كيف الحياة بدون صديقات وجارات

السلام عليكم ورحمة الله..
مرحبا حوائيات كيف حالكن مع البرد هههههه
موضوعي واضح من العنوان كيف الحياة بدون صديقات وجارات تفهمينهم ويفهمونك بدون تكلف ولا هياط تزورينهم ويزورونك وتنبسطي بالجمعه معاهم?? هذا كله فقدته بعد ماتزوجت ونقلت من مدينة لمدينة وبعدها ماعرفت اكون صداقات او تعارف على جارات اول كنت ساكنه بايجار وتعرفت على جارتين كانوا زي العسل وبعد مانقلت لعمارة عمي ابو زوجي انقطعت اخبارهم ونقلوا ببيوت ثانيه وانقطع بينا التواصل وصرت في عمارة عمي كلهم بنات عمي ماخذين اخوان رجالي وهما اكبر مني بكثير وماتعجبني قعدتهم كلها تدقيق وملاحظات وغيبة ونميمة وماانبسط ابد والمقارنه بين ازواجنا مرة تعبت منهم فصرت معاهم رسمية من فترة لفترة ارد زيارتهم واجمعهم عندي وبس وغير كذا كل يوم انط عندهم او يجوني لا ولا صرت رسميه وارتحت صراحة ..
بس فاقدة الصاحبات كثير بعد ما تزوجت تواصلنا فقط عالجوال لانهم في مدينة غير مدينتي وشوي شوي قل الاتصال وبعدين تزوجوا ولا صاروا يتصلون ومليت الاحق وراهم وودي اكون صداقات في مدينتي ونتزاور وغيرها اكيد اللي عندها صداقات عارفه عن الشعور اللي باقوله واللي ما
عندها صداقات مثلي بتحس معاناتي حتى بناتي فقط مع بنات اخواتي وبنات عمتهم في المناسبات وباقي الايام جالسين ومسكرين الباب مافي حماس ولا طلعات مع بنات احس بملل من كل شي واخواتي اكبر مني ومايفهمون الا اللي على كيفهم مليييت ودي بصداقات وصاحبات بس كيف ماادري
طولت عليكم بس حابه تفيدوني كيف اخلي حياتي حماس احس اني مخنوقه من كل شي وزوجي ماقصر يوديني ويمشيني بين فترة وفترة وطبعا بعد زن ورن بس صاير عندي كل شي عادي مااحس باستمتاع وفرحة ماادري ليه??