أخواتي كلنا نعرف أنها أيام قليله وراح تبدأ عندنا الإجازه الصيفيه
واحنا وجميع المسلمين بخير وسلامه إن شاء الله
وأكيد جربتوا شلون تمر الأيام بسرعه وماندري إلا الدراسه بدت
وكل هذا من أعمارنا الله يحسن خواتيم أعمالنا..
اللي ابي أٌقوله كيف تقضون الاجازه بأشياء ترضي الله سبحانه وترفهون بها عن أنفسكم وفي نفس الوقت تستفيدون ..
أكيد الترفيه له نصيب كبير في الإجازه ..
بس لازم نقرن الترفيه بالفائده ونستفيد من أوقات الفراغ اللي تمر من أعمارنا واحنا مااستفدنا شي ...حتى نضيف لأنفسنا ونطورها ونرفع من مستواها ..
كم اجازه مرت علينا ضيعنا فيها أوقاتنا في السهر ليلا والنوم نهارا اما على tvأو النت
اللي يسرق الوقت واحنا مانحس ويوم تخلص الإجازه ونراجع حساباتنا نلقى انا ماسوينا اي شي مفيد غير مضيعة الوقت والعمر و نندم أشد الندم على تفريطنا وعدم استغلالنا لهذي الأيام والأوقات اللي مسؤلين عنها أمام ربي..
عن الحسن البصري , في عبارته قال: (مامن يوم ينشق فجره إلا وينادي : يا ابن آدم , أنا خلق جديد , وعلى عملك شهيد فتزود مني فإني إذا قضيت لا أعود إلى يوم القيامة).
لا تحسبوني مثاليه انا زيكم ياما ضاعت ايام وسنين من عمري بلا فايده
وكل ماتخلص إجازه اندم أشد الندم على مضيعة الأوقات في غير فايده الله يغفر لنا..
وانا هنا حابه نتعاون على الطاعه وعمل الخير حتى نفيد بعضنا
حتى لو كنت مسافره مايمنع من انك تسوين لك برنامج على حسب ظروفك..
يعني ..كل وحده منكم ياحلوات تكتب برنامجها في الإجازه ..وش الأشياء اللي معزمه تسويها..
سواء لها شخصيا..أولزوجها وأولادها اذا كانت متزوجه..يعني على مستوى الأسره...
خاصة الأولاد سواء صغار أو مراهقين أو بنات كبار..لأنهم فلاذات أكبادنا ولازم نهتم فيهم
ونخليهم يستفيدون من أوقاتهم ونعودهم على هالشي...
ولا تستهينون بشي أخواتي ممكن شي بسيط تسوينه وأنتي تشوفينه عادي ..غيرك يستفيد منه ولك أجرعملها كامل ان شاء الله..
انا راح أكتب لكم بعض الأفكار البسيطه وأنتم كملوا....
-أخذ عمره لبيت الله الحرام..والقريبين من الحرم ..كل اسبوع على الأقل يروحون يصلون في الحرم..
-تقررين انك تحفظين لو سوره وحده من القرآن مولازم جزء كامل مثل سورة الملك
او سورة الرحمن او الكهف أو البقره اي سوره تحسين انها سهله عليك ابدي فيها
وحددي لك زمن معين تخلصنها فيه..
-ختم القرآن قبل رمضان....
-قراءة كتب مفيده ..في التربيه ..تطوير الذات ..ثقافيه ..اهم شي تستفيدن منها
-صلة الرحم شوفي مين من أقاربك من زمان مازرتيهم..واخذي معك هديه وروحي لهم
-تهتمين بنفسك..من شعر ..بشره..جسم..بالخلطات وهالحركات ماتخلص الإجازه الا وأنتي تلقين :)
-الصوم اثنين وخميس..تطبيق سنة الضحى..والجلوس الى شروق الشمس بعد الفجر..السنن الرواتب..
- قيام الليل ولو ركعتين تطولينها شوي وتدعين باللي تبين وراح تشوفين أثرها في حياتك ان شاء الله..يااخواتي في الإجازه يكثر السهر ويجي الثلث الأخير من الليل واحنا على السوالف والضحك والا تلفزيون ومسلسلات ..استشعري نزول الله سبحانه للسماء الدنيا وأنتي على هالحاله والله لتبكين ندم على هالوقت الفضيل اللي ضاع منك ...
- عمل صدقه جاريه تبقى لك بعد الممات..وعاهدي نفسك كل اجازه تسوين لك عمل معين..
-
-تخصيص وقت للإستغفار والتسبيح مثلا وأنتي في المطبخ او تمشين..أو قبل النوم
-بر الوالدين بزيارتهم والاهداء عليهم لو شي بسيط بيفرحون فيه أكيد
-التنزه أنت وأطفالك والترفيه عن النفس وأخذ كل مايسلي اطفالك وزوجك معك..
-عمل حلويات وطبخات جديده لأسرتك..تدخلين السرور عليهم بها..
-اذا عندك هوايه معينه هذا وقت ممارستها مثل..رسم ..خياطه..اعمال يدويه ..
-ادخلي دورات ..تطوير ذات..لغه انجليزيه..تحفيظ قرآن..
ياليت اللي عندها أفكار لنشغل الأولاد بشي ينفعهم تقولنا أفكرها عشان الكل يستفيد..
وان شاء الله تستفيدون من ماكتبت ..
دعواتكم..
أنا في انتظار مشاركاتكم القيمه..
وياليت كل وحده تدخل ماتمر مرورالكرام لو ترفع الموضوع بدعوه..
لااله الاالله