب اذا اعطاهم سلف
انا هنا ماالوم ولكن احطكن في الصورة
على عكس اهلي
ابوي يعطي اخواني وزوجهم وساعدهم عطايا بدون مقابل ولذلك اخواني يتعاملون بهذا المبدا فهم يعطون وينفقون من مالهم ولايأخذون مقابل ومع ان ابي غني ولله الحمد واخواني موظفين لكن هم اللي ينفقون على بيت ابوي واي شي يحتاجه البيت من جيوبهم يدفعون ولا يسألون
تلموضوع الان في اولادي انا. ابوهم يعاملهم مثل تعامله مع اهله فأي شي يجيبونه للبيت يعطيهم ثمنه واولادي تعودوا على هالشي
وانا مايعجبني هالتصرف احب ان الولد يكون كريم مع اهله ومايحاسبهم لكني مع ذلك استحي اطلب منهم شي ولا اعطيهم لأني اعرف انهم ينتظرون المقابل
خاصة اولادي الموظفين وهم مثل ماقلت احوالهم جيدة
طبعا انا الى الان ماقد كلمتهم او فتحت الموضوع معهم وواحد من اولادي سافر من فترة للسياحه هو وزوجته ولا عرض علي مجرد عرض اني اخاويهم ولا حتى اخبرني ومع ذلك سكت مع ان الامر حز في خاطري كأم ولو عرض علي ماوافقت لظروفي
مالكم بالطويلة
الان ولدي ارسل لي انه بيروح لمكه ويعرض علي اخاويه ويخبرني بقيمة التذكرة وكأنه يقول ادفعي
طبعا الموضوع ضايقني جدا خاصه وان راتبة جيد وفوق العشرة ومع ذلك يتصرف كذا
فانا اسالكم ماهو التصرف الصحيح مع اولادي انا ام ومهما انفق واعطى ماوفى حقي عليه ومع ذلك انا مااطلب ولا اتدخل لكن ودي انه يكون كريم مع امه ولايحاسبها بشي


ورجاء العضوة اللي ام زوجها ناشبه في حلقها وتكرهها لاتحط مكانها زوجة ولدي وترد على هالأساس
ابي ردود عقلانية تفيدني وتساعد اولادي في بري ولكم جزيل الشكر