كيف اعتذر؟!

السلام عليكم ورحمة الله وبركاته

أخواتي أردت أن أعرض عليكن مشكلتي وكلي ثقة بأني سأجد عندكن الحل..

أنا بنت مخطوبة من سنتين وأنا وخطيبي نحب بعض بس قبل سنة جرحني وخانني صدمت فيه وكنت أبغى اسيبه بس ماقدرت لاني احبه وقلت لازم اوقف جنبه واحاول انه يرجع لي زي ماكان واكثر وبدينا نرجع وخلال هذي الفترة كانت له كم كذبه وحاولت اتغاضى عنها وحاولت اعيش طبيعي رغم ان الخوف كان ملازمني لدرجة انه يقول كثرة الخوف هذا ممكن يضيعنا ,, الى قبل اسبوع تقريبا عرفت ان جواله وصل الحد الائتماني وكان 300 وفصل فاستغربت وقلتله مو معقول في اقل من اسبوع ينفصل زعل وعصب قال ايش يعني انتي تشكي في, هذي 300 وانا عندي اشغال وشيء اكيد بينفصل وقال لازم تثقي في زي أول وانا حر في حياتي وانتي مالك اي تدخل , وفي هذا اليوم كنت خارجة من البيت وهو عارف واتصل قبل لا اخرج عشان نتفاهم في الموضوع وقلت له لما ارجع اكلمك اول شيء قال اوكي وكان باين علي اني معصبة بعدها ركبت في راسه وقال ما تطلعي قلت له كيف انا مواعدة الناس وهم مستنين في السيارة تحت تقول ماتروحي لاتحرجني قال انا قلت ماتروحي ساعتها طلعلي مليون عفريت وقلت له زي ما انا مالي تدخل في حياتك انت كمان مال اي تدخل فيني وكل واحد حر , قفل وهو معصب وانا خرجت ولما رجعت اتصلت عليه قال رحتي والا لا؟ اول شيء قلت لا علشان أهدي الموضوع وبعدها قلت أقوله الصراحه لكنه قال احلفي انك مارحتي هنا انا ماقدرت وقلت ايوه رحت عصب وقفل السماعة يومين بعدها اتصل وقال احنا ماننفع لبعض وانا الحرمة اللي تكسر كلامي ماتجلس عندي دقيقة حاولت اتفاهم معاه اتاسف وقلت انا سامحتك على شيء اقسى من كذا واللي صار مني مو اكبر من اللي صار منك قال لا تحاولي انتي كسرتي كلامي واتحملي . ومن يومها ما تكلمنا ..
انا عارفة اني غلطت لكني اعتذرت منه لكن هل لاني كسرت كلامه استاهل هذا كله

احيانا احس انه رجع لي زي اول واكثر بس احيانا الخوف يتملكني واشك في تصرفاته , يمكن اللي صار منه قبل سنة خلاني كذا بس من حقي اخاف يتكرر اللي صار وكان المفروض انه يتحملني خصوصا انه هو السبب في الي احنا فيه

قولولي ايش اسوي احبه ولااقدر اعيش بدونه وفي نفس الوقت خايفة يكون عنده شيء , افكر اني احاول اعتذرله مرة ثانية وبعدها اشوف ايش فيه

ارجوكم ساعدوني