كيف اقنع امي تروح دكتوره؟

بنااااات تكفون تكفون
عطوني حلول اذا تحسين نفسية امك تعبانه
على بلاطه تحتاج دكتوره نفسيه تفهمها كيف اقنعها تروح؟
لما اقولها تعصب علي وتصارخ وتقول شايفتني مجنونه
بقولكم اللي في امي
امي الله يخليها ويطول عمرها
مرت بمشكله مع خواتها من الاب الله لايوفقهم
مشكله تافه تافه حركات اطفال زعل على عزايم
وكبروها
وقطعوها ماكانها اختهم سحبو عليهم
هالسالفه من عشر سنين
امي من بعدهم نفسيتها انعددددددددمت
انقلبت انسانه ثانيه وكل ماكبرت كل مازادت
اول شي صرنا نلاحظ بامي
قطعت كل الناس صارت ماتبي تطلع ماتبي احد
قطعت حريم عماني مع انهم كانو يتصلون يدورونها
ترفض تجتمع معهم <كل همها يسالونها وين خواتك؟
وش اخبارهم؟
هذا زمان
كل ماتقدمت السنين حالة امي تسو اكثر
صارت امي فجاه على اي كلمتين اي سبب تافهه
تبكي باعلى صوتها وتكسر اي شي قدامها
مره كنا نتناقش يمين بالله نقاش عادي
لي قريبتين تزوجو مع بعض لكن وحده اقرب من الثانيه
فاهدينها مادرين الا امي رايحه تكلم ام قريبتي الثانيه
اللي ماهذينها وتقول انا مالي دخل فلانه تقصدني انها اهذتها
انا صرت اناقش امي
عن ليش تبررين للناس وش علينا منهم نهدي اللي نبي
فجاه كانت بتكسر الثلاجه تبع القهوه براسي
قامت تصارخ وتصيح وتكسر قدامها
ونفس الموقف لي اخت مراهقه
وتعرفون المراهقات طوال السنتهم اذا عصبو
مره قالت كلمه لامي اتوقع وش دخلك
او مالله لاسوي لكم مدري ايش فجاه امي
انهيار تم قامت تصرخ وتكسر وبالموت انا واختي الكبيره
مسكناها نهديها
احيانا لما نطلع مع ناس ويصير شد كلام
تعرفون جلسات بعض الحريم تجديع كلام وشد
اخاف يدي ع قلبي ان امي تبكي وتسوي شي قدام الناس
صارت هشششششه اي كلمتين تنهار منها انهيار تام
كنا نحسبه شي عادي ان شخصيتها كذا حساسه
لكن طلع لا مو طبيعي
فجاه هالسنه هذي صارت
تعرفون شخصيه الطفل اللي يصحى بالليل يبكي اذا
ماحصل امه؟
صارت امي نفسه لو بكيفها تمسكنا كلنا
بغرفه وتقفل علينا لين نموت
او لو بكيفها تاكلن مثل القطوه سوتها
صارت موسوسه بالموت درجه اولى ماتبي نسوي
ولا نطلع ولا نتزوج ولا نتوظف ولا ندرس ولا نسوق
ولا شي مره رحت زياره لبنت عمتي بالمدينه
تدرس هناك وكلمتهم قلت اني وصلت ترا ونمت
ياناس تعبانه ومواصله وعطينهم خبر اني بنام
فجاه تقول اختي انها دقت وارسلت لك جوالك مقفل
قامت من عز نومها تبكي كانها طفل تقول اختي طلعت
يالصاله تبكي اخوي متوظف بعيد ىكل شوي تبكي
تبيه يجي عاطل اهم شي يصير عندها
اخوي الثاني جته كورونا فجاه تبكي وتصارخ
كل يوم لمده اسبوع تجس انه خلاص مات!!
امي فيها وسواس قوي صاير علينا
يعني عندها عادي بنات الناس يسوقون
وتركب مع بنات مراهقات بالكليه السياره
لكن حنا ماتبينا نسوق ولا يمكن تركب معنا
تحس اننا بنموت بس تتقبل ان بنات الناس يسوقون
لكن بناتها لا
اخوي وصل عموها ٣٢يمين بالله عمره مامسك خط
سفر يسوق بس بمدينتنا امي ماتسمح له يسوق
برا المدينه لدرجه صاير اخوي مثل شخصية امي كل
شي يخاف منه كل شي يسبب له رعب وفوبيا
يخاف من كل شي والسبب امي زرعت هالشي
اختي انخطبت جلست تبكي تقول لاتروحين!!
مستوعبين الوضع
امي ماعرف ايش اسوي يابنات لما افكر اقول
اترك كل شي وابر فيها
لكن هذا مو بر
البر موب كذا هذا تضيع لنفسي ومستقبلي وحياتي
امي اللي فيها وسواس قوي خوف من كل شي
يبعدنا عنها هالشي مرض هالشي عجزت افهمها
انه مرض ماتستوعب تحس اكذب
تحس هي اللي صح وانتي ماتفهمين وانتم ماتعرفون
المصيبه العظمى اخوي واختي الكبيره معطينها جوها
ويسايرونها وهالشي جالس يضرهم اختي ضيعت خطاب
واخوي ضيع نفسه لايطلع ولا يروح ىلا عنده اصدقاء
ولا توظف بعيد ولا يسافر ولا يمسك خطوط كل هذا
ليش عشان امي ماترضى!!
شفتو نظام البزر اللي يخاف من كل شي وبس متعلق
ومتمسك بامه امي جالسه الحين السنه هذي خاصه
تمارسه معنا بزياده بشكل يخوف يابنات
احيانا ابكي مابيدي حيله ولا ييدي شي
لو احد قالها لا بسوي مثلا بسوق او بتزوج بعيد
تفتح الحنفيه دموعها وتصارخ وتبكي وبالموت نمسكها
نهديها تعبببببببببت بالذات انا
احس الحمل ثقل علينا اشوف امهات للناس
فرق فرق عن امي يعني مافيهم شي لاوسواس
ولا خوف على عيالهم امي استغفر الله
شفتو اللي احس انها ماعندها ايمان بالقضاء والقدر
كذا طول وقتها تحرمنا طول وقتها خايفه طول وقتها
تبينا معها طول وقتها تبكي طول وقتها قلقه ولا ترتاح
تكفون بنات بهالحاله وش اسوي
انا متاكده لو امي تروح دكتوره بترتاح
وتريحنا بس هي مو راحمه نفسها ولا راحمتنا
قبل كانو خالاتي يقولون امك شخصيتها حساسه
دمعتها جاهزه لكن للاسف هذي مو حساسيه