كيف اساعد زوجي

السلام عليكم ورحمة الله وبركاته
صبحكم الله بالخيرات والمسرات
اولا ادري ان كل وحده عنده مشكله مع زوجها حتى لو كانت بسيطه وان لنا ردات فعل عجيبه
بس احس ان مشكلة زوجي غريبه وبعد عليكم بتكون غريبه
زوجي عسكري وعنده امانه واخلاص لعمله ماشاء الله تبارك الله ومحبوب من الجميع ومحترم والكل يقدره طبعا طموحه مو عسكريه كان وده يكمل دراسته بس الظروف اجبرته يترك دراسته بالجامعه ويعسكر وسبحان الله تعين في نفس المديته اللي ساكن فيها اهله وبعد ثلاث سنين انتسب في الجامعه وماشاء الله دخل التخصص اللي يطمح فيه وهذا وهو على قيد العمل وطبعا انا وهو بنفس المرحله وكل واحد له تخصصصه انا انتظام وهو انتساب ومرينا بظروف صحيه جدا قاسيه حتى اني كنت باترك الدراسه وهو حمل مواد كثيره لكن شجعني وخلاني اتمسك بالدراسه والحمد لله تخرجت وهو باقي حامل مواد ومستمر في الدراسه .....
المشكله في عمتي اللي هي امه الله يصلحها ويعفي عنها كل ماشافت ولدها قالت متى ترتاح من هالبدله كسرت ظهرك متى تتوظف زوجتك وتساعدك في ديونك وانت كمل دراستك عشان تصير مدرس الناس كلهم تركوا العسكريه وتوظفوا مدرسين ومرتاحين وانت ذبحتك هالبدله الحريم كلهم توظفوا الا زوجتك وش هالحظ معك الله يصبرك ويعينك
الى ان وصل بزوجي انه يكره شغله ويدعي على وظيفته وانه تعبان من هالعمل واني ماتوظفت الى الان وهو الان متخرج ومقدم على جداره وماطلع له اسم وهذا اللي زاد الطين بله
ونفسيته جدا تعبانه حتى ايمانه بالله صار ضعيف طول وقته يقول ليه ياربي تسوي فينا كذا ليه ولدي مريض ليه ماتعينتي وحريم الناس تعينوا ليه منطقه سنين بالبيت ماتوظفت واختك بس سنه وتعينت ليه انا ربي مابيريحني من هالعمل ويخليني مدرس اشرح وانا جالس عالكرسي
يابنات حمل نفسه هموم هو في غنى عنها والله يابنات انقلب شعره ابيض واللي يشوفه مايقول عمره28سنه كانه 40 سنه وانا عجزت اهديه وافهمه ان الارزاق بيد الله وقسمه ونصيب وخيره
وعسى ان تحبوا شيئا وهو شرا لكم وان الخيره فيما اختاره الله لكن ابد مو مقتنع بشي كل ماقلت له شي قال ليش فلان وانا لا وليش فلانه تعينت وانتي لا فلانه ماتستاهل فلان هي مدرسه وهو مايسوى شي حتى شهادة ابتدائي ماعنده وانا اقوله لاتقعد تراقب الناس انا مارضى يقولوا عني انك ماتستاهلني وبعدين الناس مو بشهاداتهم الناس بافعالهم ابد مو مقتنع
وكل ماراح لامه زادت الحاله ويصير طول الوقت موسوس وبدأت تجيه حاله زي الضيقه ويصير مايقدر يتنفس
وانا ماسكت رحت قلت لحماتي قولي لامك لاعاد تكلمه في هالموضوع وكلمتها قدامي لكن لاحياة لمن تنادي والله يابنات امس وش زينه مو شايل هم شي ورحت زواج صحبتي وهو اخذ ولده وراح لاهله لكن رجع مو هذا الانسان اللي تركته وراي بالبيت وسألته عن السبب ورجع لنفس الموال عرفت ان عمتي كلمته بالموضوع الله يصلحها
علما اني ارسل له رسايل تذكره ان هذا شي بيد الله
والله ماعاد ادري ويش اسوي احس اني استحقره اذا تكلم بهالطريقه اقول خسارة الشهايد اللي معاك تتكلم وكانك انسان تجهل امور الحياة وان الارزاق موزعه من الله
والله مره ماقدرت اتحمله احس انه يغلط على الله قلت له اسكت ربي بلاك بنفسك وبكلامك ذا ولدك مريض اسكت لاعاد تسخط انا ادعي واتصدق واسوي كل شي اقدر عليه عشان ولدي يصير بخير تجي انت وبكلامك تخرب كل شي وش دراك ان ربي يعاقبك على كلامك هذا في ولدك وش ذنبه هالمسكين ماتهنى بحياته لكن مايستوعب كلامي ويقلب الموضوع ان ولده مريض من الناس حسدوه وانهم اهلي واقاربي وانه حتى مايشبع نوم بسبب خالي قاله في مره من المرات نفسي اجي عندك واحصلك صاحي احس طول وقتك نايم ومن هذا الوقت وانا ماشبع نوم والسبب خالك الحسود ويجلس يطالع عيوب اهلي واقاربي وان فلان يستاهل وفلانه ماتستاهل
والله ماكان كذا كان يقولي وش عليك من الناس لاتشيلي همهم ولاتفكري فيهم اهم ماعليك زوجك وولدك وبيتك والحين هو بس شغال يراقب الناس وعز الله مو من كثر زياراتك لهم لكن اخبارهم عنده من امه الله يهديها وانا والله ماظلمتها ولا في كلمه انا بنفسي شفتها تجلس تسولف وفلان توظف وفلانه تعينت فلان شراء بيت وفلانه ساعدت زوجها واشترت ارضيه وفلانه جابت الثالث وانت ماعندك الا واحد ومريض بعد ولد فلان اصغر من ولدك لكن اللي يشوفه يقول وش هالعافيه وياكل من كل شي ويعلم الله اني نصحتها قلت ماعلينا من احد حنا مانرضى احد يتكلم فينا بالهطريقه ومانبغى نكون حسودين وترجع تحلف انه مو حسد لهم وان مافي قلبها شي
لكن المشكله في قلب ولدها
والحين ودي بس اتوظف عشان يهدي من نفسه شوي مع اني قلت له اني لو توظفت ماله دخل براتبي ولا يحلم اساعده وقالي انا مابغى منك شي بس توظفي عشان افصل من العسكريه واروح اي شركه ارتاح شوي وماينقص عليك شي اذا ماكفى راتبي ماراح اخذ منك بس انتي اهم شي يكون معاك تقدري تتصرفي منه
شوفوا تفكير امه فيش خلاه يفكر
ساعدوني باللي تقدرون عليه لو بس بدعوه والا اعتبروها فضفضه وعشان تعرفوا ان هذي المشكله عجيبه وغريبه وماودي تقولوا يروح دكتور نفساني لانه ماراح يروح عارفته وماعندي الجراءه اقوله يروح
وصلى الله على محمد
اسفه على الاطاله