إزيكوا بناااااااااااااااااااااااااااااااات
اليوم قريت موضوع قميل خالص وقلت مابدهاش لازم بناااااااااااات حواء الحلوات يقرونه معي
فسرقته بسرعه وجيتكم جري
7
7
7
كنا انا واخوي واختي وبنت خالي
صغار مثل جحوش صغيره ودك بس تقعد تطالعهن وهن يراكضون .. المشكله ان اختي وبنت خالي عليهن حركات بنات تغث .. تخيلوا من عمرنا صفر الى هالحين وبنت خالي توشوش اختي !! مايسولفون قدامنا ماغير قاضبين خشش بعض وهات ياوشوشه !! الى درجة ان خشم اختي ترك ندبه في صدغ بنت خالي على مدار 14 سنه وشوشه !!
قررنا انا واخوي محمد ننتقم بس طبعا مانقدر ننتقم من اختنا لأنها اختنا لذا قررنا ننتقم من بنت خالي
الخطه ناخذها ورا الحوش ونصورها بالبيجر هههههه ذيك الايام مافيه جوال ولا نت واحترنا اذا صورناها بالبيجر وين نفضحها فيه
اقترح اخوي محمد نصورها ونرسل صورها لمجلة ماجد وبكذا نفضح البنت ونكون سببنا لها شرخ في صفحة مستقبلها
حانت ساعة الصفر واستدرجنا البنت بعد ما اقنعناها ان اختي موجوده ورا الحوش وتبيها علشان توشوشها هههههه وفعلا ما امدنا اخذناها الا طبت علينا امي .
بكره الصبح واحنا على الفطور امي دخلت بيوزر اختي وقعدت توشوش ابوي .. ابوي ضحك ها ها ها اجل خذيت البنت ورا الحوش ؟؟ واضح انك كبرت واحنا مو منتبهين ؟؟ علشان كذا قررنا انا وميس الريم امك انك تعرس ... نعم اللي مثلك مالهم الا الزواج المبكر !!
قعدنا انا واخوي محمد نحلل وش معنى كلمة زواج مبكر .. قال اخوي زواج مبكر يعني زواج الساعه 6 الصبح !!
وفعلا اعرست على بنت خالي عقب هالاجتماع بشهرين !!
طبعا وبحكم اني الوالد الكبير اهلي كانوا يحترون ثمرة هذا الزواج لسببين : الاول يبون اثبات عملي على فحولتي اللتي كانت حديث القاصي والداني والسبب الثاني علشان اجيب ولد صغير يرث آل ****
طبعا كل هالاشياء ماراح تتم الا اذا حملت زوجتي
وبحكم اني قوطي صغير ولا ادري وش علامات الحمل الا مشهد شفته لفاتن حمامه يوم كانت جالسه على السفره مع الزميل العزيز رشدي اباضه وفجأه راحت تطرش قامت ام رشدي اباضه التفتت على ولدها وتبسمت وهزت راسها في رضى وحبور
وبالتالي صرت انا واهلي ماغير نراقب زوجتي نحتريها تطرش !!
وزوجتي رافضه تماما انها تطرش ّ
صرنا اذا جلسنا على السفره اسولف سوالف بايخه عن واحد شفته مدعوس في الشارع وامعائه خارجه شبرين برا بطنه والا اسولف عن قطو لقيته مقطوع راسه .. ابي اغث زوجتي يمكن الله يكتب وتطرش
وزوجتي ولا همها تاكل في فريحاء وحبور وانواع السعاده
ومره واحنا على العشا فجأه زوجتي حطت يدها على فمها واليد الثانيه على بطنها واليد الثالثه على راسها وعيونها صارت زايغه
احنا وقفنا اكل ونحتريها تقول آآآآع علشان نقوم نحتفل .. قلت انا ايوه
ايوه الحين الحين .. اتوسل اليك .. ارجوك .. رجولتي على المحك ... وفعلا طلعت اخت رجال .. واحلاااااااااااااااااااااااااااااا تطريشه
قمنا نصارخ في البيت .. وابوي يطامر على المراكي .. وامي تبكي وتقول ماصدق ماصدق .. وانا طيران اخذت زوجتي بطراشها وعلى اقرب مستوصف .. سوينا تحليل دم وفعلا طلعت حااااااااااااامل .. تحليل الدم اثبت انها حامل واثبت كمان ان عندها انحراف في شبكية العين الشمال لأني الظاهر وفي غمرة الاحتفال عطيتها كم بقس في وجهها
اكثر شي لفت نظري استغراب اهلي واهلها يوم صارت حامل .. يعني لهدرجه انا زلابه !! طيب اوكي اهلنا بعذرهم يستغربون لكن المصيبه ان حتى زوجتي مستغربه انها حامل !! الله واكبر نسينا ماكلينا نسينا وش كنا نسوي كل ليله من الساعه 10 الى 10 وخمس دقايق ( بعذرها تستغرب
) تغيرت حياتي يوم صارت زوجتي حامل .. صرت ثقيل ورزين وتركت البلاي ستيشن وطحت في الاكس بوكس وصرت اتقهوى عقب المغرب مع ابوي مثل الرجاجيل وفكرت افتح حساب في البنك العربي يعنني متقاعد ههههههه حتى ان اخوي محمد اقترح اطلق زوجتي علشان اعتزل وانا في قمة مجدي بس قلنا نأجل الموضوع شوي لين ناخذ الطفل وبعدين نتخلص من الأم
ابوي اقترح عليّ اخذ زوجتي لدكتوره النسا والولاده علشان تعطينا نصايح مخجله ابوي يستحي يقولها لي عن كيفية تعامل الزوج مع زوجته اثناء الحمل !!
فعلا رحنا مستشفى التأمينات عند دكتوره عراقيه عجوز !!
جلسنا قدامها مثل تلاميذ صغار والدكتوره عجوز وحاقرتنا بشكل فضيع الى درجة اني توقعت تقوم تتفل علينا بدون سبب
المهم ان الدكتوره قامت تعطي نصايح لزوجتي وانا سافهتني ماعطتني ولا نصيحه !!
قالت الدكتوره لزوجتي انتبهي من الحركه الكثيره وخصوصا ذا جيتي ترقين الدرج انتبهي من الـــ قاطعتها وقلت طيب انا يا دكتوره عادي استمر العب كوره والا .. ناظرتني من فوق لتحت وقالت عادي عادي انت بكيفك ورجعت تسولف لزوجتي !!
وانتبهي من الاكل يعني حاولي تبتعدين عن الاكل الحار والــ قاطعتها وقلت طيب انا يا دكتوره احيانا اكل شطه مع البيض خصوصــ قاطعتني وقالت ياخي انت كل أي شي تبيه !! كويس انها ماقالت كل تبن !!
انا مدري ليش الدكتوره تعاملني كذا .. بصراحه حسيت انه تم استغلالي .. خذوا مني اعز ما املك وبعدين رموني زي الكلب !!
انا تهورت وسألت سؤال مادري وشهو من الروعه .. الشاهد ان الدكتوره بحكم كبر سنها وروتين وظيفتها طلع رتم الاباحيه عنها عالي جدا بالنسبه لوغدان مثلي انا وزوجتي وقامت الدكتوره تشرح طريقة التخصيب وفجأه اخرجت دميه على شكل الــ **** للمرأه وقامت تشرح !!
الدكتوره تعمقت في الشرح وانا كل مالي ادوخ واحس اني تعبااااان ..اطالع زوجتي واتنفس بصعوبه من هول الكلام اللي سمعته
الدكتوره تركتنا وراحت .. قلت لزوجتي وانا مابعد صحيت من نشوة حديث الدكتوره بصوت لاهث وانفاس محمومه : وش رايك نروح ناخذ شقه مفروشه ههههههه قالت زوجتي وشوله الشقه المفروشه طيب نروح بيتنا .. قلت مادري بس الشقه المفروشه تعطيك احساس ان اركان الجريمه صارت كامله ... والا اقول فعلا خلينا نروح بيتنا .. اتصلت على اخوي محمد وقلت له يخلي المنطقه هههههههه ناوي اسوي قلق الليله
7
7
7
7
7
7
طوال فترة حمل زوجتي والاهتمام منصب عليها .. وانا مثل رجل كرسي ولا واحد معبرني والا معطيني وجه
يجون خالاتي وعماتي ماغير سوالف مع زوجتي : ياحليلها والله .. يا حبي لها .. انتبهي لنفسك .. لا تاكلين كذا .. لا تسوين كذا .. وانا خلاص خذوني لحم ورموني عظم !!
حتى زوجتي تغيرت وماصارت توشوش اختي .. نسيت اقلكم كمان انها غيرت اسمها وصار اسمها الأهل !!!
وصارت تجلس مع الحريم بدل البنات ولقت لها حرمه كبيره وصارت توشوشها بدل اختي .. وصارت تطرش واجد حتى ان اخوي محمد قال يمكنها حامل مره ثانيه !! ورحت سألت الدكتوره اذا كان فعلا ممكن زوجتي وهي حامل انها تحمل مره ثانيه .. قامت الدكتوره العراقيه قالت لي كلام ماودي اقوله لكم .
وبعد سبعه شهور ولدت زوجتي
انهبلت انا وشلون سبعه شهور .. قام اخوي محمد وقال هذولا نصابين .. المستشفى يبي يزرف منكم شهرين تعال نروح الاماره نشتكي !!
بس الحمد لله ان ربي رزقنا ابو ذهين وخبره .. قال ياعيالي عادي عادي تصير هذا مولود اسمه خديج يعني يجي في 7 شهور لا تشيلون هم !!
وفعلا يوم الخميس الساعه 2 بالليل ودينا الأهل مستشفى التأمينات وجات الدكتوره العراقيه قليلة الادب وقالت لي المفروض تدخل مع زوجتك غرفة الوالده علشان تحسسها بحبك وحنانك ودفء مشاعرك وطيب معدنك !!
يوم قالت طيب معدنك وسلوم جداني خذتني الحميه وقررت ادخل مع زوجتي .. واول مادخلت وشفت اللي يصير جوه اغمي عليّ
رقدوني في غرفه 112 وزوجتي في غرفه 113
شوي الا اسمع صوت طفل يصيح .. الصوت جاي من غرفة زوجتي .. انهبلت من الفرحه وركضت انا واخوي محمد للغرفه واحتضنا الدكتوره العراقيه .. قامت رجفتنا بالسماعه وقالت صدق انكم قليلين ادب موب علشان انا حلوه ومطلقه تلعبون بمشاعري وراحت تصيح وتركض لم غرفتها
ورجعنا عند طفلي الحبيب وجلسنا انا واخوي محمد نصيح ونطالع الطفل الصغير جدا وندور حولنا أي ممرضه علشان نحضنها بس ماش ريحتنا فاحت في المنطقه وجابو لنا ممرض رجال
اخذت الجوال وجلست اصور اخوي مع طفلي الصغير .. وبعدين اخوي يصورني مع الطفل شوي جا الممرض وقال حتى انا ودي اخذ صوره مع درع الدوري .. واخذ الطفل وقام يغسله بالمويه والصابون واقترح اخوي محمد اننا نغسل المولود بفيري مثل كفرات السيارات علشان اذا جوا الجماعه يزورونا يصير الطفل يلق ويلمع بس ان هالاقتراح مالاقى قبول لدى ادارة المستشفى ومركز توعية الجاليات
جات ام زوجتي وقالت رح استاجر جناح كامل في المستشفى علشان اذا جوا الحريم يلقون مكان يواجه .. قلت يا خاله أي ناس واي مكان يواجه
المهم غلبوني الحريم ورحت استاجرت جناح كامل
بعدين جا اخوي محمد وقال تصدق اننا من الفرحه ماندري المولود ذكر او صبي ؟ قلت انا والله انك صادق تعال نروح حضانة الاطفال نشوف !!
رحنا الحضانه ولقينا ورقه على سرير المولود مكتوب عليها اسم زوجتي والطفل ( بيبي قيرل الأهل ) طبعا مانعرف انقليزي قمنا نسخنا الجمله وارسلناها لاخو المدام اللي يدرس برا في تبوك وطلبنا يترجمها لنا قام ارسل لنا يقول هذولي توأم بيبي والثاني قيرل !! قمنا صورنا المولوده وارسلناها له وسائط .. والحمد لله قال انها بنت !!
واحنا في الحضانه شفنا مواليد من كل الاشكال واذا طالعت في طفلي الخديج احس انه انضحك عليّ قام اخوي محمد اشر على مولود ذكر جنبنا واقترح نسرقه مكتوب على سريره ( بيبي قيرل فيحان ) مربرب وجسمه ماشالله كبير كنّه طالب في رابع ابتدائي .. قال وش رايك نبدله بطفلك ؟
بس صراحه خوفنا من الله ومن عذاب الاخره ومن وخز الضمير ..بالاضافه الى كميرات المراقبه اللي فوقنا ولفيف الممرضات اللي ضربوا حولنا سياج امني خلانا نلغي الفكره واحتمال نسوي تعديل بسيط عليها ونسرق الام بكبرها علشان نضمن تدفق الانتاج
وبدا توافد اهل زوجتي وجماعتها من اكل انحاء المعموره فرحانين بزوجتي والمولود وانا ولا واحد عطاني وجه تقول اني موب شريك جحدوني وجحدوا ادائي ولياقتي البدنيه
وكل حرمه تزورنا تطلب تشوف المولود وتاخذ منديل معفط وتحطه في ملابس المولود .. انا قلت وش السالفه.. قال اخوي محمد يمكن شعوذه .. يوم رحنا سألنا ابوي طلعت فلوس داخل المنديل يحطونها الحريم للمولود تعبيرا عن تحالف طبقات المجتمع ( ياعنك ان ابوي ذهين )
البزر انتفخ وصار كنه مكينة صراف
اقترح اخوي محمد اذا راحوا الناس نخطف المولود وناخذ الدراهم ونتقاسمها بس ام زوجتي ذهينه خذت كل الدراهم وكراتين العصيرات والشكولاطات اللي جات وعطتها ولدها في تبوك فتح فيهن محل اسمه ( تموينات بيبي قيرل الاهل )
انتهت فتره اقامة زوجتي في المستشفى وكانت بصراحه ايام جميله لي انا واخوي محمد .. ماخلينا ممرضه مارحنا عندها وقلنا لها أي لف يو بحكم انها الكلمه الوحيده اللي نعرفها من اللغه الفرنسيه
وعشنا تقول في منتجع
بعدين طلبوا مني اروح قسم الماليه ادفع الحساب
انا قلت يمكن 450 ريال واذا بالغوا مره يمكن ادفع 475 ريال
طلع المبلغ 16000 ريال !!
اعترضت وقلت المفروض تخصمون لي 2000 علشان المولود خديج وباقي له شهرين !!
بعت سيارتي وسددنا المبلغ
.
.
.
.
زوجتي صار عندها مولود وكم طقم ذهب وكم طقم دلال السيف جابوهن جماعتها وعماتها
اخوي اعرس على الدكتوره العراقيه وفتح لها عياده في البصره والتحق بجماعة فدائيي صدام ههههههه
.
.
افرغت بذوري في جوف زوجتي
وافرغتي جيوبي في خزانة المستشفى .
.
انا مادري ليش علشان اصير آب لازم اعطي الاخرين اشيائي
منقوووووووووووووووول