كيف اناقش زوجي و انهي النقاش بلا جدال او خلاف ؟؟!

اهلا حبيباتي ..



قبل ايام طرحت موضوع على شكل استفسار عن ( مناقشة الزوج ) و جات اجابات اغلب العضوات جميله جدا و راقيه ؛ و نزولاً لرغبة البعض حبيت يكون ردي بموضوع منفصل لتعم الفائده ويسهل الوصول لها ..






# ماقبل النقاش :



مثل ماذكرت بعض العضوات ان يكون المكان و الوقت مناسبين + نفسية الزوج و الزوجه لابد يكونون كلهم مرتاحين .. توتر واحد منهم ممكن يقلب النقاش لخلاف ..



كنساء نحب النقاش و الحوار في كل شي ونحب يكون طويل ؛ فضروري نعرف ان الرجال في الغالب يكرهون النقاش الطويل و لا يدخلون في نقاش الا لضرورة ..



اقصد ان ( الفرق بيننا ، احنا ممكن ندخل نقاش نتسلى فيه ونضيع وقت ، و هم النقاش يعتبرونه مشكله ولازم لها حل )



لا مانع من ترتيب افكارك قبل يبدا النقاش ، حاولي تصور الوضع و الردود المناسبه .. هالشي يخفف توترك و يختصر عليك الوقت و تعرفين ايش تبغين بالضبط ..



# اثناء النقاش :



انتبهي لنبرة الصوت + تعابير الوجه + حركات اليد و طريقه جلستك ..



لغة الجسد تأثر بشكل كبير على اللي قدامك ؛ بمعنى انتي تحركين يديك بشكل متوتر او فيه عبوس على وجهك او نظراتك فيها حدة او احتقار و حتى طريقه جلستك فاحيانا ياخذ الزوجه الحماس وتصير جلستها وقت النقاش ( كأنها راح تهجم على اللي قدامها مثلا )



ابعدي عن المهاجمه ( انت غلط ، مو صحيح ، انت ماتفهم ، رايك غلط ، غلطانه اني ناقشتك ... الخ )



انتقدي الفعل بطريقه الثناء ثم التصحيح او التوجيه ، اعطيك مثال ( اتفق معك في نقطه كذا (....) و ماطرت في بالي فعلا توني انتبه لها ، لكن لو سوينا كذا (....) ممكن يكون افضل )






ابتعدي عن نقده هو ( انت و افكارك دائما غلط ، عمرك ماسويت شي صح )



خلي صدرك وسيع و بالك طويل ولو حصل مهاجمه لرأيك .. حاولي تاخذي من زوجك تفسير او تحليل ..مثل ( ليش قلت ان رأيي غلط ؟ اكيد عندك اسباب خلني اعرفها ....الخ )



احرصي اثناء النقاش تدخلين احب الاسماء و الالقاب له ( يابو فلان يطول لي عمرك لو تشوف الموضوع من زاويه كذا وكذا متاكده ياعمري انه راح تتغير نظرتك له .... الخ)



ابعدي عن الكلمات اللي تشبه الاوامر او فيها سلبيه ( اسمعني ، رد علي يلا ، عمرك ماسمعتني ، اكره النقاش معك )



اذكر موقف صار قدامي لزوج اختلف مع زوجته وكانت هالكلمات من بين رد الزوجه ( ياروح امك ... و مع نفسك ..صك في راسك اقرب جدار )



ممكن اسلوبها وهي هاديه غير عن كذا لانها كانت معصبه بس مثل ماتشوفون مافيه انوثه مافيه احترام وللعلم الموضوع كان جدا مايستاهل كل ذا ..!



تجنبي المقاطعه + العصبيه + استعملي اساليبك الانثويه في الاقناع ..



فالمقاطعه توتر الزوج و تقطع حبل افكاره و تخليه يخفف الكلام ويكون مستمع اكثر من متكلم ..



و ماشوف اي مانع من القبل و الحضن و اللمس و الدلع لو احتاج الوضع لكذا ..



تعلمي الالحاح الايجابي + الذكاء العاطفي ؛ تنفع كثير في الاقناع و تغييير الاسلوب و هالشي راح يخدمك كثثير ؛ فالاقناع احيانا مايجي بجلسه واحده مع الزوج ..






تعلمي كيف تمتصين حدة غضبه + كيف تخففين من توتر النقاش و تمنعينه انه يتحول لجدال عقيم ..



يعني الجئي للسكوت ان احتاج الامر او غيري الموضوع بفكاهه مثل ماذكرت بعض العضوات .. او ذكريه بالتعوذ و اعطيه جرعه من الكلمات المهدئه ..



اعطاك زوجك رأي سديد ، اعطيه مدح غير مبالغ و نظرات مليانه اعجاب و انبهار ؛ ضروري يحس انه مميز ومصدر اعجاب لك هالشي يجذبه لك و يخليه يتكلم اكثر..






# متى يمتنع الزوج عن النقاش ؟



اذا كان مرهق او مشغول البال او عنده زوجه جافه و عصبيه و عنيده ؛ فيعتبر النقاش معها مضيعه للوقت و ارهاق للاعصاب ..



فاغلب الازواج يكره النقاش مع الزوجه المزعجه او النكديه ؛ لانها كتلة مليئه بالسلبيه + تتكلم بكثره و تفتقد فن الانصات ..



بمعنى ثاني اعطي زوجك ايحاء انك تتعلمين منه مرات ( كبري رأسه ) لكن انتبهي يكون بشكل دائم لان راح يحصل تهميش لك + احتقار لشخصيتك .. مرات تتعلمي منه ومرات خليه يتعلم منك ..






انتهى ..