كيف انمي الثقه لطفل عمره3سسنين الله يسعدها اللي ترد

سولفي معه كثير وإذا تكلم لاتقاطعينه أعطيه فرصه يعبر
وبيني بتعابير وجهك تفاعلك معه بنظرة عيونك وهزي راسك وابتسمي له
حاولي يساعدك بأشياء بسيطه
العبي معه بالمكعبات وأي شي ينجزه أمدحيه
ناديه بكلمات تشجيعيه أنت بطل ماما أنت عبقري أو حبيب ماما
حسسيه إنه قوي لاتدافعين عنه إذا حصل خلاف بينه وبين الأطفال خليه ياخذ حقه
والولد بهالعمر بيكون يسجل اي شي يشوفه من أمه وأبوه

نفس وضع بنتي تمت الاربع سنوات وهي نفس الشي خوافه وتنحرج حتى مع اخوي الكبير واعمامها مع انه كل اسبوع تشووفهم

واذا طلعنا للكورنيش او الحديقه ما تروح تلعب وفيه احد

ولدي بنفس عمر ولدج والحين أحسه أحسن عن قبل والحمد الله

مثل ماقالت الأخت الي فوق اول شئ شجعيه بكلمات انت بطل وانت قوي وشجاع وقوليله قصص تأليف عن الشجاعة ومن هذا سوالف وأبد لا دافعين عنه خليه يدافع عن نفسه ويأخذ حقه بنفسه

احضنيه واحتوييه بين فتره وفتره حسسيه بالامان وامسحي علي بشرته وشعره وقوليله انك تحبيبه وان الله سبحانه يحبك وبابا يحبك وجدك وجدتك وو العائله الكريمة يحبونك خخخخ

أتبعي أسلوب التشجيع والمكافأة إذا دافع عن نفسه أو إذا اختلط مع الأطفال اشتريله هديه وشجعيه بالكلام والمديح
اشتري مثلا حلويات أو لعب خليه يوزع للأطفال

ناقشيه وخذي رأيه بأي شئ حتي لو كان تافه شجعيه ع الكلام

ابتعدي عن الضرب وصراخ والعصبية خاصه الصراخ صوب حد ولا تقارنيه بغيره

ونقطه مهمه امدحيييييه عند الغيييييير

وحمليه المسؤوليه

كلامي عشوائي وغير مرتب بس أحسن من ولا شئ خخخ واهم شئ أن شاأااء الله استفدتي

الله يسسعدكم ويوفقكم دنيا واخره كل اللي الله يحقق امنياتكم ويفرج همكم يااارب مشـكورين


انتظر البقيه

بالكلام شجعيه ودوم امدحيه وعززي ثقته بنفسه ولعبي معاه وشوي شوي بعدي عنه وقعدي وقولي له انا قريبة منك لو تبي شي
وكل فترة خليه يخالط العيال اللي من عمره تحت اشرافج طبعا يعني عينج عليه من بعيد وجذي بيتعود
وسمعت بعد ان الكلام قبل لا ينام الطفل والقصص الهادفة اللي فيها تعزيز للثقه ممكن ترسخ في هالوقت لان المخ يكون في حاله ماقبل النوم ومستعد يستقبل اي شي. والياهل الصغير بهالعمر حتى قبل النوم وبالنهار يستقبل اي كلمة واي تصرف معاه سواء كان تصرف سيء او جيد ويرسخ بمخه بشكل قناعه ماتتغير لا كبر عشان جذي احرصي انج تكونين معاه قبل النوم وتكلمينه وتعززين ثقته بنفسه والله يخليلكم لبعض ويحفظ عيالج