كيف صرت أحب العنايه .. وأحب نفسي + عنايتي بالتفصيل من راسي الى أظافري/ماراح تندمين

السلام عليكم ورحمة الله وبركاته..
كيفكم يا جميلات ..

جيتكم اليوم باحكيلكم حاجه
امممم
وجدت كثييير تكاسل عن الاهتمام بنفسها
وتتعذر بكثر الاشغال وووو
انا كنت من هالفئة .. واكتفي ( بشاور عادي وترطيب وبس )
اكلي كان من جرف لدحديره
( بالعربي عاشية على التشوكليت والشبس ووووو )
ما كنت سمينه .. نحيفه ودي ازيد 5 كيلو او 7 ..

طيب ايش اللي غيرني 180 درجة وصرت اهتم مع كثرة شغلي والدوام ومدري كيف ..
تعالوا معي حبه حبه ..
بالبدايه وقفت مع نفسي وقفه جاده وقلت لابد اصبر حتى احقق هدفي .. وبعدين يكون الاهتمام بالتدرج .. ومريت في 3 مراحل
طبعا كل وحده ومشاكلها تختلف عن الثانيه ..

مشاكلي هي
شعري / عادي مو دهني ولا جاف بس فروة الرأس دهنيه + اصله ناعم لكن تاااااالف وينفش وجاف وحالته حاله + طويل ( وقصيته قصير وتورطت فيه هههه سرت اجعده لانه تالف ولا ابي استخدم استشوار وكذا" وقلت معليش لابد اتحمل شعري كذا عشان بعد فتره بيزين باذن الله وبارتاح ) + خفيف ومو كثير وسسط ..

وجهي / بشرتي عاديه مافيها مسام .. لكن متصبغه لقلة شرب الماء والغذاء والسهر + حبوب من كثر التشوكليت + وشحووووب + هالات + شفايف الشفايف

جسمي / اعاني من جفاف + اثار حبوب + عدم توحد للون ( اماكن حساسه - ابط - اكواع وركب- رقبه - مفاصل اصابع ) + سمار وحبوب في اعلى الظهر

اللي ساعدني كثير .. ( دعيت ربي يساعدني وييسرلي - استغفر واسبح كثير ووجدت طاقه وخفه بالعمل - كنت كلما اتكاسل اقول بنفسي خل اقهر ابليس واقوم اتنشط ) كنت احب ادخل الجانب الديني بكل شيء اسويه بحياتي وصرت احس براحه ..

الان نجي للمراحل اللي مريت فيها ( معليش حبيباتي قولوا ماشاء الله ان اعجبكم شيء )
---------------------------------------
المرحله الاولى

انا بديت بشيء بسيط وسويت لنفسي وجدول خفيف ومرن بحيث كان هدفي من الجدول ( انو ما يمر اسبوع الا سويت شيء لشعري ولجسمي .. لو يوم واحد عادي ) وما كتبت الجدول بورقه خليته في ذهني وبعدين باقولكم ليش سويت كذا ..

بدأت من بداية الصيف علطول ..
حددت الاشياء اللي ابيها :

خطوه رقم 1

نبدأ من الشعر
أصله ناعم .. لكن تالف متشابك اشهب مافيه لمعه ومنفوش متقصف اول كان يتموج الان صار يلف .. صاير شكله يروع ( تخيلو الشكل )
قلت لابد اعتني فيه ..
1- حددت شيء واحد ( نوع واحد من الزيوت كنت استخدمه واعجبني وتركته فتره وقررت ارجع له _ زيت سالا كوريا- اشتريه من تاجره )

2-وكريم بعد الشاور

بسسسسس

شفتو كيف سهل

الجسم :
1- سويت خلطة جيلوسليد ولمون وزيوت ..وخليتها بالثلاجه ( من ابتكاري )
2- سنفرة ملح الحليب
3- وترطيب

الوجه:
1- صابون وغسول ومنظف > كل هذي تنظف الوجه
2- وتونيك النعناع والبقدونس > يقفل مسام البشره فبالتالي ماراح تتراكم الاوساخ على البشره وماراح يكون فيه نقط سوداء وحبوب .
3- مقشر أحماض الفواكه> تقشير عشان تتقبل البشره الاقنعه والكريمات اللي ناويه استخدمها
4- واقي > لوجهي ورقبتي ويديني .. حمايه من الشمس ومن حرارة الفرن .. ومن اشعة شاشة الجوال والابتوب

لحد الان مابعد بديت في البرنامج بس حددت الاشياء اللي باستخدمها باذن الله

جمعت لي مبلغ ( عشان اشتري زيت سالا كوريا كم علبه واستمر ) شريت 5 علب :S_45: ايوه متحمسه بقووووه ههههههه..
اما خلطة الجيلوسليد والليمون والزيوت ( فانا اخترعتها من راسي لقيت الاشياء متوفره عندي من كثر ما اسوي خلطات ولا استمر قلت يالله نخلطهم ونشوف النتيجه ) سويت كميه قليله كأول مره >> فطينه سويت شويات عشان ما اتوهق لو ما اعجبتني هههه .. بس بالنهايه اعجبتني واعجبتي واخواتي انهبلو على ترطيبها .. واقاربي اعطيتهم اياه وجربوه وانهبلو على الترطيب واثار الحبوب خفففت كثير ومع الاستمرار تفتيح..

الخطوره رقم 2

الان نجي للتطبيق :
1- الخلطه حقت الجسم سويتها وخليتها بالثلاجه
2- ملح الحليب موجود عندي
3- زيت سالا كوريا طلبته وانتظر متى يجي
4- مقشر احماض الفواكه ( رحت للصيدليه وشريته ) اقرأو عنه بقوقل حلوو مره .. لون العلبه رمادي وعلامته بلون برتقالي .. واللي اعجبني فيه انه يقشر بدون ما يطلع قشور على وجهك ويبهذلك ( مو زي رتن اي ) ..
5- تونيك النعناع والبقدونس ولا بد يكون بااارد .. سويته بالبيت ( اغلي شوي نعناع وبقدونس واخليهم تبرد واحط مويتهم بعلبه بالثلاجه )

الان بديت حبه حبه ..

الوجه
* أول اليوم: صابون>غسول > تونيك> واقي ( ما احط مرطيب عشان بالليل احط المقشر ) > شفايفي مرطب طبي
* اخر اليوم : صابون > منظف >غسول > تونيك> مقشر احماض الفواكه وانام> شفايفي فكس

الجسم
* وسط اليوم : من مره وحده الى 3 مرات

الخطوه الاولى / اغسل جسمي بالصابونه اللي استخدمها واتسنفر بملح الحليب > اتنشف واحط خلطة الجيلوسليد والليمون اللي سويتها ( اطلعها من الثلاجه قبل اغسل جسمي عشان تدفى )

بعد كم ساعه .. ساعتين او 4 ( بهالوقت اسوي اي شيء .. ارتب غرفتي .. اجلس عالنت .. اقرأ قرأن ..اسولف مع صديقاتي ... اقرا كتاب .. اسولف مع اهلي ) اييي شيء (ايام الدوام كنت اسوي هالحركه بعد المغرب مباشره واجلس المغرب مع اهلي واتقهوى وباقي الوقت اسوي اي شيء )

الخطوة الثانيه اذا خلص الوقت ( اتسبح عادي شامبو وبلسم وصابون وتنشف وارطب واتعطر وشعري كريم اللي يناسبه وبسسسس .

الشعر
بذاك الوقت للان مابعد وصلني الزيت ( فكنت اتجنب الاستشوار وهالامور .. واههههتم بشرب المويه ) صحيح غذائي ما تعدل بس كنت اهتم بالمويه ..

لما وصل الزيت سرت احطه من مره وحده بالاسبوع الى 3 مرات


الغذاء:
سلطات + مووووويه .. 8-6 اكواب يوميا


( كل هالفتره عنايتي بسييييطه .. وللمعلوميه كان عندي جامعه ودوام )
ما أقولكم تغيرت حسيت اني استقريت وصرت اعطي شوي من وقتي لشعري وجسمي ..


تنبيه
استمريت على هذا الوضع لمدة 3 شهور ( وكنت احرص انو ما يمر اسبوع الا وانا سويت شيء لجسمي وشيء لشعري حتى لو مره وحده ) وطبعا ما كتبت الجدول بورقه ولا حددت ايام .. اليوم اللي يناسب اسوي فيه ..عشان ما احس انو فيه واجب علي .. وعشان يكون النظام مرن ولو انشغلت اليوم اقدر اخليه بيوم ثاني ..
وموشرط اجلس ساعتين .. لو ساعه .. لو نص ساعه .. اهم شيء لابد لابد اسوي حاجه لنفسي.. الجسم لو اسوي لها السنفره والخلطه في ايام ورا بعض عادي .. بس الشعر لابد يرتاح .. عشان لا اصدع .. وأصلا حسيت اني ازيد احيانا اهتمام بجسمي .. مثلا 4 مرات بالاسبوع .. وابد ابد ما حسيت بانه شغل كثير او اشيل همه او كذا )
ثم جسمي زدت له دلكة بنات تبوك .. وصرت اغسل فيها جسمي لما اخذ الشاور كامل لشعري وجسمي
( واللي خلاني اتمسك في هالدلكه .. اثار الجروح او الحبوب الكبيره خففففت وخاصه بالصدر .. انا كنت اقول باشوف نتيجة هالخلطه بعد شهر ... والله مرت خمس ايام وانا اتسبح فيها يوميا .. ولاحظت امي ان الحبوب اختفت وانبسطت )


النتائج/
نعومة بالجسم وترطيب
نضاره شووووي بالوجه واختفت اثار الحبوب
شعري بس خفت النفشه والتقصف > مو راح خف بس

-----------------------------------------------
المرحله الثانيه


بعد كم شهر بدأ الشغل يحمى .. :S_45:
الوقت اجازه ورمضان وعباده ( ما كنت ابي انشغل عن العباده )
ما حذفت من جدولي اللي راح اي شيء فقط غيرت اشياء ..
جسمي
بياض الثلج + دلكة بنات تبوك + سنفرة ملح الحليب + سنفرة كاب + خلطتي السابقه ( الجيلوسليد والليمون والزيوت) خليت هالخلطه قبل النوم
شعري
شامبو مع البلسم والماسك اللي يناسبني + حمام زيت كريم +زيت سالا كوريا+ زيت الجدايل + كريم بعد الشاور
وجهي
صابون + مقشر المشمش +منظف +غسول +تونيك+ افالون للتفتيح + مرطب + واقي+ القناع الحليب والحبة السوداء..

شفايفي :
عسل وتقشير بالفرشاة مع المويه ومرطب طبي

بتقولون كيف تستخدمين كلا هذا .. ! تعالو أقولكم

وجهي والشفايف والعيون
(طبعا يوميا .. بس القناع يوم ورا يوم او كل يومين )
* أول اليوم: صابون > مقشر سانت ايفز بالمشمش > غسول > تونيك >مرطب > وقي
*وسط اليوم: صابون > منظف > قناع > تونيك > مرطب > واقي
* اخر اليوم : صابون > غسول> افرش اسناني وخصصت فرشات لشفايفي اقشرها كذا بدون ما احط شيء > تونيك لوجهي > مرطب > افالون للتفتيح > وشفاتي فكس وعيوني مسحه من زيت لوز

جسمي وشعري
صرت اخلي 4 ايام او 5 اسوي فيها جسمي .. اما شعري 3 ايام ما ازيد ابدا
باكتب لكم جدول افتراضي ( يعني من شرط التزم بالايام بالنسبه للشعر .. اما الجسم فكان شبه يومي )

الأحد : اغسل جسمي بالصابون > سنفرة ملح الحليب > اتنشف واحط بياض الثلج > بعد كم ساعه اغسله بدلكة بنات تبوك ( وما اخلي الدلكة تطول لأنها اصلا تنشف بسرعه ) > اتنشف امسح الجسم بمنقوع الترمس> اخليه ينشف ثم ارطب واتعطر

الأثنين: احط زيت الجدايل والفه بنايلون > اغسل جسمي > سنفره كاب > بياض الثلج > بعد ساعتين اغسل شعري عادي وجسمي دلكة بنات تبوك > اتنشف امسح الجسم بمنقوع الترمس> اخليه ينشف ثم ارطب واتعطر

الثلاثاء :نفس الحكايه بدون زيت ( واحيانا راحه )

الاربعاء : نفس الحكاية لجسمي اما شعري بس يكون زيت سالا كوريا > بعد الشاور انبولات الصبار ثم الكريم

الخميس : نفس الحكايه لجسمي بدون زيت لشعري ( وأحيانا راحه بدال الثلاثاء )

الجمعه: نفس الحكايه لجسمي ويكون لشعري زيت سالا كوريا > بعد الشاور انبولات الصبار ثم الكريم

الاشياء الشهريه /
- تعلمت الباديكير والمنكير واشتريت اغراضه
- حمام مغربي مره بالشهر
- شيل شعر الجسم ( حلق او كريم لاني استخدم منقوع الترمس لازالة الشعر )


وبكذا خلص الاسبوع وانا راضيه عن نفسي ..


الغذاء :
مويه + سلطات + فواااااكه ( وخف اكلي للشوكلاتات كثيير ) وصرت اكل اكل المسلمين

النتايج/
اثار الحبوب اللي بالظهر خفففت وتوحد جسمي شويات
شعري حسيته صار قوي ولين شويات
وجهي راحت الحبوب والاثار


----------------------------------------------------------
المرحله الثالثه والأخيره : لي الان عليها 3 اسابيع
زدت اشياء بسيطة >>> مستعجله ابي نتيجه هههههه
لشعري
- ( منقوع الاس واكليل الجبل .. ابخه على شعري مره او مرتين باليوم .. وخاصه بعد الشاور )
- الزيت ( خلطة الزيوت 7 + سالا كوريا ) يعني صارو خلطة الزيوت 8
- وخلطة حناء وسدر >> اععععشقها تجنن
- خلطة افوكادو
انا محدده 3 ايام بالاسبوع صح !
اليوم الاول خلطة الزيوت 8 + حناء وسدر وزبادي وازيد ملعقة تشوكليت عشان اللون
اليوم الثاني : خلطة الزيوت 8
اليوم الثالي : خلطة الزيوت 8 أو افوكادو وزبادي وجرجير وزيت جوز هند ( مرتين بالشهر احط الافوكادو والزبادي والجرجير .. ومرتين بالشهرتكون بس زيوت 8 )

جسمي نفسه ما غيرت فيه شيء بس زدت ( زبدة الشيا الخام خلطتها مع زيت زيتون )عشان لقيت خطوط بيضاء في الافخاذ .. وسرت ارطب فيها جسمي بعد الشاور اما اذا كنت باطلع او بيجينا ضيوف احط زبدة جسم من بودي شوب او غيره ..
زبدة الشياء مع زيت الزيتون مالها ريحه كريهه جدا .. اول ما تحطينها ريحه عاديه واذا تشربها الجسم ترووووح ) ويبقى الترطيب الى اليوم الثاني بعد

وجهي
نفس الشيء ما غيرت شيء غير اني وقفت افالون للتفتيح بعد ما استمريت شهرين
الهالات زيت جنين القمح من وادي النحل مع زبدة الشياء الخام والنتايج حلوه .. قبل النوم طبعا
الشفايف خلطة ( فكس + جيلوسليد + زيت لوز حلو + دم الغزال ) قبل النوم طبعا .. اما وسط اليوم مرطب طبي
وبكذا انا الان امشي على هذا النظام والنتايج تحسنت كثييير

النتايج/
شعري صار لين وانعم من اول وفيه لمعه وصار يتموج بدل ماكان يلف .. يعني بالعربي فيه حياااة ( ولونه لون تشوكليت يجنن ) ( مابعد وصلت للنتيجه اللي ابيها بس صار حححلو يعني اتسبح واخليه ينشف بس يكون حلو ومقبول وما استخدمت استشوار ابد ابد طول فترة الاهتمام ماعدا بالعيد بسسسس ..
وجهي راضيه عنه بس ابي زيادة نظاره
الهالات لسه بس تفتيح بسط
الشفايف صارت تتقشر من نفسها وتفتحت وصارت رطبه
----------------------------------------------------------------
ومبسووووووطه جدا بالنتايج واحس تعودت عليها كثير ..


مقادير الخلطات
الجسم
بياض الثلجج/ معروفه بقوقل
دلكة بنات تبوك / معروفه بقوقل
خلطتي اللي ابتكرتها ( علبة جيلوسليد - علبة كريم جلسرين نفس مقاس الجيلوسليد - كركم جسم - فكس علبه صغيره -عصير ليمون ( 4 او 3 او 2 ) اللي تبين - مقادير متساويه لكل من زيت لوز مر وحلو +زيت زيتون+زيت جلسرين+زيت جنين القمح ان وجد + زيت فيتامين e ان وجد + زيت خروع للجسم ) وتحط بالثلااااجه عشان الليمون لا يخرب .. وطلعيها قبل لا تستخدمينها بفتره .. 10 دقايق او ربع ساعه عشان تدفى ..

قناع الحليب والحبه السوداء / ملعقه شاي حليب بودره + ملعقه شاي حبه سوداء مطحونه + ملعقة الاكل الصغيره نشاء+ ملعقة اكل صغيره نشاء + شوي عسل + وشوي ماء ورد ( القوام يكون مثل خليط الكيك او اثقل بدرجة )

الشعر
خلطة الحنا/ شعري قصير لحد اكتافي لكن احب املييييه زين من الخلطه .. فباكتب لكم المقدار اللي اسويه
ملعقتين كبار حناء + ملعقتين كبار سدر +علبة زبادي + نصف كوب من منقوع اكليل الجبل والاس

خلطة الزيوت 8 / زيت السمسم + والخروع للشعر + الصبار + زيت زيتون + زيت جوز الهند هذاك الاخضر + زيت دابر + زيت اللوز للشعر + زيت سالا كوريا >> احيانا احذف زيت اللوز

خلطة الافوكادو / باقولكم المقدار اللي اسويه لي ولأختي
علبة زبادي + حبة ثمرة الافوكادو اطلعها قبل بفتره عشان تلين وتنهرس وتختلط + شوية جرجير وشوية زيت جوز الهند
احطهم بالخلاط

منقوع الاس واكليل الجبل / اغلي مويه واخذ ملعقتين من عشبة الاس وملعقتين من اكليل الجبل وانقعها في كوبين ماء مغلي ( مو اخليها تغلي .. بس تتخمر فيها ) بعد 24 ساعه بتتغير لون المويه .. اخذ المويه بالمنخل طبعا .. واحطها برشاش وخلاص هذي الموية اللي ابخ فيها شعري

بالنسبه للروائح
كنت اتحسس من الخلطات اللي فيها روائح شينه .. واحاول بقدر الامكان ما يكون فيه روائح عشان اضمن الاستمرار
بياض الثلج / اول كانت ريحتها تقتل عشان كذا تركتها ( لاني اول ما استخدم خلاط فكانت ريحة الصابون تموت قووويه مره .) وتخوفت اجربها مره ثانيه اما الان استخدمت خلاط احطه واجي اتقهوى مع اهلي عادي مافيه ريحه .. واحس قوة الريحه تكون بسبب نوع صابون الغار المستخدم فيها مدري كذا احساس ..

الدلكة/ ريحتها عاديه جدا .. ومو شينه

خلطتي / رحتها فكس اكثر شيء بس

الحناء والسدر / معروفه ريحته .. ( بس بعد الغسل تروح الريحه ما تكون فايحه )

الافوكادو / ريحة زيت جوز الهند .. صحصح مو مقبوله .. لكن لما تغسلينها عادي ترووووح

الزيوت السبعه / عاديه وترووووح بعد الغسل

زيت سالا كوريا / ريحته مقبوله

منقوع اكليل الجبل والاس/ ريحته حلوه وتروح اذا جف الشعر


النتايج تحسنت بنسبة 60% بشكل عام :icon32:


ملاحظة : خصصت مواعين قديمه لخلطاتي ( خلاط / بادية غضار للحنا وهيك / باديه وسط وغييره )
ايضا خصصت علبه ( علب كريمات قديمه وعلب جبن مخلص ههههههه وشريت علبتين زياده ( كل وحده وحسب احتياجها )


هذا نظامي اللي غيرتي من فتاة لا تهتم .. الى فتة تحب نفسها وبشرتها وتهتم بهم ..
وهذي تجربي بكل شفافيه ..
( حرصت على مسألة الروائح / وحرصت انو ما يكون بخلطات الجسم اكل (مثل رز او كذا ) فقط حاجه نفسيه ما احب احطهم )
حطيت في بالي اني بانتظر النتيجه بعد سنه ولا كتبت النظام هذا بورقه عشان ما احس انو صعب .. وهذا اللي خلاني استمر .. وبانت النتيجه معي باقل من سنه .. ومستمره باذن الله حتى احقق الشيء اللي ابيه ..

امممم
ما حسيت انو فيه تكلفه علي .. لأني كل فتره ازيد وانقص ويجلس معاي كثيييير فمافيه تكلفه ..

ايام الدوري عنايه خفيفه على حسب الوضع اللي يناسب
اي سؤال انا حاضر ..
واللي حابه اساعدها بتنظيم جدولها برضوه اتشرف .. متابعه فقط ..
احب اقولكم .. انا مو طبيبة ولا صيدلانيه .. لكن بنت مثلكم كنت فأر تجارب بيوم من الايام وصار عندي خبره كبيره .. والحمد لله توصلت لأشياء تنفعني وارتحت عليها

واعذروني على الاخطاء الاملائيه ..

وادعولي بظهر الغيب لا أكثر ولا أقل ..
ويااارب اكون افدتكم ولو بشيء قليل ..

:icon35: