كيف غلطت وزعلت غيري ؟؟!! وأنا ما أحس اني غلطت .. والله مقهورة ..

السلام عليكم ورحمة الله وبركاته ..

بنات والله اللي خلاني افكر اني انشر مشكلتي اني مقهووووووورة من اللي صار لي ..
مالي ذنب في كل اللي صار .. ومن عادتي ما أحب اشتكي لحد .. بس قلت ما عندي حد غيركم اشكي له همي ..
والله ما تتخيلون القهر اللي في داخلي ... :(

بقولكم السالفة من أولها وبالتفصيل عشان تحكمون .. هل أنا غلطت ؟؟ ولازم اعتذر ..

يوم الثلاثه فليل تقريبآ الساعه 12 .. اتصلي زوجي وأنا في بيت أهلي لأني حامل وتعبانة .. وهو طول الأسبوع في الدوام .. قالي بيي آخدج اذا تقدرين .. أنا طلعت من الدوام .. وتم يقولي انا ما اقدر ادخل البيت وانتي مب في البيت .. ومن هالكلام المعسول .. والله كنت مستانسه .. ومن سمعت مكالمته قمت ورد فيني النشاط .. واتعدلت وجهزت نفسي .. وبعد تقريبآ ساعتين يه اخدني .. وما وداني البيت .. وسرنا عالبحر .. اقوله انت تعبان .. يقولي لا تعبي معاج راحة .. وتمينا ليه الفير واحنا عالبحر ..
وانا عندي جامعه يوم ثاني .. قالي بنروح العيادة بناخد لج اجازة مرضية .. لأني فعلآ كنت وايد تعبانة ..
وبعدها ردينا البيت .. وقلت له شو رايك نصلي ركعتين نشكر فيها ربنا على النعمة والسعادة اللي احنا فيها .. وبعدها نصلي الفير ونرقد ..
وكان سعيد لدرجة كبيرة .. حتى أنا كنت حاسدة نفسي عليه ..( ما يحسد النعمة الا راعيها )
ويوم الأربعه .. قالي انا مسوي لج مفاجأة وحاجز لج في فندق في دبي .. واليوم الظهر بنسير ..
بعدها رد لي مرة ثانية .. قالي أمي وخواتي بيسيرون معانا بعد .. قلت له زين .. يغيرون جو شوي .. لأنه عمي - الله يرده بالسلامة- مسافر .. ومحد يطلعهم ..
ومشت الأمور على ما يرام .. وقرر انه أخوه يسير مع أمه وخواته في سيارة .. وانا وهو بنسير روحنا ..
وكان حجز غرفنا .. غرفة لي وله .. وغرفة لأمه وخواته .. وغرفة لأخوانه ..
جان ايي يقولي .. أنا بسير مع أخواني .. وخلي وحده من خواتي ترقد معاج ..
جان تقول أمه أنا بناتي برقدهم معاي ..وانت تم مع حرمتك ..
طلعنا ورحنا المطعم عشان نتغذا .. ومن حملت صايرة اكره الأكل .. ما أحب آكل .. وقالي شو تبين .. قلت له ما ابى آكل شي .. مالي خاطر .. وتمو أمه وأخوانه كلي عالأقل مقبلات .. وأنا والله لايعة جبدي مب قادرة اتحمل ريحة الأكل .. قلت له خلاص ما اروم .. ما ابى شي .. وفجأة عصب .. وقالي اذا ما تبين ليش ما يلسي في البيت عن عوار الراس .. كرهتيني في حياتي ..
والله حسيت باهانة أول مرة جيه يكلمني جدام اهله .. وتميت ساكته ..
ويوم رجعنا الفندق .. كمل اللي في خاطره .. ويقولي انا اعرف انتي مضايجة لأنه اهلي معاي .. رضيتي ما رضيتي أهلي هني على راسج .. وتبين بردج بوظبي وانا بتم هني أكمل وناستي .. والله شاهد اني لا مضايجة من وجود اهله ولا شي .. بس ما عرف ليش فسر رفضي للأكل بهالطريقة ..
وتميت طول الوقت ساكته عنه .. لأني اعرفه اذا تكلمت بيزيد .. بس اسكت عنه أحسن ..
ويوم حسيت نفسي خلاص مب قادرة اتحمل .. توضيت ويلست اقرا قرآن ..
وانا اصيح وادعي الله يبعد عنه وسوسة الشيطان ..
جان يقولي الحين تسوين نفسج مسكينة .. والله انتي ما تخافين ربج .. وتم يقولي كلام غريب .. والله حسيته مو طبيعي ..
وخلاني وطلع من الغرفة .. بعدها يتني اخته .. تقولي يالله البسي بنروح المول قلت بها تعبانة ما اقدر اسير .. بس ما بينت لها اني زعلانة منه .. ويوم سألتني عن ملامحي قلت لها كنت اقرا قرآن وتميت اصيح ..
جان ايي .. يقولي يالله حبيبتي .. قومي بنروح المول .. رضيتي ولا ما رضيتي بتيين غصبآ عنج ..
قلت بصير أحسن عنه وبسير ..
وكان يمشي مع أهله ولا كأنه يعرفني ..
وفجأة يه عندي .. يقولي اصطلبي أحسن لج .. والله اني ما سويت شي .. فجأة يقولي جيه ..
قلت حرام عليك والله مب قادرة اتحمل .. كفاية اللي سويته فيني .. ولا رد علي .. وروح

قلت بشتري له شي بفاجأة به ..
واشتريت له شي يحبه .. ويوم قلت له اشتريت لك هاه .. قالي انزين .. وهو متنرفز ..
ويوم سرنا نتعشى .. قالهم أنا بسير بشتري لزوجتي من مطعم هي تحبه الأكله اللي تحبها ..
وكنت مستانسة قلت جنه رد لطبيعته .. ويوم رجعنا شاف شعر أخته طالع ..
قالها دخلي شعرج .. جان تقوله انزين .. بس انت مالك خص فيني .. ولا بس انا اللي تقدر علي .. والله عندك زوجه وشوفها قبل لا تشوف غيرها ..
والله استغربت من كلامها .. كيف تقولي جيه .. وانا كنت متغشية .. ويهي ما يبين كيف شعري بيظهر ..
انا سكت .. هي وأخوها انا مالي خص ..
أخته جيه تقوله .. وقام حرج علي انا .. وتم يحط علي .. أكلي يالله .. طفرتيني أنا كرهت حياتي معاج ..
والله ما سويت شي ..
واحنا راجعين الفندق اتصل فيني اخوي .. قالي انا في دبي .. وابى اوديج مكان بيعيبج ..
قلت شكله أخوي حاس اني ضايجه .. قالي بيي الفندق بشلج ..
واستأذنت من زوجي .. قالي ما عندي مانع .. روحي .. برتاح شوي منج ..
مسكين أخوي .. أول ما شافني .. حباني على راسي .. وسألني شو مضايقنج ؟؟
وأكدت له بأنه ما فيني شي .. بس الحمل متعبني شوي ..
رحت استانست مع أخوي .. ويوم رديت الفندق .. كمل سمفونيته .. وتم طول الوقت يحط علي ..
واني أنا وايد متغيرة .. وأنا وايد مقصرة معاه .. وهو نعمة علي .. والكل يتمناه .. والله العظيم كلامه كان غريب .. كل ما اذكره اتم اصيح ..
ويوم اضايج وايد .. أحس لازم آخد لي شور بارد ..
وفجأة يه فتح باب الحمام .. وحركته زيغتني .. وحسيت بخوف ..
قلت له حرام عليك .. سكر باب الحمام ياني هوا بارد ..
وهو لا حياة لمن تنادي .. ومن خوفي .. طلعت من الحمام ..
ولا قدرت ارقد .. ياني الم في راسي .. وبعدين في بطني .. وحسيت اني بفقد حملي للمرة الثانية ..
ويوم حسيت الألم زاد ومب قادرة اتحمله .. قلت له .. يايني ألم قوي .. مب قادرة اتحمله ..
قالي .. تحاولين تكسرين خاطري .. قلت له نحن مب يهال جيه تكلمني .. وما صدق الا يوم شاف الدم بنفسه ..
ويوم خاف .. طلبلي الدكتور في الفندق .. وقاله هاه نتيجة تعب .. بس روحو عيادة عشان تتطمئن ..
ولازم ترتاح ..
ويوم يينا بنطلع من الفندق .. عدل الأغراض وسوا كل شي .. بس عشان ما اتعب نفسي .. وهو يقولي مب عشانج .. عشان الياهل اللي في بطنج .. وأنا مب مهتمه لكلامه ..
هو سيارته صالون .. وأخوه سيارته فور ويل كبيرة ..
جان يقول لأخوه خد سيارتي اريح لأمي .. وأنا باخد سيارتك ..
قلت له عيل انا بسير معاهم .. اريحلي ..
جان يقولي اركبي معاي وانتي ساكته .. وبس ركبت ومشينا ..
تم يحط علي .. انتي تغارين من أهلي .. وشو فيها لو عطيت أخوي السيارة ..
قلت له أنا ظهري يعورني ... ما اقدر اركب سيارة رفيعة .. من حملت .. ما اركب الا سيارات صالون ..
قالي انتي تدلعين .. روحي عند أهلج يدلعونج .. غلطت وقلت له .. والله طول ما انت في الدوام انا عند أهلي .. سيارتي ما يخلوني اسوقها .. وآخر دلع .. الدريول الحين يستخدم سيارة صالون بس عشاني ما احمل السيارة الكبيرة...
وتم طول الطريج وهو معصب .. ويطلعني انا غلطانة .. ويحسسني بأني حقودة .. والله شكيت في عمري ..
ويوم هدأ شوي .. جان يقولي .. انتي أمس كنتي تبين تلفتين انتباهي .. انج تجهضين الياهل اللي في بطنج .. قلت له حرام عليك .. مثل ما هو ولدك تراه ولدي .. وانا اللي تعبانة عليه .. كيف بسوي جيه فيه ..
واتصل في أمي .. وقالها ترى بنتج تبى تجهض الياهل اللي في بطنها .. وااذا صار فيه شي .. ترى بحملها المسؤولية طول عمرها .. وبطلقها .. وبرفع عليها قضية في المحكمة ..
والله يوم قال جيه .. يتني الضحكة .. وتميت اضحك .. وقلت له مستحيل انت تكون عاقل اليوم ..
بس وصلنا البيت .. دخلي اغراضي .. وبدل وطلع بدون ما ينطق بكلمه ..
طرشت له مسج .. جان يقولي عندي مشوار وبرجع اشل أغراضي وبسير الدوام بدل النكد اللي في البيت ..
عرفت انه رايح المقهى عند ربعه وبيرجع ..
جهزت اغراضه .. ورجع قالي اتصلي لأهلج ايون ياخدونج عندهم ليه ما ارد الأسبوع الياي افكر ايي اشلج ولا لأ ..
قلت له انت وصلني في طريجك .. وصلني وهو صمن بكمن عمين ..
وانا اللي كنت احاول اراضيه .. عالرغم بأني ما غلطت في شي ..
وما كنت اباه يروح الدوام وهو زعلان .. وقعدت اوصيه على نفسه .. ومن هالكلام اللي يعيب الرياييل ..
بس ما شي فايده .. ومسجات ذليت نفسي فيها ذل .. بس عشان يرد علي بكلمه تفرحني ..
وتوه من شوي اتصل فيني .. يقولي انا أحبج وما ودي اسوي جيه .. بس انتي ما تفهميني .. قلت له انزين فهمني ..
قالي خلاص ماله داعي عوار الراس مرة ثانية ..وتم يوصيني على نفسي ..
اعرف انه ضميره انبه انه سوه فيني جيه .. وانا كنت متحملتنه ..

بس انا مب قادرة افهم .. بنات هل تحسون انا غلطت في شي ؟؟

وهل اني كنت استحق اللي ياني منه ؟؟

وشو اسوي معاه ؟؟ هل اراضيه .؟؟ ولا شو اسوي معاه ؟؟

والله مب عارفه شو اسوي ؟؟ ومب عارفه كيف اتصرف ؟؟

تفكيري صار مشتت .. مب قادرة اخبر أحد ..

اسمحولي طولت عليكم .. بس حبيت اسرد لكم تفاصيل القصة عشان تقدرون تحكمون ..
طلعت كل اللي في خاطري لكم .. عالأقل قدرت ارتاح شوي ..

تحياتي لكم ..