كيف تتعاملين مع بعض الشخصيات التي تختلق المشاكل أو لا تفكر إلا بنفسها ؟
السلام عليكم ورحمة الله وبركاته
بدايةً حابه أوضح فكرة موضوعي
في حياتنا تمر علينا كثييير من المواقف بعضها حلو نتمنى ينعاد وبعضها موجع نتناساه وبعضها مضحك كل ما تذكرناه ضحكنا ..
ايضاً في حياتنا نصادف صنوووف من البشر بعضهم بلسم وبعضهم الم وبعضهم ولا شيء بالنسبة لنا
كم من مواقف مرت علينا ، كنا فيها مظلومين من أشخاص هم بالنسبة لنا اقارب واحباب ؟!
كم من كلام وصلنا انهم يتكلمون فينا حسينا بالألم والحسرة خسارة الحب والمودة وخسارة طيبتنا وخسارة وخسارة وخسارة في النهاية طعنونا !!!
شوفوا حبيباتي بذكر مثالين لشخصيتين مختلفتين
الاولى
إنسانه نكدية واجب عليك تلتقين فيها في حياتك كثير وحرام تقطعينها لأن بينك وبينها صلة رحم !
كل ما التقت فيك اختلقت مشكلة ، كل ما قلتي كلمة عملت معاك تحقيق وانتِ ما تقصدين شيء من حسن نية !
تتوقعون علاجها ايش بيكون ؟؟
الحل الأمثل بإذن الله التطنيش
كيف التطنيش ؟
ما اقول طنشيها اقطعيها لا لا لا
طنشي لا تفكرين بكلامها اضربي به عرض الحائط
خليك معاها طيبة حبوبه لا تفكرين إذا رجعتي البيت وتقولين ايش كانت تقصد وليه ما تحبني ، ليه قالت كذا وليه وليه
تراك بتتعبين وهي عايشه حياتها ولا تحس بشيء لأنها إذا حست بشيء قالت قدامك وبكذا ما يبقى بقلبها حاجة
بينما انتِ تدارينها وتضحكين وتكتمين وبالنهاية تمرضين من كثر التفكير .
وأنا امامكم مجربة طنشت ناس كثييير يحملون نفس الصفات او بعضها
والله ارتحت وحياتي صارت احلى ولا قطعتهم ولا تركتهم بالعكس زاد الحب بيناتنا صار إذا حسيت بشيء
اتجاهم قلت طوالي وريحت ضميري رجعت بيتي رايقه ولا اتذكرهم إلا بكل الخير
طبعاً مو كل الناس تتعاملين معاهم بهذي الطريقة لأنهم بيتأذون مثل ما تأذيتي من فلانة اللي قبل
فقط اللي يعاملونك بهذا الاسلوب عامليهم بالمثل ولا ترهقين نفسيتك بسببهم ..
الحالة الثانية
إمرأه تزعجك تصرفاتها كل نهاية اسبوع وهي عند بابك تتعشى معك او مسيره طبعاً انتِ فرحانه بهذا اليوم الوحيد للطلعة
بحكم انه نهاية الاسبوع لكن ذيك مو فاهمة ولا مهتمه اهم ماعليها راحتها وانها طلعت وتنفست وشمت هواء
طبعاً تجيك اسبوعياً ولا تفكر تقول لك تعالي بيتي وان دقيتي يوم وقلتي بتجينها بذوق إذا ما كانت مشغولة تتعذر انها بتطلع وانها مشغولة وتكتشفين كذابة بس عشان لا تزورينها >> صح في ناس في حياتكم كذا ؟؟
المهم
تجيك واولادها يعثون في البيت فساد
وما تتحرك !
لا تقول اجلس ولا ترتب وراهم وانتِ تطبخين من هنا وترتبين من هنا وحياتك مستمرة على هذا الموال ؟
ايش الحل ؟؟؟؟؟؟؟؟؟؟؟
كلام وحاولتي توصلين لها بشكل غير مباشر انك تحبين تطلعين نهاية الاسبوع في يوم كذا كذا عشان تفهم تجيك في غير ذاك اليوم ولا في امل ، طبعاً هي قريبة بينك وبينها رحم
لو جلستي تفكرين وطفشانه وقلقه ومعصبة عشانها بتمرضين ايش الحل ؟
الدعاء والله الدعاء
ادعي الله لها بالخير وصلاح الذرية ادعي لها مثل ما تدعين لنفسك
والله انك بتلاحظين التغير نفسيتك اتجاها تحلو وترتاحين لها
وهي بنفسها بتصير تحب جيتك لبيتها وجيتها لك مو جيتها فقط
ما انسى ان المثالين اللي ذكرت عشتهم وكانت هذي حلولي ووفقت فيها بفضل من الله :)
وهذي دروس والناس اجناس بنشوف كثييير يبقى علينا ما نتأثر
وحابه اضيف اننا الأناث حساسات وياما شفت حريم يشكون لبعض من امور اقل ما تكون عادية
بس هم من كثر التفكير تعبوا ومرضوا
ممكن تذكرون مواقف او اشخاص سلوكياتهم مزعجة وكيف تعاملتوا معاهم
طبعاً بدون غيبة وكلام فاضي بس ابغى ذكر السلوك والحل كيف كان
والله يحفظكم
8
1K
يلزم عليك تسجيل الدخول أولًا لكتابة تعليق.
انسام هادئه
•
جزاك الله خيرا
مشكورة يالغلا..الموضوع راااائع جدآ.....انا عن نفسي تكون علاقتي مع هؤلاء سطحييييييييييييييييييييييييييييييييييية الا ابـــعــــد حــد ممكن
الصفحة الأخيرة