البنات البنات فديتهن
مايحتاجوون دلع هم مدلعين انفسهم

بالنسبه للخروج اذا كان سوق اوملاهي بناطيل ستر وتحافظ على رجيلاتهم
واذا زيارات لازم كشخه تنانير وحركاات
الاكسسوارات عمر معين اذا كانت صغيره اكتفي بحلق وبروش ذهب
اما بعد عمر 4سنوات وانتي طالعه اكسسوارات وحركاات للطلعات بس
في البيت لا نادرا مايلبسووون
بجامه وقت النوم لاصحيو لبس تيشرتات بناطيل شورتات للصغار طبعا اشياء قطنيه مريحه
مناكيرلاغنى عنهااااااا
استشوار للمناسبات فقط
بالبيت بكل ربطات حاجه مريحه
وسلامتكم

موضوع جاء بوقته ، بالنسبه لي وبحكم إن ماعندي غير بنوته وحده ربي يخليها ويحفظها لي ، حاسه اني طايره فيها السماء وكأن مافي أحد عنده بنات غيري على قولة خواتي ، لأن طبعي دقيقه وحريصه بكل الشغلات اللي تخصها ، أحب أدلعها بطريقتي الخاصه ، بما إن عمرها سبع سنوات ماشاء الله لازم أهتم بلبسها أكثر لأنها صارت تفهم وتستوعب نوعية كل لبس وفين ينلبس والمناسبه اللي تخصه .
واللحين انا معلمتها طريقة توزيع ملابسها يعني الدرفه الأولى للخرجات العاديه (الأسواق والحدائق )
والثانيه لزياراتي لبيت أهلي بحكم إني أزور بيت اهلي بإستمرار
والاخيره للبيت واللي معلقتها للمناسبات .
أحب البسها في المناسبات فساتين بناتيه هادئه وحلوه ويكون معاها شراب وجزمه الله يكرمكم ولازم نفس لون الفستان وأحيانا تنانير قصيره مع هيلاهوب لأنه بنظري يكون أشيك .
وفي الأسواق والحدائق البسها بناطيل فقط ولازم تكون طويله والبلوزه أحرص أكمامها تكون طويله علشان لو طاحت ماتنجرح يدها وتتشوه .
وطبعا مع كل لبس لازم إكسسوارات وساعات بالنسبه لي ضروري شاريه لها تقريبا كل الوان الساعات ومناكير وشباصات وبكلات وأطواق وربطات وكل شئ يخص الشعر ونفس الشئ تقريبا كل الألوان وأحب أنوع لها بالتسريحات لكن بحكم إن شعرها نــــــــــاعم وخفيف يغلبني ببعض التسريحات ، وأغلب الأحيان أحب أحط لها أحمر خدود خفيف واحط منه كمان على جفونها ومرطب أوملمع شفايف وأرش على وجهها لمعه ورديه ، أما الشنط تعتبر من الأشياء الضروريه لها وخاصة اللي تجي على شكل طفولي ومخصصه لها بتسريحتها درج خاص بالشنط ، ووقت الخروج تحط فيها عطرها ومناديل معطره ومشطها ومرايتها ومرات تأخذ لعبتها الصغيره تقول أتسلى فيها لما أطفش وأحيانا عصير وبسكويت تقول ممكن أجوع ياماما والبقاله تكون مقفله وأتوقع لوبطاوعها مابتخلي شئ بتسريحتها إلا وحطته في شنطتها ، وتاخذها فقط في الخرجات العاديه أما المناسبات ما أحبها تاخذ شنطه حتى لو تجي طقم مع اللبس ، ما أدري أحسها تناسب للكبار فقط ، وفي البيت تلبس بيجامات نوم وممكن أخليها لابستها طول اليوم إذا كانت نظيفه لأنها تكون مريحه لها في الحركه واللعب كمان .
واللحين علشان مناسبة زواج خالتها لفيت الأسواق كلها أدور لها على فستان مميز مالقيت كلها نفس الشئ ، وإذا لقيت فستان مناسب يطلع اللون مش ولابد ، المهم بعد ماتعبت من اللف والدوران قررت أفصل لها فستان من ذوقي وتصميمي وبنفس الألوان اللي أنا مقتنعه فيها والحمدلله اليوم خلصت من شراء الأقمشه لأنها كذا قطعه ، وغدا إن شاء الله بوديها للخياط وزين إذا لقيت لي واحد يرضى يطلعه بسرعه لأنهم الحين مايقبلون يفصلون من الزحمه اللي عندهم .
ومعودتها لازم احنيها بالأعياد من كان عمرها أربع أشهر وهو اول عيد لها وأذكر إني تعبت مررره لأنها كانت صغيره والحين لما أتذكر أضحك على نفسي لأنها ماكانت تعرف شئ وتعبت نفسي على الفاضي ، وكمان احب أحني شعرها واضيف مع الحناء الأعشاب اللي تعطي لون أحمر ومره أشقر يعني أنوع ، واخليها تدهن جسمها كل يوم قبل النوم بكريم سيباميد للأطفال مرره حلو وناسبها لأنه خفيف على البشره ، ومشترية لها روب استحمام من النوع الغالي اللي يجي معاه منشفه للشعر وحذاء للقدم ، وشاريه لها لاب توب لونه وردي وفاره كمان نفس اللون .
ولأنها كانت تدرس بصف أول إبتدائي سويت لها بأول اسبوع حفله صغيره في بيت أهلي بمناسبة دوامها بالمدرسه لوحدها وبدون ما أروح معاها والحين لما نجحت وبتفوق سويت لها حفله لكن هذي المره خليتها كبيره ولبستها لبس خاص بالتخرج وعلشان تنبسط أكثر حاولت إن المعازيم كلهم يكونون من اللي عندهم بنات وسويت لها كيكه وشموع وزينت لها المكان بالبالونات وشرايط الزينه وصلحت لها توزيعات خاصه بنجاحها ووزعتها بنفسها على الحضور وللأطفال توزيعات العاب وشغلت لها شريط زفه تبع النجاح وصورتها هي والأطفال ، المهم كانت مرررره مبسوطه وفرحانه وكمان الأطفال اللي حضروا انبسطوا ورقصوا وجاها هدايا من خالاتها وجداتها وشعرت في هذاك اليوم بمشاعر أم العروسه لأنها من جد كانت نجمة الحفل بهذاك اليوم وباركوا لها الحضور ، وبإذن الله إذا لقيت فرصه نزلت صور حفلتها .

( معليش لمن شفت كتابتي لقيت إني طولت مررره لكن بدون ما أحس يمكن لأن الموضوع يخص حبيبة أمها ، لكن إن شاء الله تلقين عندي لو فكره وحده تدلعين فيها بنتك الحلوه )

للرفع

مرة الموضوع حلو انا عندى ثنتين مرررة يحبون يلبسون ويهتمون بس المشكلة انو اذا وصلنا السوق او عن الناس الصغيرة تعفس ام الدنيا وتفك الشعر وتفصخ وحالة بس الله يصلحهم وعجزت معاها