كيف اتعامل مع من تدق بالكلام ؟؟ ابي رايكم بالحل معهم

السلام عليكم ورحمة الله
صباح الخير على الجميع 🌸🌺
اللي تبي مختصر الموضوع كما العنوان😊
اما تفاصيل حياتي واللي اعاني منهم اقصد الحريم كافه
وبالذات الحموات السلفات خوات الزوج
طبعي دايم انصدم واسكت مااتكلم لان انفعل ويبين علي الانفعال وتنقلب علي السالفه اغلب المرات
فاتحاشى وكني لم اسمع واطنش واغيضها ببرودي واسولف مع غيرها
البارح اخت زوجي جايه زياره عند اهلها وشقتي جنب البيت
وفيه عشا ذبيحه مسويه حماي بالبيت وزرجته والشغالات2 واخت زوجي مطلقه وهي صاحبة البيت
وانا حامل ببدابة السادس وممنوعه من الحركه ومحذرني زوجي ادخل المطبخ
(( المسكين كبير بالعمر وهذا اول حمل لي ربي يتمم لي ويقر اعيننا بشوفته معافى ))
اميييييين
والمطبخ فيه حمواتي 2 والشغالات2 واخته هذي اللي جات زياره
تدق بالكلام على العشاء تقول المراة السنعه تدخل المطبخ من همة قلبها حتى لو زوجها
( تسبه معنى كلامها ضعيف عقل زي كذا )
تتكلم كانها تكلم نفسها
فكرت ارد قلت احسن اطنش ولا كني اسمع
بس انغبنت بعدين وش كثر الحقد علي وعلى اخوها من الغيره اللي ذابحتها حسبي الله ونعم الوكيل
زوجي الحمدلله طيب معي ويبين قدامهم حرصه علي
لي 4 سنوات متزوجين ولا حملت وطول هذي الفتره مشغلتني عالجتو؟ عالجو ؟!!!
لما حملت ماقالت حتى مبروك ولاجابت اي طاري ولا سوال .
المعذره اسهبت بالموضوع
بس اعطيكم نبذه لنوعيتها .
الله يهديني لما فيه خيير
والله صعب الواحد يشوف الناس تدوس على نفسيته وماتقدره
ابي راي المجربات لهذي النوعيات وكيف التعامل معها باحسن حل
شاكره لكم مقدم ❤