كيف اخليه يحس .. يحنّ .. يشتاق ... مليت من كثر الجفا ؟؟!!

خلاصة مشكلتي ان تمرّ علي ظروف اكون محتاجه فيها ليد تسندني .. وتقويني ...

وللأسف يد اقرب الناس تبعد عني وماتنمد لي " زوجي "..

حاليا حامل .. وعارفين نفسيةالحامل كيف .. غير الظروف الصحية اللي تمر فيها ...

ومع ذلك مجتهده بشغل البيت والطبخ والنفخ ...

كل ذا عشان ارضيه ....

واذا تعبت " مايحنّ علي " " مايرحمني " " مايشيل همي " " مايحاتي صحتي " ..

كنت اشتكي له من الم الحمل والتعب اللي احس به ويرد " منتي اول ولااخر وحده تحمل " ...

والله مدري شقول .. بس ردوده تجي قاسيه وتوجع القلب والاحساس ...

وحتى اذا كنا راجعين للبيت ومعنا اغراض يقول لي نزلي الاغراض " طيب انا مقدر " ..

<< دايم يحسب اني امثّل التعب ... وامثل الالم ...

اذكر في مره من المرات كنت اتألم كثير قلت له همزني .. قال عجزاااااان ...

وطبعاً دخل معه في كلام وسكتني وعطاني ظهره ونام ..

انا هالوقت اكلت بنادول .. وحبوب الفيتامين << على معده فاضيه ..

غير النفسية العدم ... ماحسيت بنفسي الا وانا بالحمام الله يكرمكم ..

ارجّع وحالتي تصعب على الكافر ..

وقتها جاني ركض وش فيك تعبانه ؟؟ ّّ!!! << مااقول لكم يحسب اني امثّل ..!!

قعدت ابكي ابكي ابكي ..

والله يابنات رحمت نفسي كثير وصعبت علي نفسي ...

كنت اطبخ لضيوفه .. واقوم من بدري واتعب وفي النهاية يطلع من البيت ويسهر مع اصحابه ...

" لاجزاء ولاشكورا "

يقول هذا واجبك .. << مافيه تقدير للجهد المبذول ..


حتى المصروف .. يمسك يده عن احتياجاتي .. لانه متبرمج اني معي راتب وتقدر تدبر نفسها

بينما خواته وامه واهله يكب عليهم الفلوس كب ..

هالعيد ماشريت لي فستان والسبب انه ماعنده !!!

ساعدته بفلوسي .. وعطيته ..

وكنت اهديه من الهدايا اللي ممكن تتخيلون ...

وبالاخير ضحك علي بعطر شاريه لنفسه .. ويوم مااعجبه قال تراني شاريه لك !!!!

انا على نياتي صدقت وفرحت .. وربي فطّني انه رجالي وواجهته وتهرّب .. وصرف الموضوع ..

كثير في مواقف اختبره .. مااحسه يعطيني برضا .. ومن نفس طيبه ..

ماانسى الجزمه اللي شريتها بـ 65 كنت اباخذها بالبطاقه بس كانت الشبكه عطلانه

فدفعها من جيبه .. ولما رحنا للصرافه .. قال اسحبي لي قيمة الجزمه ..:09:

نسى وقفتي معه بظروفه الماديه .. ونسى اشياء واجد كنت اسويها عشانه ..

هذا غير حركاتي الرومانسية لما اسويها له .. تكون ردود الافعال باااااارده جدا .. ومحبطه بقوه ...:(

" كيف اخليه يحنّ علي ويحس بي " لانه بجد احس ان خاطري شايل عليه ..

وكل مره اعدي .. بس ليمتتى ؟؟؟

احس اني مقهوره يابنات وش تنصحوني فيه .....

:icon33: