تسلمين اختي الريشه على الموضوع المفيد ياريت اللي يعرفون يفرقون يدخلون انا بصراحه مااعرف انا حامل وفي الشهر الثامن وحركة البيبي كلها تحت اسفل البطن وأحس مثل الدغدغه مثل شي يرفرف ولين الحين ماسويت سونار بس لما كملت شهرين وفي شي بعد اكثرشي الحركه جهة اليمين ومشكورين :26:

والله هالموضوع جذبني وايد
انا اللحين حامل وللحين ما عرفت شنو فيني ولد او بنت وميته ابغي اعرف حتى قلت بروح عيادة خاصة عشان يكشفون علي واعرف، خبركم المراكز الصحية ما يعطون وجه بنوب ويعلون قلبنا لين ما يقولون واذا قالوا ما تدرين كلامهم صج والا بس كلام فاضي من عندهم. انا ودي في بنت وزوجي ميت يبغي ولد وانا مو معترضة على اللي يجي من الله وعلى قولتهم اللي يجي من الله حياه الله.
بس من خبرتي من حمل اختي الاول جابت بنت وكان وحامها ثقيل وايد وكل يوم بالمستشفى، ورقبتها صارت سودة تلوع الجبد وشكلها يخرع بسم الله عليكم ههههه.
اما بالحمل الثاني جابت ولد وكان وحامها خفيف وايد يعني حتى ما حست بالوحام ورقبتها كانت عاديه وكل شي فيها طبيعي بس صارت احلى من قبل رغم انها ما شاء الله عليها حلوه (قمر 14).
انا اللحين مادري كل واحد يقول لي شي. وحامي خفيف شكلي ما تغير بس خشمي كبر شوي وصاروا يعيروني ام خشم هذا كل اللي صار فيني من تغير والله العالم.

هههههههههههههههههههه .. أختي همس المشاعر ضحكتيني .. أم خشم عااد هههههههههههه..

بالنسبه لي .. احس المعلومات تخلبطت عندي من شفت مواضيع وتجارب الأخوات .. :01:

أنا عندي ولد وبنت ... وماكان عندي وحام شديد في كلا الحالتين .. حتى شكلي والله ما اتذكر كيف كان وانا حامل بالولد ولا بالبنت ..

حاليا أنا حامل في نص السابع ... سويت تصوير بالسونار العادي يوم كنت في الشهر الخامس قالت لي الدكتورة يمكن يمكن ولد ... طبعا أنا استانست .. :23:

وسويت التصوير بالسونار في بدايه الشهر السابع .. اللي هو متطور .. يقولون عنه التصوير الثلاثي مدري الرباعي وقالوا لي أنها بنت :32: .. وشي طبيعي أني بستانس بعد :27:

بس السالفه مب سالفه الواحد يستانس او ما يستانس .. الموضوع الصدمة .. يعني الواحد يقولون له بنت .. ويقعد يتحلم أنها بنت ويختار لها اسم .. وتتحلمين أنها مثلا تشبه حد معين .. ويوم تشوفين ملابس البنوتات تشترين لها واآخر شي تطلع ولد .. يعني الواحد يكون مصدووم .. مب سالفه أنه ما يبغي الجنس الآخر ..

واذا قالوا لكم ولد .. بعد نفس السالفه الوحده تتحلم بالولد .. وتفكر شو بتختار له اسم .. وبتشوف شي حلو للاولاد وتشتري له ويطلع اخر شي بنت ..

بس يعني الصدمه ترى ما تطول .. كلها كم ساعه و تندمج الأم ويا البيبي سواء كان ولد أو بنت .. أهم شي يكونون بصحه وعافيه ويكونون من الذريه الصالحه... مع أني هالزمن اشوف أنه الخير وأبواب الرزق اغلبيته في قدووم البنات .. وهذا عن تجربه شخصيه .. البنت فعلا بركة .. حتى يوم تكبر ما يكون في أحن منها على اهلها ..

وفي بعضهم يقولو اذا الوحده احلوت واتروى جسمها تجيب بنت

أنا على البنتين ماحسيت بشي لاوحام ولاخرابيط بس هالمرة أحس اني تعبانة وتجيني لوعة بس من غير ترجيع.....للغلم اني قبل مااعرف اني حامل حلمت اني كنت رايحة سوق الذهب اشتري لبنتي الكبيرة سوار ذهب وعجبني شكل واحد فخذته ورجعت.....ولما شفت التفسير طلع مولود ذكر والله أعلم