كيف ذليتها ،،

متزوجه من سنتين ومن سنه جاب لي هديه بلاك بيري وكنت مستانسه فيه مره واضفت صديقاتي وتعرفت على بنات جداد وكنت اقرا له النكت والبي سيات المضحكه ،،
قلت له خذ لك واحد
قال مااعرف حد معاه بلاك فما بستفيد منه !
خذ لك يشيخ وانا برسلك وضيف اخواني وهم معهم شباب فله يرسلون لهم بنك
،، ماش مااقتنع وانا مااصريت عليه قلت خليه على راحته،،
فاجاني اليوم الثاني ومعاه بلاك وعطاني ياه قال زبطيه مااعرف له
خذته واخذت البن وارسلت لاخواني
والغلطه الي سويتها اني حطيت بنه بمنتدى عشان يضيفونه الناس وانا على نيتي انه فقط بي سي ،،

: لو اضافوني بنات وش تسوين
: عاد انت احذفهم وش تبي فيهم
: طيب انا وش يدريني بنت ولاغيره؟
:لو تجاوزت حدها معك احذفها غير بيسيات ماتحتاج
:شوفي يبنت الناس لو بيسبب مشاكل تراني ماابيه.
:ان شاء الله مابيصير شي ياخي شفيك كلها بيسيات عاديه وفله وضحك اذا شفت بنت عندك احذفها زي ماانا احذف الشباب
:اوكي

جاني بعد فتره
: في وحده مضيفتني وانا اشك انه اخوك يلعب علي يبي يسحبني ،،
: احذفه ان كان هو بيكلمك ويطلبك تضيفه
:لا خل اوريه

بعد كم يوم ،،
: يبنت طلع مو اخوك انت اضفتي بني بمنتدى؟
: اي قلت لك
: اها
: من طلع؟
:بنت
: احذفها
:حذفتها من زمان

،،،، كنت حامل واذكر انه بالشهر الخامس لقيت جواله مرمي قلت خل اشوف كم مضيف لانه نادرا يرسل لي،،، فعلا مالقيت الا اصحابه لكن لقيت صوره لبنت وكانت من اخر المحادثات ،، شدني الفضول افتح المحادثه،،
سواليييف الاخ معها مو بس بي سي وغالبا هي تسولف ،، انها متزوجه ومعها بنت وزوجها مطنشها وراميها بالبيت وعلى هالاستراحات ساهر وهي تفكر تتطلق منه!!!!!!
دارت الدنيا فيني ،،، كل ردوده لها الله يصبرك وش مجلسك معاه وين اهلك ،،، انا سكت ورجعت الجوال مكانه ولا كان شي صار ،، ماكنت جريئه وقتها وبنفسي قلت خليه حتى الاقي فرصه واصور الشاشه وامسكها دليل عندي واشرشحه
كنت اتابع بصمت،، كان يحذفها كم شهر وشكله يطفش ويرجعها وهي ماعندها كرامه ترجع تسولف وتشتكي عادي ،،
عرفت اسمها وعرفت باي منطقه ساكنه ،،،كل هذا وزوجي ماعطاها اي معلومات عنه فقط يرسل بي سي او يصبرها او يضحك على بيسياتها او يعلقون سوا على بي سي

انا قلت لو اواجهه الحين بيحطها براسي وان انا الغلطانه وانا الي اصريت عليه ونشرت البن لكن خل اصبر اشوف وش يصير واروح لجواله والاقيه حاذفها تم كم شهر لين ولدت وهي مو موجوده وبعد ولادتي بشهرين اضافها لكن غير اسمها لاسم واحد من اصحابه،،، هنا عرفت انه ناوي يخليها انا طبعا حافظه البن تبعها ،، مره تعطل النت وقلت مدري يمكن جوالي الخربان خل اشوف وش اخر ظهور لي بجواله عشان ان طلع اخر ظهور معناته في نت وجوالي هو الخربان،، افتح الواتساب تبعه واشوفه ضايفها وكاتب لها نورتي ومسميها باسم واحد من اصحابه بعد. اتصلت عليها كم مره ماردت ... هنا قلت خلاص باواجهه
دخل الغرفه
:تعال ابيك بكلمه
:وش فيه؟
:اجلس
:ووش فيه؟؟؟؟
: من ابو فلان بالواتس عندك؟؟؟؟؟
: صاحبي
: صاحبك وكاتب له نورتي ؟؟؟؟
،، طلع الشريحه وكسرها ورمى الجوال ع الجدار .
:قااااايل لك بيسبب مشااااكل لكن ماسمعتي الكلاام هالجوال مااااابييييه استانستي خلاص؟؟؟
:دامك مو غلطان ليه معصب؟ انا قلت لك بنات ماابي ووصلت معك تجيبهم واتساب وتعطيهم رقمك
طبعا صراخ ماافهم وش يقول لكن كنت ثابته واستناه يسكت وارد عليه
: كل هالعصبيه والصراخ ليش!!! لو بريء وانا ظالمتك ماكنت بتعصب صح ولالا

،،، طلع من الغرفه ،، رحت اخذت جهازه ورحت لاسمها وحذفتها وطفيت الجهاز
اضفت بنها لجهازي وغيرت اسمي لنفس اسم زوجي ،، تعرفون الواحد مايحفظ البن فقط يكون حافظ الاسم والصوره
اضفتها ،،ولانها متعوده زوجي يحذفها ومتى ماطفش رجعها قبلت الاضافه وحاكيتها على اساس اني انا زوجي

انا: هلا بالغاليه كيفك؟
هي:تمام الحمدالله
انا: ابي شورك زوجتي توها والده وابي اهديها؟
هي: جيب لها اي شي
انا: وش اي شي هذه الغاليه مهما اهديها مابوفيها احبها موت
هي: هههههههههه
انا: وش يضحك؟؟
هي: وشو له تحاكي بنات وانت تحب زوجتك؟
انا: اطقطق عليك ماخذك تسليه لاتصدقين احب
هي: باالله؟
انا: دقيت عليك مارديتي،، ؟
هي: لما عطيتك رقمي قلت لك لاتتصل فقط بي سي
انا: وليه لااتصل!!! مو عطيتيني رقمك ؟؟؟ نلعب على مين بتسوين لي شريفه الحين ؟؟؟
هي: احترم نفسك
انا: انتي مااحترمتي نفسك احترمك وانا صادق دام عطيتيني رقمك يعني تبيني اكلمك واطلع معك لو ماتبين كذا كان اكتفيتي بالبلاك هههههههههههه
هي: بلوك
انا: عادي بلكيني اصلا ماتقدرين تفارقيني شويات واشوفك
هي : لا
انا: صدقيني شويات واشوفك كنت احذفك بالشهور وترجعين لي متى ماابي ،، لاتمسخينها خلك هنا عادي وحاكيني جوال



البنت حذفتني،، انتظرت لليوم الثاني وجبت لزوجي شريحه جديده للبلاك وعطيته البلاك وقلت خذه اذا تعرف تستخدمه طبعا البلاك رجعه قال مايبيه وانتظرت كم شهر اتاكد ان رجع تواصل معها والحمد الله تخلصت منها وادبته


وبس هذه قصتي😁